Na-resched na biyahe abroad ni VP Sara, aprub sa M'cañang

ni Mylene Alfonso @News | May 3, 2026

Photo: Inday Sara Duterte - FB

Kinumpirma kahapon ng Office of the President na inaprubahan nitong muli ang na-reschedule na biyahe ni Vice President Sara Duterte sa labas ng bansa, na nagsimula kahapon at tatagal hanggang Mayo 15.

"Confirmed," tugon ni Palace Press Officer Undersecretary Claire Castro sa Palace reporters nang tanungin kung naaprubahan na ito ng OP.

Sinabi naman ng OVP na wala pa itong kumpirmasyon kung lilipad palabas ng bansa si Duterte kahapon nang hingan ng komento tungkol sa plano sa pagbiyahe ng Bise Presidente.

Una nang isinumite ni Duterte sa OP ang kanyang kahilingan para sa pagbiyahe na nakatakda mula Abril 23 hanggang Mayo 15.

Bagama’t naaprubahan na, sinabi ni Duterte na "last-minute" na ang pag-apruba ng Palasyo sa kanyang overseas trips at nakapagsumite na siya ng panibagong request dahil sa pagbabago ng kanyang mga plano.

Nauna rito, itinanggi ng Palasyo na naaprubahan sa huling sandali ang travel authority ni Duterte, at sinabing karaniwang ibinibigay ang ganitong mga pahintulot isang araw bago ang nakatakdang paglipad ng Pangalawang Pangulo. 

Sa Mayo 4 nakatakdang magbalik-sesyon ang Kongreso, kung saan isusumite na ang report ng House Committee on Justice tungkol sa isinagawang impeachment proceedings laban kay VP Sara. 

Inaasahang pagbobotohan na rin ito sa plenaryo kung isusumite na sa Senado para sa paglilitis.

Impeachment trial ni VP Sara, Hunyo pa gugulong — Lacson

ni Mylene Alfonso @News | May 3, 2026

Photo: Ping Lacson / FB

Posibleng mag-convene agad ang Senado bilang impeachment court sa sandaling matanggap nito ang Articles of Impeachment laban kay Vice President Sara Duterte-Carpio, ngunit maaaring sa Hunyo pa magsimula ang mismong paglilitis.

Ayon kay Senate President Pro Tempore Panfilo “Ping” Lacson, bagama’t nais ni Senate President Vicente Sotto III na agad mag-convene ang impeachment court, maaaring kailanganin ng hindi bababa sa tatlong linggo para sa mga proseso tulad ng pagpapadala ng summons at reply, at preliminary conference para sa stipulations at posibleng "marking of evidence" bago magsimula ang trial.

“Kailangan ma-transmit muna sa amin ang Articles of Impeachment. Kung susundin natin ang ganoong proseso, hindi ganoon kadali 'yan. We’re talking of at least three weeks siguro bago talaga makapagsimula ang trial, at the very least," ani Lacson sa panayam ng DZMM.

Aniya, ang preliminary conference o “pre-trial” ay maaaring isagawa ng Senate President o ng kanyang legal adviser upang tukuyin kung anu-anong mga isyu ang puwedeng tatalakayin sa paglilitis.

Binalikan ni Lacson ang impeachment trial ng yumaong dating Chief Justice Renato Corona, na aniya’y nagkaroon ng kalituhan dahil sa kawalan ng maagang pre-trial, na nagresulta sa pagpasok ng mga “surprise” na testigo sa kalagitnaan ng paglilitis.

Kaugnay ng posibilidad na maglabas ng temporary restraining order (TRO) ang Korte Suprema, sinabi ni Lacson na magpupulong ang Impeachment Court upang talakayin ang nasabing usapin at kung kinakailangan, pagbotohan ang nararapat na hakbang.

Senado, may pera — Sotto... Impeachment vs. Sara, aaksyunan agad

ni Mylene Alfonso @News | May 1, 2026

Photo: Vicente Tito Sotto III at Inday Sara Duterte - FB

Agad na magko-convene ang Senado bilang impeachment court sa mismong susunod na araw kapag umakyat na sa Senado ang Articles of Impeachment laban kay Vice President Sara Duterte.

Ginawa ni Senate President Vicente “Tito” Sotto III ang reaksyon sa naging paglilinaw kaugnay sa terminong “forthwith,” na binanggit sa Article 11, Section 3(4) ng 1987 Constitution na nangangahulugang dapat isagawa ng Senado ang impeachment trial “within a reasonable time,” at hindi kinakailangang agad-agad, taliwas sa iginiit ng isang petitioner.

“I think the Supreme Court decision is based on the petition. Hindi naman sumasaklaw ‘yung decision na ‘yan sa trabaho ng Senado. Does not have anything to do with the work of the Senate. We are co-equal of branch. That’s why tama ‘yung decision nila, pero as far as that petition that was filed to them is concerned, not on the way the Senate is conducting itself,” paliwanag ni Sotto sa ambush interview. 

“And in this case, if ever we receive the articles of impeachment, we will act on it forthwith. Sa akin ang forthwith, [means] the following day,” patuloy ni Sotto. 

Samantala, tiniyak din ni Sotto na may sapat na pondo ang Senado mula noong nakaraang taon upang mag-convene ng bilang impeachment court.

Nauna nang sinabi ni Sen. Ping Lacson na may mahigit P27.5 milyon para sa naudlot na paglilitis noong nakaraang taon, kung saan maliit na bahagi lamang ang nagamit para sa mga toga ng mga senador.