20 yrs. kulong, P3M multa sa nagsinungaling sa Kongreso

ni Mylene Alfonso | May 31, 2023

Isinusulong ni Senador Robinhood "Robin" C. Padilla ang panukalang batas na may parusang 20 taong kulong laban sa military and uniformed personnel (MUP) na hindi magsasabi ng totoo sa imbestigasyon ng Kongreso upang mapanatili ang tiwala ng publiko sa mga institusyon ng gobyerno lalo na ang pulis, militar at ibang uniformed services.

Inihain ni Padilla ang Senate Bill 2265 matapos na-cite in contempt ang mga pulis na hindi nagsabi ng totoo ng mga senador na nag-iimbestiga sa umano'y pagkasangkot ng ilang pulis sa droga.

Paparusahan ng panukalang batas ang empleyado ng gobyerno na gagawa ng maling pahayag sa imbestigasyon na ginagawa ng Kongreso bilang bahagi ng oversight function o sa paggawa ng batas.

Kulong naman na hanggang 10 taon ang naghihintay sa empleyado ng gobyerno na magbibigay ng maling pahayag partikular tungkol sa mga krimen tulad ng rape (RA 7659); Title 7 (crimes committed by public officers) of Act No. 3815; and violations of the Government Procurement Act; National Internal Revenue Code; Tariff and Customs Code; Anti-Agricultural Smuggling Act of 2016; Anti-Graft and Corrupt Practices Act; Revised Corporation Code; Anti-Money Laundering Act of 2001; Dangerous Drugs Act of 2002; Anti-Trafficking in Persons Act of 2003; Anti-Terrorism Act of 2020; Terrorism Financing Prevention and Suppression Act of 2012; at Omnibus Election Code.

Ang parusang 20 taong kulong ay para sa mga lumabag na miyembro ng Armed Forces of the Philippines (AFP), Philippine National Police (PNP), Philippine Coast Guard (PCG), Bureau of Fire Protection (BFP), Bureau of Jail Management and Penology (BJMP), Bureau of Corrections (BuCor), National Mapping and Resource Information Agency (NAMRIA), National Bureau of Investigation (NBI), Philippine Drug Enforcement Agency (PDEA), ibang law enforcement agencies, Bureau of Immigration, Bureau of Internal Revenue, at Bureau of Customs.

Naghihintay din ang multa na P3 milyon, kasama ang pagbabawal na magkaroon ng puwesto sa pamahalaan ang sinumang lalabag dito.

Sen. Robin, nag-resign bilang Executive VP ng PDP-Laban

ni Mylene Alfonso | May 31, 2023

Nagbitiw si Senador Robinhood "Robin" C. Padilla sa kanyang puwesto bilang executive vice president ng Partido Demokratiko Pilipino-Lakas ng Bayan (PDP-Laban) upang tiyaking mas epektibo niyang magaganap ang kanyang tungkulin bilang halal na mambabatas.

Ayon kay Padilla, inihain niya ang hindi na mababawing pagbibitiw o irrevocable resignation kahapon bagama't mananatili siyang aktibong miyembro ng partido.

Mulat umano siya na mabigat ang mandato niya bilang senador at mas nararapat na maging EVP ng partido ang makapaglalaan ng buong oras para sa responsibilidad nito.

Death penalty sa taga-Customs, AFP at PNP na sangkot sa smuggling — Sen. Robin

ni Mylene Alfonso | May 19, 2023

Isinusulong ni Senador Robinhood "Robin" Padilla ang parusang kamatayan para sa mga taga-Bureau of Customs, Armed Forces of the Philippines at maging sa Philippine National Police na sangkot sa smuggling partikular ang agricultural smuggling, na aniya'y nakaapekto nang masama sa kabuhayan ng mga magsasakang Pilipino.

Sa pamamagitan ng kanyang Senate Bill 2214, nais ni Padilla na amyendahan ang Section 4 ng Republic Act 10845 o ang Anti-Agricultural Smuggling Act of 2016, kung saan papatawan ng parusang kamatayan ang naturang krimen.

Sa pagdinig ng Senate Committee on Agriculture, Food and Agrarian Reform nitong Huwebes, iginiit ni Padilla na masakit isipin na ang nakakapahamak sa mga Pilipino ay ang mga inatasang magpapatupad ng batas.

"Magsasaka ang mga nahihirapan dito, kabuhayan ng mahihirap na tao. Agricultural country tayo, sinasabing agricultural country tayo pero nag-i-import tayo, di ba nakakahiya yan? Law enforcement kayo. Pinamumugaran tayo ng smuggling. Sa tingin n'yo ba masaya ako na life imprisonment lang kayo?" aniya sa taga-BOC na dumalo sa pagdinig.

Binanggit pa ni Padilla na naghain na siya ng Senate Bill 2042 na papataw ng parusang kamatayan sa security personnel na sangkot sa murder, balak niyang maghain ng panukalang batas na ang mga taga-BOC na mapapatunayang involved sa smuggling ay "dapat kamatayan din" ang parusa.

Ipinunto ng senador na kung hindi malulutas ang nasabing problema, hindi matatapos ang problema ng pagkakaroon ng rebelde.

"Meron tayong pag-uusap sa kapayapaan para mawala ang rebelde. Paano naman mawawala ang rebelde kung pinapahirapan naman natin ang magsasaka? Para tayong naglolokohan sa bansa na ito. Kaya po sana mga mahal kong kababayan magtulung-tulong tayo sa usaping ito," dagdag pa niya.