Magtotobetsky, nanalo sa Chairman's Cup III

ni Green Lantern @Renda at Latigo | May 3, 2023

Nagpasiklab ang kabayong Magtotobetsky nang manalo ito sa 2023 PHILRACOM "Chairman's Cup" Division II na ginanap sa Metro turf, Malvar - Tanauan City sa Batangas noong Sabado ng hapon.

Nasa hulihan sa largahan ang Magtotobetsky, nagmasid lamang sa likuran habang nag-uubusan ng lakas sa unahan sina Gusto Mucho at Sky Shot.

Sinakyan ni veteran jockey Jeffrey Bacaycay, kampante nitong dinala si Magtotobetsky, dumiskarte at hindi nito inapura ang pagremate.

Papasok ng far turn ay unti-unti ng lumalapit sa unahan si Magtotobetsky kaya naman pagsapit ng huling kurbada ay nakadikit na ang winning horse sa bumanderang Sky Shot.

Nakapitan ni Magtotobetsky si Sky Shot sa huling 100 metro ng laban at saka inungusan upang manalo ng may tatlong kabayo ang agwat.

Inilista ni Magtotobetsky ang tiyempong 2:06.6 sa 2,000 meter race sapat upang hamigin ng winning horse owner na si Sandy Javier Jr. ang P450,000 premyo sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Nasungkit ni Sky Shot ang P168,750, habang tig-P93,750 at P37,500 ang third at fourth placers na sina Fortissimo at Blackburn ayon sa pagkakasunod.

Nakopo naman ng breeder ng winning horse ang P37,500 habang tig P22,500 at P15,000 ang second at third.

Samantala, inaasahang naghahanda na rin ang mga kabayo para sa lalahukang mas malaking karera sa mga susunod na Linggo.

Big Lagoon, sinikwat ang titulo sa Turf

ni Green Lantern @Renda at Latigo | May 2, 2023

Bumangon mula sa pagkakadapa si Big Lagoon mula matapos sikwatin ang titulo sa 2023 PHILRACOM "Chairman's Cup" na inilarga sa Metro Turf, Malvar sa Tanauan City sa Batangas noong Linggo ng hapon.

Mabilis na kumilos sa largahan si Big Lagoon, hindi nagpaiwan upang makasunod sa mahigpit na karibal na si Boss Emong na nakapuwesto sa bandang labas.

Nakipagsabayan ng bilis si Big Lagoon sa unahan kina Boss Emong at Cam from Behind sa unang dalawang daan metro ng karera.

Pagsapit ng backstretch ay nakihalo na rin si Don Julio pero makalipas ng ilang sandali ay si Big Lagoon at Boss Emong na lamang ang nagbabanatan sa unahan.

Nasilayan muli ng mga karerista ang husay ni Big Lagoon at unti-unti nitong iniiwan si Boss Emong kaya naman pagsungaw ng rektahan ay nasa dalawang kabayo na ang agwat nito sa mga nakatunggali.

Tinawid ni Big Lagoon ang finish line ng may dalawang kabayo ang bentahe sa pumangalawang si Don Julio, tersero si Boss Emong.

Dahil sa panalo, narebansehan ni Big Lagoon si Boss Emong na tumalo sa kanya noong naglaban ang dalawa sa Classic Cup noong nakaraang buwan.

Sinakyan ni jockey John Alvin Guce, inirehistro ng Big Lagoon ang tiyempong 2:04.6 minuto sa 2,000 meter race sapat upang hamigin ng winning horse owner na si Melaine Habla ang P1.5-M premyo. sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Naibulsa ni Don Julio ang P500,000 habang ang third placer na si Boss Emong ay nag-uwi ng P250,000.

The Accountant, nanalo sa Turf III

ni Green Lantern @Renda at Latigo | May 1, 2023

Napanood ng mga karerista ang galing ni The Accountant matapos nitong manalo sa 2023 PHILRACOM "Chairman's Cup" Division III na nilarga sa Metro Turf, Malvar sa Tanauan City, Batangas, Sabado ng hapon.

Humarurot sa arangkadahan si The Accountant para ungusan ang matulin na si Eazacky, makalipas ang unang 300 metro ng karera ay nahawakan ng una ang dalawang kabayong agwat sa huli.

Patuloy ang tikas sa unahan ni The Accountant pero nakaranas ito ng matinding bakbakan kina Landslide at Shining Vic pagsapit ng far turn.

Hindi naman nagpatinag sa unahan si The Accountant, kahit nakapitan ay nailayo ulit nito ang agwat sa rektahan.

Sinakyan ni former Philippine Sportswriters Association, (PSA) Jockey of the Year awardee Patricio Ramos Dilema, tinawid ng The Accountant ang meta ng may apat na kabayong bentahe sa pumangalawang Shining Vic.

Inilista ng The Accountant ang tiyempong 2:06.6 sa 2,000 meter race sapat upang hamigin ng winning horse owner na si LJ Aguila ang P300,000 premyo.

Nakopo ng Shining Vic ang P112,500 second place price habang tig-P62,500 at P25,000 ang third at fourth ang Magna Cum Laude at Tugatog ayon sa pagkakasunod.

Kinubra ng breeder ng winning horse ang P25,000 habang tig-P15,000 at P10,000 ang second at third. Ang nasabing karera ay suportado ng Philippine Racing Commission, (PHILRACOm) sa pamumuno ni chairman Reli de Leon.