CIDG at NBI, sumalakay sa iba-ibang lugar... Walang Bato

ni Jeff Tumbado @News | May 28, 2026

Photo: Ang bahay ng umano'y tiyuhin ni Sen. Robinhood Padilla sa Brgy. Balibago, Angeles City, Pampanga na sinalakay ng mga tauhan ng National Bureau of Investigation at PNP-Criminal Investigation and Detection Group kung saan nagtatago umano si Sen. Ronald 'Bato' dela Rosa. (Jeff Tumbado)

Sinalakay ng mga tauhan ng National Bureau of Investigation at PNP-Criminal Investigation and Detection Group ang isang bahay sa loob ng subdivision kung saan pinaghihinalaang nagtatago si Senador Ronald "Bato" dela Rosa.

Miyerkules ng umaga nang palibutan ng mga awtoridad ang bahay sa Brgy. Balibago, Angeles City, Pampanga subalit nabigong matagpuan ang senador.

Sa panayam ng media kay Brgy. Chairman Joseph Ponce, ang nagmamay-ari ng nasabing bahay ay si Lakay Cariño, na sinasabing tiyuhin ni Sen. Robin Padilla.

“Akala ng mga imbestigador na habang bumabiyahe mula sa Senado si Senator Bato, lumipat siya sa pick-up truck ni Sir Lakay Cariño. Kaya pinasok nila ang bahay nito,” paliwanag ni Ponce.

Ayon pa kay Ponce, sinabi umano ni Cariño noong nakaraang linggo na may ilang tauhan ng CIDG na nagtatanong tungkol sa kanya sa homeowners’ association.

“Dahil doon, sinabi niya sa akin na babalik muna siya sa Maynila, kaya wala na roon ang pick-up truck at alam kong wala talaga,” dagdag nito. Ipinaliwanag din ni Ponce na si Cariño ang kanyang security consultant at presidente ng senior citizens group ng subdivision.

Samantala, bukod sa Angeles City, nagsagawa rin ng operasyon ang mga tauhan ng CIDG at NBI sa Parañaque City at Bulacan nitong Miyerkules.

Baste sa ICC warrant vs. Bato: May kasama na 'yung tatay ko doon

ni BRT @News | May 25, 2026

Photo: Rage Coalition - FB Ronald Del Rosa

Malungkot na masaya si Davao City Mayor Baste Duterte kaugnay ng arrest warrant ng International Criminal Court (ICC) laban kay Senator Ronald “Bato” dela Rosa.

Sa isang event ng “Rage Coalition” sa Mindanao nitong Sabado, nagbiro si Baste tungkol sa posibilidad na maipadala rin si Bato sa ICC sa The Hague, Netherlands kung saan nakakulong ngayon si dating Pangulong Rodrigo Duterte.

“Tingnan n'yo anong nangyari sa Senate. Nagputukan. Gusto na naman nila kunin si Bato, ipadala doon sa ICC. Nalungkot ako. At the same time, medyo masaya rin kasi may kasama na ‘yung tatay ko doon, if ever that will happen. It’s a bad joke. It’s a bad joke,” ani Baste.

Ang biro ni Baste ay kasunod ng lumalakas na posibilidad ng ICC arrest laban kay Bato matapos ibasura ng Supreme Court ang hiling nitong TRO.

Kabilang si Dela Rosa sa mga tinukoy na co-perpetrators sa war on drugs ni Duterte. Patuloy rin ang pagtugis sa kanya ng mga otoridad.

Bato, armado at mapanganib — NBI

ni Mylene Alfonso @News | May 24, 2026

Photo: File / Ronald Bato Dela Rosa

Itinuturing ng National Bureau of Investigation (NBI) bilang “armed and dangerous” si Senador Ronald “Bato” dela Rosa.

Ito ang inihayag ni NBI Chief Melvin Matibag sa gitna pa rin ng patuloy na paghahanap ng ahensya kay Dela Rosa upang isilbi ang arrest warrant na inilabas ng International Criminal Court (ICC).

“It’s our standard protocol that if we’re doing an operation or locating a fugitive from justice, our presumption is that they’re already armed and dangerous,” tugon ni Matibag nang tanungin kung itinuturing na ng ahensya si Dela Rosa na “armed and dangerous” sa isinagawang news forum.

Nabatid na hanggang ngayon ay hindi pa rin matukoy ang kinaroroonan ng senador ngunit nananatili pa rin aniya sa bansa.

Noong Mayo 11 nang kumpirmahin ng ICC ang arrest warrant kay Dela Rosa para sa kasong crimes against humanity kaugnay ng war on drugs.

“The International Criminal Court confirms that the document published by national authorities of the Republic of the Philippines and circulated in media is indeed a formal ICC document,” saad ng tribunal.

“This arrest warrant against Mr Ronald Marapon Dela Rosa was issued confidentially, under seal, by Pre-Trial Chamber I of the ICC on 6 November 2025,” dagdag pa nito.

Matatandaang kamakailan, sinabi ni Department of Justice (DOJ) Sec. Fredderick Vida, na maituturing na “fugitive” o takas sa batas si Dela Rosa.