Glamour Girle, nagpasaya ng liyamadista sa Turf

ni Green Lantern @Renda at Latigo | April 14, 2023

Todo-saya ang mga liyamadista nang manalo si Glamour Girle sa 3-Year-Old & Above Maiden Race na inilarga sa Metro Turf, Malvar sa Tanauan City, Batangas noong Miyerkules ng gabi.

Pinakawalan sa unang race, sinakyan ni jockey Jegir Paano si Glamour Girle na lumabas ng pang-lima sa largahan habang nasa unahan ang matulin na si Sound Of Silence.

Pero pagsapit ng far turn ay nasa pangalawang puwesto na si Glamour Girle kaya naman sa rektyahan ay naagaw na nito ang unahan kay Sound Of Silence.

Tinawid ni Glamour Girle ang meta ng may dalawang kabayo ang agwat sa pumangalawang Family Affair.

Inilista ni Glamour Girle ang tiyempong 1:26.6 sa 1,400 meter race sapat upang hamigin ng winning horse owner na si Melaine Habla ang P20,000 added prize.

Tumersero si Sound Of Silence habang pumang-apat si Burden Of Proof na ginabayan ni RD Raquel. Ang nasabing event ay suportado ng Philippine Racing Commission, (PHILRACOM) sa pamumuno ni chairman Reli De Leon.

Samantala, siyam na races ang ilalarga ng Metro Manila Turf Club Inc. (MMTCI) ngayong araw ng Biyernes kaya tiyak na masaya ang mga karerista sa kanilang paglilibang.

Mga Pili ni Green Lantern:

Race 1 - Ganbatte (11), Destin Guest (5), Fast And Easy (2)

Race 2 - Arimunding Munding (1), Grand Laughter (8), Sultanov (4)

Race 3 - Mommy Caring (5), Shanghai Noon (1)

Race 4 - Double Rock (8), Salugnon (5), Jack Of Clubs (2)

Race 5 - Jannanigans (7), Sweet Spot (3), Distinction/Guest Of Honor (1/1A)

Race 6 - Princess Serena (2), Action Rules (5), Bakya Mo Neneng (1)

Race 7 - Prime Time Magic (12), Galloping Ghost (11), Fortress (5)

Race 8 - Trusson (1), Rocking Bell (9), Keynote Speaker (2)

Race 9 - Raxa Bago (13), Saoirse (4), Surplus Boy (11)

La Trouppei at Going East, papalag sa Turf

ni Green Lantern @Renda at Latigo | April 13, 2023

Hindi nasisindak sina La Trouppei at Going East sa galing ni Jaguar sa karerahan kaya naman papalag ang mga ito sa magaganap na 2023 PHILRACOM Road to Triple Crown Stakes race na pakakawalan sa Metro Turf, Malvar sa Tanauan City, Batangas sa Linggo ng hapon.

Pinag-uusapan sa social media ang kalahok na sina La Trouppei at Going East na posibleng makakuha rin ng malaking suporta sa mga karerista pagtaya nila sa Off-Track betting stations (OTBs).

Rerendahan ni class A jockey Kelvin Abobo si La Trouppei habang si Andreu Villegas ang sasakay kay Going East sa event na may distansiyang 1,600 meter race.

Bukod kina La Trouppei, Going East at Jaguar ang ibang nominado sa karerang suportado ng Philippine Racing Commission, (PHILRACOM) sa pamumuno ni chairman Reli De leon ay sina Earli Boating, Easy Way, Port Kennedy, Sartorial Elegance, Secretary, Sweetie Giselle at Winner Parade.

Nakalaan na P1-M garantisadong premyo na ikakalat sa unang anim na kabayong tatawid sa meta, isa pang tinitingnan ng mga karerista na magpapakitang-gilas ay si Secretary na rerendahan ni MM Gonzales.

Hahamigin ng mananalong kalahok ang P600,000, mapupunta sa second placer ang P200,000, habang P100,000 sa tersero. Ibubulsa ng 4th hanggang 6th ang tig- P50,000, P30,000 at P20,000 ayon sa pagkakahilera.

Mag-uuwi rin ng P50,000 ang breeder ng winning horse habang tig-P30,000 at P20,000 ang second at third. Paniguradong naghahanda ng todo ang mga trainers at hinete upang puntiryahin ang inaasam na premyo.

Jaguar masusubok uli sa Triple Crown

ni Green Lantern @Renda at Latigo | April 12, 2023

Makikilatis muli ang tikas ni Jaguar pagsalang nito sa magaganap na 2023 PHILRACOM Road to Triple Crown Stakes race na ilalarga sa darating na Linggo sa Metro Turf, Malvar sa Tanauan City, Batangas.

Gagabayan ni veteran jockey Fernando Raquel Jr. si Jaguar upang subukan ang husay din ng ibang katunggaling kabayo na nagsaad ng pagsali sa distansiyang 1,600 meter race.

Nominado sa event na suportado ng Philippine Racing Commission, (PHILRACOM) sa pamumuno ni chairman Reli De Leon ay sina Earli Boating, Easy Way, Going East, La Trouppei, Port Kennedy, Sartorial Elegance, Secretary, Sweetie Giselle at Winner Parade.

Ayon sa mga komento ng karerista, posibleng magbigay ng magandang laban kay Jaguar sina La Trouppei at Going East sa karerang may nakalaan na P1-M garantisadong premyo na ikakalat sa unang anim na kabayong tatawid sa meta.

Hahamigin ng mananalong kalahok ang P600,000, mapupunta sa 2nd placer ang P200,000, habang P100,000 sa tersero.

Kukubrahin naman ng 4th hanggang sixth ang tig- P50,000, P30,000 at P20,000 ayon sa pagkakahilera. Mag-uuwi rin ng P30,000 ang breeder ng winning horse habang tig-P30,000 at P20,000 ang second at third. Inaasahang naghahanda ng todo ang trainers at hinete upang masungkit ang inaasam na premyo.