P5 bawas-presyo sa bigas

ni Mai Ancheta @News | September 22, 2023

Bumaba na ang presyo ng bigas sa ilang lugar sa Metro Manila dahil dumadami na ang supply.

Ayon sa mga tindera ng bigas sa Pasig Megamarket, bumaba ng hanggang P300 ang presyo ng kada sako ng bigas kaya nagbaba rin ng presyo sa kanilang presyo ng hanggang P5 kada kilo.

Ang pagdami ng supply ng bigas ay dahil panahon na ng anihan ng palay kaya marami na ang naibabagsak sa mga palengke.

Matatandaang nagpatupad ng price ceiling sa bigas ang gobyerno nitong unang linggo ng Setyembre dahil sa mataas na presyoat hindi pa matatag ang supply.

Pero sinabi ng gobyerno na pansamantala lamang ang price cap at aalisin din ito sa sandaling maging matatag na ang supply sa bansa.

Inalis na rin ng mga rice retailer ang limitasyon sa pagbebenta ng regular milled at well-milled rice na tig-isang kilo lamang para mas marami ang makabili ng P41 at P45 kada kilo na itinakda sa price cap.

Utos ni P-BBM.. Habambuhay kulong vs. smugglers, hoarders

ni Mylene Alfonso @News | September 22, 2023

Sinertipikahan na ni Pangulong Ferdinand Marcos, Jr., bilang urgent ang panukalang batas na tumutukoy na krimen ang agricultural economic sabotage, pagbibigay ng mga parusa, at paglikha rin ng isang anti-agricultural economic sabotage council.

Ito ay sa pamamagitan ng isang liham na ipinadala ni Pangulong Marcos kay Senate President Juan Miguel Zubiri bilang patunay sa agarang pag-apruba sa Senate Bill No. 2432 nitong Miyerkules.

Ang panukalang batas ay nagpapawalang-bisa sa Republic Act No. 10845, o ang Anti-Agricultural Smuggling Act of 2016, at layuning isulong ang produktibidad ng sektor ng agrikultura at protektahan ang mga magsasaka at mangingisda mula sa mga walang prinsipyong mangangalakal at importer at tiyakin ang makatwiran at abot-kayang presyo ng agrikultura at pangisdaan mga produkto para sa mga mamimili.

Ang panukalang batas ay nagpapataw din ng matinding parusa sa mga karumal-dumal na gawain ng smuggling, hoarding, profiteering, at cartel ng mga produktong pang-agrikultura at pangisdaan, kabilang ang parusang habambuhay na pagkakakulong at multang tatlong beses ang halaga ng mga produktong agrikultural at pangisdaan na paksa ng krimen bilang economic sabotage.

Ang sinumang opisyal o empleyado ng gobyerno na mapatunayang kasabwat sa paggawa ng krimen ay dapat “magdusa ng karagdagang mga parusa ng walang hanggang diskwalipikasyon sa paghawak ng pampublikong katungkulan, paggamit ng karapatang bumoto, mula sa paglahok sa anumang pampublikong halalan, at pagkawala ng trabaho sa pananalapi at benepisyo,” nakasaad sa panukalang batas.

Kapag ang nagkasala ay isang juridical person, ang kriminal na pananagutan ay dapat ilakip sa lahat ng mga opisyal na may kinalaman sa desisyon na humantong sa paggawa ng krimen, na may parusang perpetual absolute disqualification kung saan may kinalaman sa importation, transportation, storage and warehousing at domestic trade ng agricultural at fishery products.

May karapatan din ang mga awtoridad ng gobyerno na kumpiskahin ang mga produktong pang-agrikultura at pangisdaan na napapailalim sa mga ipinagbabawal na gawain at ang mga ari-arian na ginamit sa paggawa ng agricultural economic sabotage kabilang ang ngunit hindi limitado sa vehicles, vessels, aircrafts, storage areas, warehouses, boxes, cases, trunks, at iba pang container na ginamit bilang sisidlan ng mga agricultural and fishery products.

Nabatid na ang nabanggit na panukala ay kabilang sa pinalawak na Common Legislative Agenda na tinalakay sa ikatlo o 3rd LEDAC Meeting.

Nakabinbin ngayon ang panukalang batas sa panahon ng interpellations sa Senado, habang ang isang Technical Working Group ay kasalukuyang tinatapos ang bersyon ng House of Representatives.

P20/kilong bigas, ubra pa — Marcos

ni Mylene Alfonso @News | September 20, 2023

Ikinukonsidera ni Pangulong Ferdinand Marcos, Jr. na maaari pa ring bumaba ang presyo ng bigas hanggang P20 kada kilo sa kabila ng El Niño at iba pang usaping pang-agrikultura.

Nang tanungin kung posible pa ang kanyang pangako sa kampanya, tugon ng Pangulo, “May chance lagi ‘yan”.

Ngunit sinabi ni Marcos na mahalagang ayusin ang produksyon ng bigas at iba pang mga isyu, lalo na ang mga natural na kalamidad sa bansa na nakakabawas sa ani ng palay.

Sa kanyang talumpati, isinisisi ni Marcos ang mataas na presyo ng bigas sa mga karatig bansa sa Asya na nagpalaki ng kanilang buffer stock.

Iniugnay din ng Pangulo ang mataas na halaga ng pangunahing bilihin ng mga Pilipino sa mga rice hoarders at price manipulators kung saan inatasan niya ang Bureau of Customs na paigtingin ang pag-monitor sa mga sa imported na bigas.

Nauna nang sinabi ng National Economic Development Authority (NEDA) na ang P20 kada kilo na target ay posible pa rin kung bubuti ang agriculture productivity.