Boss Emong at Big Lagoon magkaribal sa Turf, Malvar

ni Green Lantern @Renda at Latigo | April 26, 2023

Magtatagpo sa pista ang dalawa sa mahuhusay at mahigpit na magkaribal na sina Boss Emong at Big Lagoon sa 2023 PHILRACOM Chairman’s Cup Division I na ilalarga sa Metro Turf, Malvar sa Tanauan City sa Batangas sa Linggo.

Palaging mainit ang bakbakan ng dalawang nabanggit na kabayo kapag nagtatapat ang mga ito sa pista lalo na kapag malalaking stakes race, nagpapalitan lamang ng panbalo sina Boss Emong at Big Lagoon sa tuwing maglalaban ang mga ito sa sinasalihang derby.

Kasalukuyang Presidential Gold Cup champion si Big Lagoon habang si Boss Emong ang hinirang na Philippine Sportswriters Association, (PSA) Horse of the Year.

Nakaraan lamang ay tinalo ni Boss Emong si Big Lagoon sa naganap na Classic Cup sa parehong pista kaya tiyak na hangad ng una na makabawi.

Rerendahan ni star jockey Jeffril Tagulao Zarate si Boss Emong habang si John Alvin Guce ang gagabay kay Big Lagoon sa karerang nakalaan ang P2.5M guaranteed prize na ikakalat sa unang anim na kabayong tatawid sa meta.

May distansiyang 2,000 meter race, ang ibang kalahok ay sina Ambisioso, Cam From Behind, Don Julio, Gomezian at Robin Hood sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Kukubrahin ng mananalong kabayo ang P1.5M premyo, mapupunta sa second placer ang P500,000, ibubulsa ng tersero ang P250,000 habang tig-P125,000, P75,000 at P50,000 ang fourth hanggang sixth ayon sa pagkakasunod. May hahamigin din ang breeder ng winning horse na P125,000 habang tig-P75,000 at P50,000 ang second at third.

Sky Story, nang-ismol sa PHILRACOM Turf

ni Green Lantern @Renda at Latigo | April 25, 2023

Sinisiw ng Sky Story ang mga nakatunggali matapos manalo sa PHILRACOM Rating Based Handicapping System na inilarga sa Metro Turf, Malvar sa Tanauan City sa Batangas noong Linggo ng hapon.

Umarangkada sa largahan ang Sky Story upang hawakan ang unahan pero kinapitan siya ng todo ng Oktubre Katorse. Bakbakan sa unahan, pero hindi naman napahirapan ang Sky Story dahil pagsapit ng far turn ay lumayo na ang winning horse.

Sinakyan ni jockey Conrad Henson, inirehistro ng Sky Story ang tiyempong 1:25.8 sa 1,400 meter race sapat upang hamigin ng winning horse owner na si JO Gianan ang P10,000 added prize. Pumangalawa ang Don Lucas, tersero ang Oktubre Katorse habang pumang-apat ang Port Kennedy.

Samantala, walong races ang pinakawalan ng Metro Manila Turf Club Inc. (MMTCI) noong Linggo, lahat ay suportado ng Philippine Racing Commission, (PHILRACOM) sa pamumuno ni chairman Reli De Leon.

Sa darating na Linggo tiyak na aabangan ng mga karerista ang lineup ng mga tatakbo kaya naman ngayon pa lang ay nais na nila malaman kung sino ang mga maglalaban-laban.

Runawayfromrosenot sumikwat sa Tanauan

ni Green Lantern @Renda at Latigo | April 24, 2023

Napanood ng mga karerista ang galing ni Runawayfromrosenot sa rektahan matapos sikwatin ang panalo sa Condition Race Merged na nilarga sa Metro Turf, Malvar sa Tanauan City sa Batangas noong Sabado ng hapon.

Kalmadong lumabas ng aparato si Runawayfromrosenot, pumuwesto sa pangatlo habang nagbabanatan sa unahan ang matutulin na sina Princess Mavee at The Accountant.

Hindi tinantanan ng hinete ni Runawayfromrosenot na si Ryan Base ang mga nasa unahan at ng makakita ng pagkakataon ay unti-unti na itong inilapit ang winning horse sa nagbabakbakang sina Princess Mavee at The Accountant.

Papalapit ng huling kurbada ay apat na kabayo na ang nagkakapanabayan sa unahan kasama na si Charm Campaign.

Subalit sa rektahan ay lumabas ang tikas ni Runawayfromrosenot at nanalo ito ng may kalahating kabayo ang agwat sa pumangalawang si Charm Campaign.

Inilista ng Runawayfromrosenot ang tiyempong 1:24.8 minuto sa 1,400 meter race sapat upang hamigin ang P10,000 added prize sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

"Mahusay na kabayo ang galing sa tutukan,hindi man lang nahirapan talunin ang mga nakalaban," saad ni Gabriel Infantes, veteran karerista.

Samantala, walong races ang pinakawalan ng Metro Manila Turf Club Inc. (MMTCI) kahapon ng Linggo.