Sen. Bato, handa raw magparaya kay Mayor Sara sa pagka-pangulo

ni Jasmin Joy Evangelista | October 10, 2021

Willing daw na magpa-substitute si Sen. Bato dela Rosa kay Davao City Mayor Sara Duterte-Carpio sa pagtakbo sa pagka-pangulo kung magbabago ang isip ng alkalde at mapagdesisyunang tumakbong presidente sa 2022.

Sa isang panayam, tila walang isyu kay Sen. Bato kung papalitan siya ni Duterte-Carpio bilang standard bearer ng Partido Demokratiko Pilipino-Lakas ng Bayan (PDP-Laban)- Cusi wing.

“Everything is possible,” aniya, basta legal at suportado ng kanyang party mates ang substitution.

“By all means, magi-give way ako. As I have said, hindi ko personal na desisyon na tumakbo, desisyon ito ng partido”, pahayag ni Dela Rosa.

“Hindi naman siguro dapat kinukuwestiyon pa kung legal na paraan ‘yung pag-substitute. Anything can happen,” dagdag niya.

Matatandaang nag-file ng certificate of candidacy sa pagkapangulo si Sen. Bato dela Rosa noong huling araw ng filing ng COC.

Inamin din niya na maging siya ay nagulat sa plano ng kanyang party mates dahil sinabi lamang ang planong pagpapatakbo sa kanya pasado alas-3:00 ng hapon noong Oktubre 8.

Ngunit sinabi niya na matagal na raw pinag-iisipan ng kanyang party mates na siya ang gawing standard bearer ng partido, kabilang sina Sen. Bong Go at Sen. Francis Tolentino, para ipagpatuloy ang “Duterte legacy”.

“Basta ako hindi ako umaatras. I am a good soldier, give me the instruction to do this, and I’ll do it. So andito na tayo, ani Sen. Bato.

Bato Dela Rosa, tatakbong pangulo sa 2022 elections

ni Lolet Abania | October 8, 2021

Tatakbo si Senador Ronald “Bato” Dela Rosa sa pagka-pangulo sa 2022 national elections.

Ayon kay PDP-Laban secretary general Melvin Matibag, si Dela Rosa ang standard bearer ng ruling PDP-Laban at ang kanyang running-mate ay si Senador Christopher “Bong” Go.

Naghain si Dela Rosa ng kanyang certificate of candidacy (COC) ngayong Biyernes sa Harbor Garden Tent sa Sofitel Philippine Plaza Manila sa Pasay City.

Death penalty, isinusulong nina Sen. Pacquiao at Bato

ni Ronalyn Seminiano Reonico | December 22, 2020

Isinusulong ni Senator Manny Pacquiao na ibalik ang death penalty sa bansa kaugnay ng pamamaril at pagpatay ni Police Master Sergeant Jonel Nuezca sa mag-ina na sina Sonya Gregorio at Frank sa Paniqui, Tarlac nu'ng Linggo.

Pahayag ni Pacquiao, “Naisip niya siguro na mahina naman ang ating batas at kayang-kaya niyang pagdusahan sa kulungan ang kanyang ginawang karumal-dumal na krimen.

“That’s the same mindset prompts criminals to carry out even the most heinous of crimes. Alam kasi ng mga kriminal at mga utak-kriminal na makukulong lamang sila kapag gumawa sila ng karumal-dumal na krimen.

“Bigyan sana ulit natin ng pagkakataon itong death penalty dahil sa tingin ko, ito na lang ang kulang upang maging mabilis at maging epektibo ang ating pagbibigay ng hustisya sa ating kababayang biktima ng mga heinous crimes.”

Maging si Senator Ronald “Bato” dela Rosa, dating hepe ng Philippine National Police (PNP), ay nais ding hatulan ng kamatayan si Nuezca. Aniya, “‘Yung ginawa ng pulis na cold-blooded killing is double murder (or two counts of murder) and a heinous crime na ang dapat parusa ay death penalty pero hanggang ngayon ay hirap na hirap pa ring umusad ‘yung ino-author kong death penalty bill.”

Samantala, panawagan naman ni Pacquiao ay huwag husgahan ang kabuuan ng PNP dahil sa ginawang karumal-dumal na krimen ni Nuezca. Aniya, “Nananawagan ako sa ating mga kababayan. Huwag po nating husgahan ang ating buong PNP dahil sa ginawa ni Nuezca. Naniniwala ako na mas marami pa ring matitinong pulis at itong si Nuezca ay isa lamang sa mangilan-ngilang bulok sa kanilang organisasyon.

“Sa halip na kamuhian ang ating mga pulis ay tulungan po natin sila upang maramdaman nila ang pagmamahal at pagkalinga ng mga mamamayang kanilang pinagsisilbihan. “Ipakita natin ang ating tiwala nang sa ganu’n ay suklian nila ito ng mas tapat na paglilingkod sa ating bayan.”