Imbestigasyon sa drug war.. Tolentino, abogado ni Bato sa ICC

ni Mylene Alfonso | March 30, 2023

Tatayo bilang legal counsel ni Senador Ronald “Bato” dela Rosa si Sen. Francis Tolentino para kumatawan kaugnay sa imbestigasyon ng International Criminal Court (ICC) hinggil sa war on drugs noong administrasyon ni dating Pangulong Rodrigo Duterte.

“I accept the proposal of Sen. Dela Rosa to lawyer for him,” ani Tolentino, chairperson ng Senate committee on justice and human rights, sa online news conference kahapon kaugnay sa hiling ni Dela Rosa, na dating chief ng Philippine National Police na nahaharap sa kasong crimes against humanity.

Nanindigan din si Tolentino na dapat dito sa Pilipinas gawin ang imbestigasyon at hindi sa Netherlands.

Kaugnay nito, hindi pa rin umano niya nakakausap si Duterte hinggil sa posibleng kinatawan ng huli sa international tribunal.

"If he wants, I’m just having my papers fixed now for my proper accreditation if that will come to that point,” aniya pa.

“My role would be to ensure the protection of Sen. Dela Rosa, not just within the confines of the ICC. Because we’re claiming that they do not have jurisdiction, but even locally,” wika pa ni Tolentino.

Matatandaang pumasa si Tolentino sa Philippine Bar Exams noong taong 1984 at New York State Bar Exams noong 1991.

Sen. Bato sa mga kabataan: ‘Wag puro TikTok, mag-ROTC kayo!

ni Mylene Alfonso | February 5, 2023

Ipinagtanggol kahapon ni Senador Ronald ‘Bato’ dela Rosa ang muling pagbabalik ng Reserve Officers’ Training Corps (ROTC) sa mga eskuwelahan sa halip na mag-TikTok ang mga kabataan.

“Iyong ating kabataan, instead na magsige reklamo, magsigeng TikTokTikTok lang d’yan, dapat ihanda natin ang ating kabataan para gampanan ‘yung kanilang constitutional duty na depensahan ang ating bayan sa panahon ng pangangailangan,” pahayag ni Dela Rosa sa panayam ng ABS-CBN TeleRadyo.

Batay sa Konstitusyon, maaaring i-require ng gobyerno ang lahat ng mamamayan na magsilbi sa militar kung kinakailangan.

Dapat na umanong ibalik ang ROTC upang magkaroon ng dagdag na puwersa ang Pilipinas sa oras ng tangkang panghihimasok ng ibang bansa, tuwing may sakuna at krisis.

“Alam natin may looming threat tayo dito sa South China Sea, ‘yung pag-occupy ng China d’yan sa ating mga teritoryo d’yan sa South China Sea. Kailangan ready tayo, dahandahan na silang umaabante dito.

‘Yung harapan ng Palawan natin, nakikita na ‘yung mga presensiya nila d’yan,” paliwanag ni Dela Rosa.

“National defense is the strength of the country. If you have a weak national defense then you have a weak country. You cannot be respected. Puwede kang bully-bully-hin lang ng mga kapitbahay mo because [para sa kanila] mahina ka, mahina ka na bansa. So, kailangan talaga natin, strengthen ‘yung ating national defense capability through the imposition of mandatory [ROTC],” saad pa ng senador.

Matatandaang isa sa dahilan kaya tinanggal na ang mandatory ROTC sa mga paaralan ay dahil sa isyu ng korupsiyon at pang-aabuso. Pero sinabi ni Dela Rosa na may mga inilatag na proteksiyon ang bagong bersiyon ng programa.

“Naglagay tayo ng grievance board. Ito ay bubuuhin ng taga-DND, tagaTESDA, taga-CHED at school mismo para ito ‘yung mag-address sa mga problema sa corruption, abuse na nagaganap sa ROTC. Kahit walang complainant, basta meron silang naoobserba o may nakarating sa kanilang balita na merong ganitong nangyayari, motupropio they can investigate sa allegation,” giit pa niya.

Matututunan din aniya sa ROTC program ang moral values, personal discipline, love of country, patriotism, nationalism, respect for human rights, adherence to the Constitution, at marami pang iba.

Ani Dela Rosa, hindi rin puro ‘militaristic’ ang ituturo sa bagong ROTC.

“Maybe 50 percent is military, 25 percent is disaster response, 25 percent is for personal development. ‘Yung lahat-lahat ng moral values mga personal discipline, dito nila matutuhan. Kaya all-encompassing itong mandatory ROTC program,” dagdag ng dating PNP chief.

Missing sabungero, 34 na

ni Lolet Abania | March 4, 2022

Umabot na sa 34 ang nawawalang sabungero matapos na madagdagan ng tatlo pa ang naunang naitalang 31, ayon kay Senador Ronald “Bato” dela Rosa.

“Thirty-one lang pala ‘yung allegedly missing persons involved in game fixing but meron pa palang three missing persons ang allegedly involved in cloning accounts,” pahayag ni Dela Rosa sa ginanap na hearing ngayong Biyernes ng Senate Committee on Public Order and Dangerous Drugs na siyang chairman.

“This brings to a total of 34. Correction po hindi 31, kundi 34 na ang missing persons na recorded by the PNP (Philippine National Police),” sabi ni Dela Rosa.

Ito ang kinumpirma ni Police Brigadier General Eliseo Cruz, chief ng Criminal Investigation and Detection Group (CIDG) sa naging pahayag ng senador.

Subalit, ayon kay Cruz, anim lamang sa mga ito ang hawak ng kanyang tanggapan.

“Yes, sir. But we are only handling six cases,” ani Cruz.

Hiniling naman ni Dela Rosa kay Cruz na imbestigahan din ang iba pang nawawalang sabungero, habang sinabi ng hepe ng CIDG na nakikipag-ugnayan na sila sa mga Police Regional Offices.

Una nang napabalita na ang pinakamaraming nawawalang sabungero ay matatagpuan sa Laguna na may 19, anim naman sa Maynila, anim sa Batangas, dalawa sa Bulacan habang ang isa ay dinukot sa bahay nito sa San Pablo, Laguna.