Song Of Silver nanalo sa Turf

ni Green Lantern @Renda at Latigo | April 11, 2023

Kuminang si Song Of Silver noong Linggo ng hapon matapos ilampaso ang mga nakatunggali sa PHILRACOM Rating Based Handicapping System na nilarga sa Metro Turf, Malvar sa Tanauan City sa Batangas.

Ginabayan ni jockey MP Canete, inirehistro ni Song Of Silver ang tiyempong 1:29 minuto sa 1,400 meter race sapat upang hamigin ng winning horse owner na si WC Tan ang P10,000 added prize.

Tinawid ni Song Of Silver ang meta ng may dalawang kabayo ang agwat sa pumangalawang Adorable Felicia sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Pumangatlo si Dollarama habang pang-apat tumawid sa meta si Double Rock.

Sa kaagahan ng karera ay tinutukan ni Song Of Silver ang humahawak ng bandera na si Markees Angel pero pagsapit ng huling kurbada ay nagkapanabayan na ang dalawa at kasama na rin sa kanila si Adorable Felicia.

Nasilayan ang tikas ni Song Of Silver sa rektahan ng ungusan nito ang dehadong si Adorable Felicia para tumuloy sa meta.

Dahil sa panalo, hinangaan ng mga karerista ang husay ni Song Of Silver.

Samantala, nagsaya ang mga karerista sa inihandang karera ng Metro Manila Turf Club Inc. (MMTCI) nakaraan at tiyak na masisiyahan sila muli dahil may stakes race na pakakawalan sa darating na Linggo.

Song Bird, pinakain ng alikabok si Runway

ni Green Lantern @Renda at Latigo | April 10, 2023

Ginulat ni Song Bird ang mga liyamadista matapos nitong silatin ang magkakamping Runway Ten at This Is Your Day sa 3-Year-Old & Above Maiden Race na nilarga sa Metro Turf, Malvar sa Tanauan City, Batangas noong Sabado.

Sinakyan ni jockey Rico Suson si Song Bird, nirehistro nito ang tiyempong 1:27.4 minuto sa 1,400 meter race sapat upang hamigin ng winning horse owner na si AK Castro ang P20,000 added prize.

Tumersero si Magic Show Time, pumang-apat si Mill Run habang pang-lima si Star Of India.

Samantala, nasilayan ng mga karerista ang husay ng dehadong si Easy Does It matapos nitong manalo sa White Castle Stakes Race na nilarga sa nakaraang Linggo sa parehong lugar.

Pang-apat na lumabas sa aparato si Easy Does It na nirendahan ni jockey Jomer Estorque upang panoorin ang nasa unahan na sina Easy Way, Atomic Bomb at Cash On Hand.

Pagsungaw ng rekta ay naagaw ni Atomic Bomb na ginabayan ni former Philippine Sportswriters Association, (PSA) Jockey of the Year awardee Jonathan Hernandez ang unahan.

Pagsapit ng huling 50 metro ng karera ay biglang umungos si Easy Does It upang tawirin ang meta ng may isang kabayo ang agwat sa pumangalawang si Atomic Bomb.

"Magaling si Easy Does It sakto ang paremate ni Jomer (Estorque)," masayang saad ni Victor Villahermosa, veteran karerista.

Kinubra ng winning connections ni Easy Does It ang P900,000 premyo sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Terserong dumating si Easy Way habang pumang-apat si Cash On Hand.

Samantala, pitong karera ang inihain ng Metro Manila Turf Club Inc. (MMTCI) kahapon ng Sabado kaya naman masaya muli ang mga karerista sa kanilang pananaya.

True History, hinangaan sa 3-YO Above Maiden Race

ni Green Lantern @Renda at Latigo | April 6, 2023

Bumilib ang mga karerista sa ipinakitang tikas ni True History sa rektahan matapos angkinin ang panalo sa 3-Year-Old & Above Maiden Race na inilarga sa Metro Turf, Malvar - Tanauan City sa Batangas noong Martes ng gabi.

Sinakyan ni jockey Jegir Paano, ipinuwesto si True History sa pang-apat sa largahan pero pagsapit ng far turn ay nasa segundo na ito at unti-unting lumapit sa nangungunang Sound Of Silence.

Pagdating ng huling kurbada ay nagkapanabayan na sa unahan sina Sound Of Silence, nasa bandang labas na Bantay Sarado at True History na sa tabing balya dumaan.

Dikdikan sa unahan ang tatlong nabanggit na kabayo sa rektahan subalit sa huling 100 metro ng laban ay umunat na si True History at tinawid ang meta ng may kalahating kabayong agwat sa pumangalawang Bantay Sarado.

Inilista ni True History ang tiyempong 1:28.4 sa 1,400 meter race sapat upang hamigin ng winning horse owner na si Melaine Habla ang P20,000 added prize.

Tumersero si Sound Of Silence habang pumang-apat si Jewel Of The Nile sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Samantala, siyam na karera ang inihain ng Metro Manila Turf Club Inc. (MMTCI) noong Martes kaya nasiyahan ang mga karerista sa kanilang paglilibang.