Earli Boating, nanalo sa Hopeful Stakes Race

ni Green Lantern @Renda at Latigo | May 15, 2023

Hinangaan ng mga karerista si Earli Boating matapos manalo at dehado sa 2023 PHILRACOM Hopeful Stakes Race na inilarga sa Metro Turf, Malvar sa Tanauan City, Batangas noong Sabado ng hapon.

Kulelat si Earli Boating paglabas ng aparato kaya naman pinanood na lang muna nito ang mga kabayong nasa kanyang unahan.

Sinakyan ni dating Philippine Sportswriters Association, (PSA), Jockey of the Year awardee Patty Ramos Dilema si Earli Boating na mabagal ang salida sa aparato.

Umungos sa unahan si Borrowed Heaven habang nakasunod sina Grand Monarch at Boat Buying, nasa hulihan pa rin ang winning horse na si Earli Boating.

Pero pagsapit ng far turn ay lumalapit na sa unahan si Earli Boating at sa bandang labas ito dumaan.

Nagkapanabayan sina Borrowed Heaven, Rough Cut na umagaw ng unahan at Earli Boating pagdating ng huling kurbada.

Subalit sa rektahan ay sina Earli Boating at Rough Cut na ang nagbakbakan at nagwagi ang una ng ilong lang ang pagitan. Hinamig ni Earli Boating ang P900,000 premyo sa event na suportado ng Philippine Racing Commission, (PHILRACOM) sa pamumuno ni chairman Reli De Leon habang pumangalawa ang Rough Cut na kumubra ng P300,000.

Tumersero si Winner Parade na nagbulsa ng P150,000 habang pumang-apat si Grand Monarch na sumilo ng P75,000. Nakopo rin ng breeder ng winning horse ang P75,000 habang tig-P45,000 at P30,000 ang second at third ayon sa pagkakasunod.

La Trouppei at Jaguar sa Triple Crown Race

ni Green Lantern @Renda at Latigo | May 14, 2023

Magkakasubukan muli sina La Trouppei at Jaguar pagharap nila sa 2023 1st leg Triple Crown Stakes race na ilalarga sa Metro Turf, Malvar sa Tanauan City, Batangas, ngayong araw.

Nasilo ni La Trouppei ang panalo sa Road to Triple Crown nakaraang buwan pero hindi nangangahulugan na magiging madali ang laban niya ngayon dahil paniguradong naghanda ang lahat ng mga kalahok.

Bukod kay Jaguar, isa sa sinisilip ng mga karerista na magbibigay ng magandang laban ay ang magkakamping Istulen Ola at Going East.

Rerendahan ni class A rider Kelvin Abobo si La Trouppei habang si star jockey Jeffril Tagulao Zarate ang gagabay kay Jaguar sa distansiyang 1,600 meter race.

Ang ibang kalahok sa event na suportado ng Philippine Racing Commission, (PHILRACOM) sa pamumuno ni chairman Reli De Leon ay sina Gintong Hari at Easy Does It.

Nakalaan ang guaranteed prize na P3.5M na ikakalat sa unang apat na kabayong tatawid sa meta kung saan ay hahamigin ng mananalo ang P2.5M premyo.

Ibubulsa ng second placer ang P787,500 habang tig-P437,500 at P175,000 ang 3rd at 4th ayon sa pagkakasunod.

Mag-uuwi rin ang breeder ng winning horse ng P175,000 habang tig-P105,000 at P70,000 ang second at third.

Samantala, may 10 karera ang pakakawalan ng Metro Manila Turf Club Inc. (MMTCI) ngayong araw ng Linggo kaya nakatitiyak ang mga management na masisiyahan ang mga karerista sa kanilang paglilibang.

Mga Pili ni Green Lantern:

Race 1 - Double Rock (1), Meet Me In DCorner (5)

Race 2 - Civics Class (5), Asiong/Patong Patong (1/1A)

Race 3 - Magtotobetsky/Robin Hood (1/1A), Time For Glory (2)

Race 4 - La Trouppei (2), Jaguar (7)

Race 5 - Namaskar (8), You never Know/Celebrity (4/4A)

Race 6 - Electrify (1), Euroclydon (6)

Race 7 - Believe In Me (1), Arubaitosan (4), May Ten (7)

Race 8 - Sun Dance (3), Doktora (2), Work From Home (8)

Race 9 - Keynote Speaker (5), Don Lucas (3), Isla Puting Bato (7)

Race 10 - Arrogante (3), Wishful Thinking (4), Noh sen Young Yana (10)

Grand Monarch at Earli Boating sa Turf

ni Green Lantern @Renda at Latigo | May 13, 2023

Magsasanib-puwersa ang magka-kuwadrang sina Grand Monarch at Earli Boating sa magaganap na 2023 PHILRACOM 'Hopeful Stakes Race' na ilalarga ngayong araw sa Metro Turf, Malvar sa Tanauan City, Batangas.

Inaasahang mapapalaban sina Grand Monarch at Earli Boating sapagkat kasali rin ang magkakamping Boat Buying at Winner Parade sa distansiyang 1,600 meter race.

May guaranteed prize na P1.5M ang paglalabanan kung saan ay ikakalat ito sa unang anim na kabayong tatawid sa meta, rerendahan nina Conrad Henson at dating Philippine Sportswriters Association, (PSA), Jockey of the Year awardee Patty Ramos Dilema sina Grand Monarch at Earli Boating ayon sa pagkakasunod.

Ang ibang kalahok sa karerang may P900,000 na premyo sa mananalong kabayo ay sina Badboy MJ, Borrowed Heaven, Mano Po, Rough Cut, Song Bird, Sweetie Giselle at Take A Chance.

Gagabayan ni class A rider Kelvin Abobo si Boat Buying habang si John Alvin Guce ang sasakay kay Winner Parade.

Sisikwatin ng segundo puwesto ang P300,000 at P150,000 sa pangatlo habang tig-P75,000, P45,000 at P30,000 ang fourth hanggang sixth placers ayon sa pagkakahilera.

Tatanggap din ng P75,000 ang breeder ng winning horse habang tig-P45,000 at P30,000 ang second at third sa karerang suportado ng Philippine Racing Commission, (PHILRACOM) sa pamumuno ni chairman Reli De Leon. Maliban sa nabanggit na stakes race ay may iba pang malaking karera ang pakakawalan kaya inaasahang aabangan ito ng mga karerista.

Pakakawalan din ang 1st Leg ng Triple Crown series bukas, araw ng Linggo, pakakawalan ito sa parehong lugar.