Mommy Caring, ratsada sa pista ng Classic Cup

ni Green Lantern @Renda at Latigo | March 23, 2023

Ipaparada sa pista si Mommy Caring para makipagtagisan ng bilis sa 2023 Philracom Classic Cup Division III na ilalarga sa Metro Turf, Malvar - Tanauan City sa Batangas sa Sabado, (Marso 25).

Inaasahang mapapahirapan si Mommy Caring bago masungkit ang korona dahil mga dekalidad na kabayo ang mga kasali sa distansiyang 1,800 meter race.

Paglalabanan ang nakalaan na P500,000 guaranteed prize na ikakalat sa unang anim na kabayong tatawid sa finish line, ang ibang makakalaban ni Mommy Caring ay sina All Too Easy, Cupid Song, Hamlet, Magna Cum Laude, Moderne Cong, Shanghai Noon at Sophisticated na rerendahan ni star jockey Jeffril Tagulao Zarate.

Gagabayan ni jockey Pabs Cabalejo si Mommy Caring sa event suportado ng Philippine Racing Commission, (PHILRACOM) sa pamumuno ni chairman Reli De Leon.

Kukubrahin ng mananalong kabayo ang P300,000, sisikwatin ng pangalawang kabayong tatawid sa meta ang P100,000, mapupunta sa third ang P50,000 habang tig-P25,000, P15,000 at P10,000 ang fourth hanggang sixth ayon sa pagkakahilera.

Mag-uuwi rin ng P25,000 ang breeder ng winning horse habang tig-P15,000 at P10,000 ang second at third.

Samantala, ilalarga kinabukasan (Linggo) ang 2023 PHILRACOM Classic Cup Division I na sasalihan ng anim na mahuhusay na kabayo.

Ang mga kasali ay sina Big Lagoon, Boss Emong, Don Julio, Gomezian, Robin Hood at Sky Shot.

Magtotobetsky at Patong-Patong, mag-uunahan

ni Green Lantern @Renda at Latigo | March 22, 2023

Magtatagisan ng bilis ang dalawa sa mahuhusay na kabayo sa Pilipinas na sina Patong Patong at Magtotobetsky sa magaganap na 2023 PHILRACOM "Classic Cup Division II sa darating na Sabado sa Metro Turf, Malvar sa Tanauan City, Batangas.

Tiyak na mapapalaban sina Patong Patong at Magtotobetsky kontra limang tigasing kabayo sa distansyang 1,800 meter race.

Nakalaan ang P750,000 guaranteed prize sa unang anim na kabayong tatawid sa meta, ang ibang kalahok ay sina Blackburn, Fortissimo, La Vie D'Or, Shining Vic at Work Bell.

Gagabayan si Patong Patong ni jockey Jomer Estorque habang si Jeffrey Bacaycay ang rerenda kay Magtotobetsky sa karerang suportado ng Philippine Racing Commission, (PHILRACOM) sa pamumuno ni chairman Reli De Leon.

Kokolektahin ng mananalong kabayo ang P450,000, mapupunta ang P150,000 sa second placer, kukubrahin ng third ang P75,000 habang sisikwatin ng fourth, fifth at sixth ang tig-P37,500, P22,500 at P15,000 ayon sa pagkakahilera.

Ibubulsa rin ng breeder ng winning horse ang P37,500 habang tig-P22,500 at P15,000 ang third at fourth.

Samantala, pakakawalan din sa nasabing araw ang Classic Division III na lalahukan ng walong matitikas na kabayo.

Ang mga kasali ay sina All Too Easy, Cupid Song, Hamlet, Magna Cum Laude, Moderne Cong, Mommy Caring, Shanghai Noon at Sophisticated na sasakyan ni star jockey Jeffril Tagulao Zarate.

Paglalabanan naman ang guaranteed prize na P500,000 kung saan P300,000 ang mapapanalunan ng mananalong kabayo.

Open Billing, nanalo sa Road to Triple Race

ni Green Lantern @Renda at Latigo | March 21, 2023

Ipinakita ni Open Billing ang kanyang tikas matapos nitong manalo sa 2023 PHILRACOM Road to Triple Crown Stakes Race na inilarga sa Metro Turf, Malvar sa Tanauan City, Batangas noong Linggo ng hapon.

Pumuwesto sa pang-anim sa largahan si Open Billing na ginabayan ni dating Philippine Sportswriters Association, (PSA), Jockey of the Year awardee Patricio Ramos Dilema habang nagtatagisan ng bilis sa unahan sina top favorite Tell Bell at Going East.

Papasok ng huling kurbada ay malakas na isinigaw ng race caller ang Open Billing na rumeremate at nagbabadyang agawin ang unahan.

Pagsungaw ng rektahan ay nakakapit na sa unahan ang anak nina Top Billing at Open Slew na si Open Billing at sa huling 150 metro ng karera ay nakaungos na ang winning horse.

Tinawid ni Open Billing ang finish line ng may dalawang kabayo ang agwat sa pumangalawang Tell Bell.

Itinala ni Open Billing ang tiyempong 1:40.8 sa 1,600 meter race sapat upang hamigin ng winning horse owner na si Benjamin Abalos Jr. ang P600,000 premyo sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Nabingwit ni Tell Bell ang second place prize na P225,000 habang tig-P125,000 at P50,000 ang third at 4th placers na Glamour Girle at Go Aydan Go ayon sa pagkakasunod.

Kinubra ng breeder ng winning horse ang P50,000 habang P30,000 at P20,000 ang ibinulsa ng second at third.

Samantala, pahinga muna si Open Billing at may ugong na inihahanda ito sa mas malaking karera.