6 na bansa balik laban sa SEA V Cup Candon Arena

by MC @Sports News | July 8, 2026

Photo: 6th SEA Volleyball Cup 2026 - Candon City Official

Magbabalik ang elite volleyball sa Candon City habang ang nangungunang 6 na bansa sa volleyball sa rehiyon ay maglalaban-laban para sa karangalan sa unang linggo ng Southeast Asian Volleyball Cup (SEA V Cup) simula ngayong Miyerkules. Ang core ng Alas Pilipinas squad na nagpasiklab sa FIVB Men’s Volleyball World Championship 2025 ay babalik upang pamunuan ang kampanya ng bansa sa makabagong Candon City Arena.

Maglalaban ang Pilipinas at Cambodia ng 5:30 p.m. sa Group B play ng event na may FIVB world ranking points. Ang Thailand, kampeon sa unang leg noong 2025 sa Candon ay maglalaro sa curtain-raiser ng 2 p.m. laban sa Vietnam.

Magde-debut ang Myanmar laban sa Thailand sa Huwebes sa regional competition na in-host ni Candon City Mayor Eric Singson at sinusuportahan ng Philippine Sports Commission at Philippine Olympic Committee.

Lalaban ang Alas Pilipinas sa 2025 SEA V. League second leg champion na Indonesia sa Biyernes. Ang mga mata ay itutuon sa karismatikong sina Josh Ybanez at mga kapwa beterano ng FIVB Volleyball Men's World Championship na sina Lloyd Josafat, Louie Ramirez at Vince Lorenzo.          

Pinuri ng pangulo ng Asian Volleyball Confederation na si Ramon “Tats” Suzara ang Lungsod ng Candon sa pangunguna ni Singson para sa patuloy na pangako sa pagpapaunlad ng isport sa lahat ng antas.

Ginto sa Alas Beach Volley, Groseclose at bowling gold

ni Elyssa Nichole @Sports | December 20, 2025

Photo: Ang tamis ng tagumpay ng Alas Pilipinas nina Bernadeth Pons at Sisi Rondina nang unang talunin ang Thailand team sa opening match Women’s Beach Volleyball Finals sa SEA Games 2025 kahapon at dinurog din ng pares nina Dij Rodriguez at Sunny Villapando Thailand Team 2 para sa makasaysayang ginto ng 'Pinas. (BVRpix)

Makasaysayan ang tagumpay ng Alas Pilipinas Women Beach matapos patalsikin sa trono ang Thailand, 2-0 at sikwatin ang first-ever beach volleyball gold medal sa 33rd Southeast Asian Games na nilaro sa Jomtien Beach, Thailand, kahapon.

Nagsanib-puwersa sina veteran duo Sisi Rondina at Bernadeth Pons upang pagpagin ang pambato ng host country na sina Worapeerachayakorn Kongphopsarutawadee at Taravadee Naraphornrapat, 21-17, 21-15, sa unang laro sa finals.

Dumaan sa butas ng karayom ang tandem nina Dij Rodriguez at Sunny Villapando bago tinalbos ang magkakamping sina Tanarattha Udomchavee and Rumpaipruet Numvong in straight sets, 21–13, 17-21, 15-6.

Nasungkit din ng Pilipinas ang mailap na gold medal sa beach volleyball kaya sina Rondina, Pons at Rodriguez ay mga 3-time SEA Games medalists, nasilo nila ang back-to-back bronze medals sa 2019 at 2021, habang ang national team newcomer Villapando ay naka ginto agad sa unang subok.

Nakalsuhan ang pamamayagpag ng Thailand sa nasabing sport sa SEAG matapos nilang angkinin ang korona sa walong edition ng tournament sapul ng magsimula ang beach volleyball noong 2003.

Samantala, unang naka-silver si Peter Groseclose sa Men’s 1500m, nasukbit nito ang ginto sa men’s 500m Short Track Speed Skating sa 33rd Southeast Asian Games sa Thailand kahapon.

Gintong medalya rin ang nasungkit ng Philippine Men’s Bowling Team nina Kenneth Chua, Marc Dylan Custodio, Artegal Barrientos, at Mark Jesus San Jose sa Team of 4 event nang tumapos sa iskor na 981 at talunin ang Thailand sa 865 sa SEAG.

Silver finish din si Kim Remolino sa men's individual triathlon.  Napanatili naman ng Philippine Women's Floorball team ang bronze nang talunin ang Malaysia 4-3. Ikatlong silver medal naman ang nakuha ni Triathlon rising star Kira Ellis sa Triathlon Individual event. Tumapos si Kira na may hawak na 2 golds at 3 silver medals.

Kasaysayan ng 'Pinas sa Women's Football - GINTO!

ni Anthony E. Servinio @Sports | December 19, 2025

Photo: Si goalkeeper Olivia McDaniel ang nagsilbing bayani nang masalo nito ang bola ng Vietnam at mapunta sa Filipinas ang gintong medalya ng 2025 SEAG Thailand.  (pocpix) 

Lumikha ng bagong kasaysayan ang Philippine Women's Football Team at tawagin na silang mga kampeon ng 2025 SEA Games. Lumiwanag ang Miyerkules ng gabi nang talunin ng Filipinas ang defending champion Vietnam sa makapigil-hiningang penalty shootout, 6-5, sa Chonburi Stadium.

Walang goal sa takdang 90 at karagdagang 30 minuto kaya kinailangan ang shootout. Ipinasok ng unang limang napiling sina Jael-Marie Guy, Alexa Pino, kapitana Hali Long, Angie Beard at Ariana Markey ang kanilang mga bola subalit natumbasan ito ng mga sumipa sa Vietnam, ang kampeon sa huling apat na SEA Games.

Pumasok sa "sudden death" at bawal magkamali pero sumipa ng malakas si Jackie Sawicki at hindi na ito naabot. Pagkakataon na ni Tran Thi Thu pero nabasa ni Olivia McDaniel na papuntang kanan ang bola at nasalo niya ito na naging hudyat ng selebrasyon ng mga Pinay.

Tinanggap ng Filipinas ang mga ginto kay PFF General Secretary Angelico Mercader. Pagkatapos ng "Lupang Hinirang" ay ginawaran ng uniporme si Long na may numerong 100 dahil ang kampeonato ay ang kanyang ika-100 laro para sa pambansang koponan.

Sinamahan ni Malea Cesar ang kanyang nakakabatang kapatid Naomi Cesar na kinuha ang ginto sa Women's 800M ng Athletics noong isang araw. Magkahalong lungkot at saya ang hatid ni beteranang goalkeeper Inna Palacios sa paghayag ng kanyang pag-retiro.

Asahan ang mabigat na 2026 para sa Filipinas simula sa AFC Women's Asian Cup Australia sa Marso na qualifier para sa FIFA Women's World Cup Brazil 2027. Susunod ang Aichi Nagoya Asian Games sa Setyembre.

Samantala, bigong makauwi ng medalya sa Women's Futsal nang yumuko ang Filipina5 sa host at dating kampeon Thailand, 0-5, sa labanan para sa tanso kahapon sa Bangkokthonburi University. Ang Vietnam at Indonesia ang magtatapat para sa ginto.