Sen. Dela Rosa, 'di isusuko sa ICC

ni Mylene Alfonso @News | May 12, 2026

Photo: Ronald Bato Dela Rosa - FB

Isinailalim sa Senate protective custody si Senator Bato Dela Rosa matapos ang mosyon ni Sen. Rodante Marcoleta sa gitna ng umano'y arrest warrant niya mula sa International Criminal Court (ICC) kahapon.

Ayon kay Marcoleta, layunin ng hakbang na maprotektahan si Dela Rosa habang inaayos at tinatapos nito ang legal na hakbang para sa kanyang depensa.

Samantala, ipinag-utos na i-cite in contempt ng Senado ang mga agent ng National Bureau of Investigation (NBI) na sangkot sa panghahabol at pagharang kay Dela Rosa.

Ayon sa Senado, iimbestigahan nila ang mga nasabing agent kung sino ang nag-utos na pigilan si Dela Rosa na gawin ang trabaho nito bilang senador at hulihin ito kahit na mayroon itong parliamentary immunity.

"The John Doe's and Jane Doe's as identified individuals held in contempt. I am directing the Senate Sargent-at-Arms to put in Senate custody to the said individuals and to detain them in the Senate premises," ani SP Alan Peter Cayetano.

"If they need assistance, you're authorized to coordinate with the Pasay City PNP until such time that those held in contempt can purge themselves of contempt," dagdag pa niya.

Senador hinabol sa loob ng Senado, nadapa... Bato, nakipagbuno sa NBI, duguan

ni Mylene Alfonso @News | May 12, 2026

Photo: Ronald Bato Dela Rosa - FB

Naging emosyonal si Sen. Ronald “Bato” dela Rosa matapos magpakita sa sesyon ng Senado kahapon.

Ayon sa ulat, agad namang pinakalma ng ilang senador si Dela Rosa habang nasa loob ng sesyon matapos itong makitaan ng matinding emosyon at duguan ang kamay dahil sa hinarang umano ang senador ng National Bureau of Investigation.

Nadapa pa si Dela Rosa nang habulin ng mga NBI agent sa isang punto pero hindi pa rin naaresto. 

Samantala, duguan at sugatan din ang isang tauhan ng Office of the Sergeant at Arms (OSSA) na si G. Terrence Lim mula sa kamay ng NBI. 

Tinangkang pigilan ni Lim ang mga tauhan ng NBI dahil sa pinaiiral na lockdown ng Senado kasunod ng pagsugod ng mga tauhan ng NBI sa Senado para arestuhin si Dela Rosa. 

Bagay na hindi nagustuhan ng mga tauhan ng NBI na nauwi sa isang komosyon sa pagitan ng OSSA at NBI. 

Dahil sa pagbitibit ng mga tauhan ng NBI kay Lim ay halos nawasak ang suot-suot nitong barong at natira na lamang ang kanyang t-shirts na panloob. 

Pilit din ipinasok sa sasakyan ng NBI si Lim at sumigaw pa ang isa sa mga miyembro ng NBI na puntahan na lamang si Lim sa NBI. 

Ngunit ilang minuto ang lumipas ay biglang bumukas ang sasakyan ng NBI sa likod na bahagi na sakay si Lim at bigla siyang bumaba at nagtatakbo. 

Sigaw ni Lim ginawa lamang umano niya ang kanyang trabaho batay sa order na lockdown. 

Matapos nito ay agad na dinala sa Medica-Dental clinic ng Senado ng kasamahan ni Lim. 

Agad siyang nilapatan ng pangunang lunas at nakatakdang dalhin sa pagamutan para sa mas malalim na pagsusuri kay Lim.

Trillanes, hawak ang ICC warrant kay Bato

ni Mylene Alfonso @News | May 12, 2026

Photo: Antonio Sonny Trillanes at Ronald Bato Dela Rosa - FB

Sumugod si dating Senador Antonio Trillanes IV sa Senado, bitbit ang arrest warrant na inisyu umano ng International Criminal Court (ICC) laban kay Sen. Ronald “Bato” dela Rosa.

Kasama ni Trillanes ang mga tauhan ng National Bureau of Imvestigation (NBI) para isagawa ang pag-aresto laban kay Dela Rosa.

“Sinabi ni Bato na sasamahan ko daw siya eh, ako daw ang magposas sa kanya kaya hinihintay ko siya… ise-serve na ang warrant of arrest, titingnan naitn ‘yung tapang, yes ICC warrant,” ani Trillanes kasabay ng pagpapakita ng arrest warrant na insyu ng ICC.

“‘Andirito lang naman ako dahil sinabi niya na nire-request niya na samahan ko ‘yung pag-aresto, ‘andirito ako ngayon para arestuhin siya,” ayon pa kay Trillanes.