Sekyu utas sa riding-in-tandem

ni Levi GOnzales @News | October 12, 2026

Photo: File

Patay ang isang 49-anyos na guwardiya matapos pagbabarilin ng mga hindi pa nakikilalang suspek habang binabagtas ang Maharlika Highway sa Brgy. Lagalag, Tiaong, Quezon.

Kinilala ang biktima na si alyas Bok, ng nasabing barangay.  

Alas-5:20 ng hapon, patungo sana sa kanyang pinagtatrabahuhan ang biktima nang dumating ang mga suspek at ilang ulit siyang pinaputukan saka nagsitakas.

Patuloy ang imbestigasyon ng pulisya upang matukoy ang pagkakakilanlan at motibo ng mga suspek.

2 niratrat ng riding-in-tandem sa gas station

by Jeff Tumbado @News | October 11, 2026

Photo: Circulated

Patay ang dalawang sakay ng pickup truck matapos silang pagbabarilin ng hindi pa nakikilalang mga salarin habang nagpapakarga ng gasolina sa Brgy. Nanyo, Panabo City, Davao Del Norte Biyernes ng hapon.

Pawang mga lalaki ang biktima na tinatayang nasa edad 40 ang driver habang nasa 50 ang pasahero nito.

Batay sa inisyal na imbestigasyon, ala-1 ng hapon nang mangyari ang insidente sa isang gasolinahan sa nabanggit na barangay.

Sinasabing magpapakarga pa lang sana ng gasolina ang mga biktima nang sumulpot sa likuran ang isa sa mga sakay ng motorsiklo saka sila pinagbabaril.

Patuloy ang imbestigasyon upang matukoy ang mga salarin at ang motibo sa pamamaslang.

SK candidate, binaril sa ulo, dedo

ni Angela Fernando - Trainee @News | October 19, 2023

Patay ang isang 23-anyos na estudyante na kinilalang si Mark Allen Tacbobo na tumatakbo bilang kagawad sa nalalapit na barangay elections matapos paulanan ng bala sa Initao, Misamis Oriental nitong Lunes, Oktubre 16.

Sa isang panayam kay Misamis Oriental Provincial Police Office Spokesperson Lieutenant Theofratus Pia, sinabi nito na ayon sa impormasyong kanilang nakalap, binaril ang biktima sa ulo ng dalawang hindi kilalang armadong suspek na sakay ng motorsiklo.

Nagtamo ng tatlong tama ng bala ng baril si Tacbobo na kumitil sa kanyang buhay.

Ngayon ay pinaghahanap pa rin ang mga suspek na agad namang nakatakas matapos ang insidente.