Alam din ni Robin — Matibag... Pinagtataguan ni Bato, tuloy na

ni Mylene Alfonso @News | May 19, 2026

Photo: Mel Matibag, Robin Padilla at Ronald Bato Dela Rosa - NBI - Senate PH - FB

Tukoy nana umano ng National Bureau of Investigation (NBI), ang pinagtataguan ni Senador Ronald “Bato” dela Rosa ngunit tumangging magbigay ng detalye dahil nagpapatuloy pa ang imbestigasyon.

“Mahirap naman po mag-announce na nandirito siya kasi people try to speculate,” pahayag ni NBI Director Melvin Matibag sa MACHRA Balitaan' ng Manila City Hall Reporters' Association (MACHRA) sa Harbor View Restaurant sa Maynila.

“Marami pong lead na binigay, but we have a lead kung nasaan talaga pero in the meantime we will suspend ‘yung announcement kung nasaan talaga siya.”

Ayon kay Matibag, kung may taong posibleng nakaaalam din sa kinaroroonan ni Dela Rosa ay walang iba kundi si Sen. Robinhood Padilla.

Una rito, sinabi ni Padilla na nagtago si Dela Rosa mula sa hinihinalang kidnapper kaya umalis sa Senado noong Mayo 14. Tumanggi naman si Padilla na sagutin kung tinulungan niya si Dela Rosa na umalis sa Senado noong nakaraang Huwebes, sa gitna ng mga alegasyong magkasama silang umalis.

Kaugnay nito, hinimok ni Matibag Dela Rosa na harapin ang legal na proseso at tumugon sa arrest warrant na inilabas ng International Criminal Court.

“Galing siya sa law enforcement… it's better na harapin niya ‘yung warrant niya, mag-submit siya. Harapin niya ‘yung kanyang pananagutan sa batas,” diin ni Matibag.

Hirit ng OSG sa SC... Petisyon ni Bato vs. ICC, ibasura

ni Mylene Alfonso @News | May 18, 2026

Photo: Donald J. Trump - FB

Hiniling ng Office of the Solicitor General sa Korte Suprema na ibasura ang petisyon ni Senador Ronald “Bato” dela Rosa laban sa warrant of arrest na inisyu ng International Criminal Court.

Nauna rito, naghain si Dela Rosa ng urgent manifestation noong Mayo 11 na nagsasabing maaari nang magdesisyon ang korte sa isyu dahil nakumpirma na ang pagkakaroon ng ICC warrant.

Hindi naglabas ng temporary restraining order ang Korte Suprema at sa halip ay humingi ng komento sa mga ahensya ng gobyerno na sangkot sa pag-aresto kay dating Pangulong Rodrigo Duterte noong Marso 2025, kabilang ang Office of the Executive Secretary, Ombudsman, Department of the Interior and Local Government at Philippine

National Police.

Solicitor General Darlene Berberabe

Tinukoy ng warrant of arrest ng ICC si Dela Rosa bilang “co-perpetrator” sa kasong crimes against humanity laban kay Duterte kung saan libu-libong pagkamatay ang naitala sa war on drugs noong panahon ng kanyang pagkapangulo.

Ang OSG, na kumatawan sa mga opisyal ng gobyerno, ay nangatwiran na ang Republic Act 9851 ang Philippine Act on Crimes Against International Humanitarian Law, Genocide, and Other Crimes Against Humanity ay nagpapahintulot sa gobyerno na ipatupad ang warrant of arrest ng ICC nang hindi nangangailangan ng validation ng korte ng Pilipinas.

Inulit din ng solicitor general na ang kaso ni Dela Rosa ay hindi sakop ng extradition rules, na binanggit na ang isang ICC surrender kung saan ang estado na naghahatid ng isang tao sa korte ay naiiba sa extradition, na nasa pagitan ng estado.

Iginiit din ng OSG na ang parliamentary immunity na sinasabing nagbibigay-proteksyon kay Dela Rosa laban sa pag-aresto ay naaangkop lamang sa mga kasong may kaparusahang hindi hihigit sa anim na taong pagkakakulong.

Ang crimes against humanity sa ilalim ng Article 7 ng Rome Statute ay may kaparusahang habambuhay na pagkakabilanggo, habang ang Republic Act No. 9851 naman ay nagpapataw ng parusang mula reclusion temporal hanggang reclusion perpetua.

Matapos ang putukan... Bato, wala na sa Senado

ni Mylene Alfonso @News | May 15, 2026

Photo: Sen. Ronald Bato Dela Rosa / Atty. Israelito Torreon - Facebook

Kinumpirma ni Senate President Alan Peter Cayetano na wala na sa loob ng Senado si Senador Ronald “Bato” dela Rosa para umano sa kaligtasan ng lahat.

“Long story short, the sergeant-at-arms confirmed that he’s no longer in the building. I’m waiting for the complete incident report, on what time he left,” wika ni Cayetano sa press conference.

Ayon sa pangulo ng Senado, base sa impormasyon mula sa Senate secretariat, umalis si Dela Rosa sa Senado, alas-2:30 ng madaling-araw, matapos ang naganap na barilan.

Kaugnay nito, ibinunyag ni Cayetano na nakausap niya ang misis ni Dela Rosa na nagpasalamat sa kanya at sa iba pang senador para sa lahat ng suportang ibinigay nila kay Dela Rosa.

Binasa rin ni Cayetano ang text message ng asawa ni Dela Rosa, na umaasa umanong hindi sasayangin ng 13 miyembro ng majority bloc ng Senado ang “sakripisyo” ng senador.

“I’d also like to ask for forgiveness for all the confusion and havoc it has created in the Senate,” ayon sa mensahe.

“It is for this reason, I am sure that Ronald made his ‘escape.’ He told me, habang tumatagal kasi siya diyan sa loob ay mas nadadamay pa kayo. Alam naming hindi lulusubin ng NBI at CIDG and police o sino pang mga militar ang Senate kung wala siya sa loob. Kaya kahit na gaano siya ka-safe d’yan ay mas nangibabaw pa rin para sa kanya ang safety ng lahat,” saad pa niya.

Ayon sa misis ni Dela Rosa, napagkasunduan nila na mananatili ang senador sa Senado dahil mas ligtas siya roon, lalo na’t pinagkokomento ng Korte Suprema ang ilang opisyal ng Ehekutibo sa loob ng 72 oras kaugnay sa petisyon nitong harangin ang warrant of arrest laban sa kanya mula sa International Criminal Court (ICC).

“Nagulat at natakot na lang kami for his safety nu’ng narinig namin nasa labas na siya. Wala sa plano but knowing him, I am sure he took the opportunity nu’ng nagkaguluhan at nagkaputukan na,” ayon pa sa mensahe.

Nauna nang isinailalim si Dela Rosa sa Senate protective custody simula noong Lunes matapos subukan ng mga ahente ng National Bureau of Investigation na magsilbi ng warrant of arrest na may kinalaman sa ICC laban sa kanya.

Nahaharap si Dela Rosa sa warrant of arrest mula sa ICC kaugnay ng imbestigasyon nito sa war on drugs na inilunsad ni dating Pangulong Rodrigo Duterte, na kasalukuyang nakakulong sa international tribunal sa The Hague.