Chrome Bell at Petron lalarga sa 3-YO Maiden Race

ni Green Lantern @Renda at Latigo | March 8, 2023

Ilang tulog na lang at makikilatis ang husay nina Chrome Bell at Petron sa paglarga ng 2023 PHILRACOM 3-Year-Old Maiden Stakes Race sa darating na Linggo sa Metro Turf, Malvar - Tanauan City sa Batangas.

Inaasahang magandang laban ang masisilayan ng mga karerista dahil may 14 na kabayo ang posibleng magtagisan ng billis sa distansiyang 1,400 meter race.

Gagabayan ni former Philippine Sportswriters Association, (PSA), Jockey-of-the-Year awardee Jonathan Basco Hernandez si Chrome Bell habang si class A rider Jeffrill Tagulao Zarate ang rerenda kay Petron.

May nakalaan na garantisadong P1.2-M premyo na ikakalat sa unang kabayong tatawid sa meta sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Ang ibang nagsaad ng pagsali ay sina Barrowed Heaven, Destin Guest, Easy Way, I Under Oath, Kanyon For Freedom, Pay D Lady, Runway Ten, Save My Savings, The Alpha Male, Uncle Vhines, Whamos at WolfGang.

Kukubrahin ng mananalong kabayo ang P720,000, mapupunta sa second placer ang P240,000 habang tig-P120,000, P60,000, P36,000 at P24,000 ang sa third hanggang sixth ayon sa pagkakahilera.

Hahamigin ng breeder ng winning horse ang P60,000 habang may ibubulsa na tig-P36,000 at P24,000 ang second at third placers.

Ayon sa mga karerista, mahirap mamili ng tatayaang kabayo sa nasabing lineup ng maglalaban dahil mga dekalidad ang mga sasabak sa karera.

Kaya naman tiyak na pag-aaralan ng racing aficionados ang performances ng mga kasali upang makapili ng kanilang tatayaan.

Shastaloo, maangas sa RTHCC, Batangas

ni Green Lantern @Renda at Latigo | March 7, 2023

Nasilayan ng mga karerista ang husay ni Shastaloo matapos ipakita ang kanyang angas sa rematehan nang manalo sa 2023 PHILRACOM "Road To Henry Cojuangco Cup" na inilarga noong Linggo sa Metro Turf, Malvar - Tanauan City, Batangas.

Nagmasid sa pang-limang puwesto si Shastaloo na nirendahan ni jockey John Paul Guce, habang nasa unahan ang matulin sa largahan na si Enigmatic Linden.

Papalapit ng far turn ay kinakapitan na si Enigmatic Linden nina Treasure Hunting at Time For Glory habang gumalaw na rin si Shastaloo.

Papasok ng huling kurbada ay naagaw na ni Treasure Hunting ang unahan, nasa pangalawa si Time For Glory at naasa bandang labas si Shastaloo na malakas ang dating.

Kaya naman sa huling 150 metro ng laban sa rektahan ay naagaw na ni Shastaloo ang unahan at nanalo ito ng may pitong kabayong agwat sa pumangalawang si Time For Glory.

Inilista ni Shastaloo ang tiyempong 1:37.5 minuto sa 1,600 meter race sapat upang hamigin ang P300,000 premyo sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Nakopo ni Time For Glory ang P112,500 habang tig- P62,500 at P25,000 ang third at fourth placers na sina Runway Dreamer at Bombay Nights ayon sa pagkakasunod.

Sinungkit din ng breeder ng winning horse ang premyong P25,000 habang tig-P15,000 at P10,000 ang second at third.

Samantala, may 10 karera ang pinakawalan ng Metro Manila Turf Club Inc. (MMTCI) noong Linggo kaya masaya ang mga karerista sa kanilang pananaya.

High Society, sumikwat ng panalo sa 3-YO Race

ni Green Lantern @Renda at Latigo | March 6, 2023

Pinasaya ni High Society ang kanyang mga tagahanga matapos sikwatin ang panalo sa 3-Year-Old & Above Maiden Race na inilarga sa Metro Turf, Malvar sa Tanauan City, Batangas noong Sabado ng hapon.

Sinamantala ni class A rider O'Neal Cortez ang tulin sa largahan ni High Society upang hawakan ang unahan habang kinukulit naman sila ni Compassion na sinakyan ni Conrad Henson.

Dikdikan ang dalawang nabanggit na kabayo pero pagsapit ng far turn ay unti-unting kumakalas si High Society sa pagkakakapit sa kanya ni Compassion.

Kaya naman pagsungaw ng rektahan ay abante na si High Society ng tatlong kabayo sa umagaw ng pangalawang puwesto na si Gugma.

Walang kahirap-hirap na tinawid ni High Society ang meta sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Nilista ni High Society ang tiyempong 1:26.2 minuto sa 1,400 meter race sapat upang hamigin ang added prize na P20,000 para sa winning horse owner na si RB David.

Tatlong kabayo ang agwat ni High Society sa pumangalawang si Gugma, dumating na tersero si Modern Stroke habang pumang-apat si Cash On Hand.

Naging masaya ang mga karerista sa kanilang paglilibang noong Sabado dahil halos lahat ng pinakawalan na karera ng Metro Manila Turf Club Inc. (MMTCI) ay bakbakan ang naging labanan sa rektahan.