Electrify, magilas sa largahan ng Turf

ni Green Lantern @Renda at Latigo | February 13, 2023

Nagpakitang-gilas si Electrify matapos manalo sa PHILRACOM Rating Based Handicapping System na inilarga sa Metro Turf, Malvar sa Tanauan City, Batangas, kahapon.

Sinalya ni Yson Bautista, inirehistro ni Electrify ang impresibong tiyempong 1:26.4 sa 1,400 meter race sapat upang hamigin ng winning horse owner na si JA Regala ang P10,000 added prize.

Dumating na segundo si Super Master, tersero si Jean Genie habang pumang-apat si Serafina.

Samantala, ginulat ni Illusion ang mga liyamadista matapos manalong dehado sa 3-Year-Old & Above Maiden race na inilarga noong Sabado sa parehong lugar.

Ginabayan ni Jomer Estorque, ipinuwesto nito si Illusion sa pang-apat subalit sa far turn ay nakalapit na ang winning horse sa unahan.

Nakasunod si Illusion sa bumanderang Sky Lover pagpasok ng hometurn kaya bakbakan ang naging labanan sa rektahan. Lumampas si Illusion kay Sky Lover sa huling 75 meter ng karera at nanalo ito ng may isang kabayo ang agwat.

Inilista ni Illusion ang tiyempong 1:27.8 minuto sa 1.400 meter race sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Sumegundo si Sky Lover, tersero si Frizmatic habang pumang-apat si Jewel Of The Nile.

Abangers ang karerista kay Tell Bell sa 3-YO

ni Green Lantern @Renda at Latigo | February 12, 2023

Inaasahang bantay sarado si Tell Bell sa magaganap na 3-Year-Old Maiden Stakes Race na ilalarga sa Metro Turf, Malvar - Tanauan City sa Batangas, ngayong araw.

Ito'y dahil pinapatok ng tatlong karera tipsters ng programa ang kalahok na si Tell Bell paglarga ng nasabing race.

Rerendahan ni former Philippine Sportswriters Association, (PSA) Jockey of the Year awardee Jonathan Basco Hernandez, makakatagisn ng bilis ni Tell Bell sina Prime Billing, Grandi Moments, Melania, Song Bird at Glamour Girle.

Nakalaan ang P1.2-M premyo na ikakalat sa unang apat na kabayong tatawid sa meta sa distansiyang 1,400 meter race.

Suportado ng Philippine Racing Commission, (PHILRACOM) sa pamumuno ni chairman reli De Leon, hahamigin ng mananalong kabayo ang P720,000, mapupunta sa second placer ang P270,000 habang tig-P150,000 at P60,000 ang third at 4th ayon sa pagkakasunod.

Sa pangalawang race pakakawalan ang bakbakan ng anim na tigasing kabayo, paniguradong magandang laban ang kanilang masisilayan.

"Baka mapalaban si Tell Bell iba ang takbuhan sa trial race kaya pipili ako ng dehado sa laban na yan," saad ni Victor Cardenas, veteran karerista.

Samantala, may 10 races ang ilalarga ngayong araw ng Linggo kaya asahang masisiyahan ang mga karerista sa kanilang paglilibang.

Sakalam, mahusay sa 3-YO Maiden Race

ni Green Lantern @Renda at Latigo | February 11, 2023

Ipinakita ni Sakalam ang kanyang husay matapos manalo sa 3-Year-Old & Above Maiden Race na inilarga sa Metro Turf, Malvar, Tanauan City, Batangas noong Miyerkules ng gabi.

Sinakyan ni former Philippine Sportswriters Association, (PSA) Jockey of the Year awardee Patricio Ramos Dilema, inirehistro ni Sakalam ang tiyempong 1:13 sa 1,200 meter race.

Sinunggaban agad ng anak nina Sakima at Don't Tell Ella na si Sakalam ang unahan sa largahan pero kinapitan siya ni Top Of The Line.

Hindi nakitaan ng kahinaan si Sakalam kahit hanggang rektahan siya binubuliglig ni Top Of The Line.

Sa huling 150 metro ng karera ay iniwanan na ni Sakalam ang makulit na si Top Of The Line para tawirin ang meta ng may dalawang kabayo ang agwat.

Dumating na tersero si Marikit habang pumang-apat si Kingwash Pogi Bato na ginabayan ni apprentice rider MP Canete sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Sinilo ni jockey Dilema ang back-to-back wins nang gabayan niito si Oktubre Katorse sa PHILRACOM Rating Based Handicapping System na pinakawalan sa Race 2.

Inilista ni Oktubre Katorse ang impresibong tiyempo na 1:11 minuto sa 1,200 meter race sapat upang hamigin ang P10,000 added prize para sa winning horse owner.

Nagbigay ng dibidendong P28.50 kada limang pisong taya sa daily double sa kombinasyong Sakalam-Oktubre Katorse (4/5).