KeyNote Speaker wagi sa Malvar

ni Green Lantern @Renda at Latigo | May 20, 2023

Nanalo si KeyNote Speaker sa PHILRACOM Rating Based Handicapping System noong Linggo na inilarga sa Metro Turf, Malvar sa Tanauan City, Batangas.

Hinangaan ng mga karerista ang ipinakitang husay ni KeyNote Speaker kaya naman napag-usapan ito sa social media.

Ginabayan ni veteran jockey Jeffrey Bacaycay, inirehistro ni KeyNote Speaker ang 1:26.2 minuto sa 1,400 meter race upang hamigin ang P10,000 added prize.

Dumating na segundo si King Hans, tersero si Don Lucas habang pumang-apat si Isla Puting Bato sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Si KeyNote Speaker ay anak nina Patron at Perfection at ang naghahanda rito ay si Renato Yamco.

"Aabangan ko 'yung susunod niyang takbo, tingin ko magpapanalo pa ito ng marami," saad ni Loreto Manansala, veteran karerista.

Kulelat sa largahan si KeyNote Speaker pero naging kalmado lang sa pagdadala ang hinete nitong si Bacaycay.

Nasa pang-anim ang winning horse pagsungaw ng rektahan, bakbakan ang nasilayan ng mga karerista sa huling 100 metro ng laban at nanalo si KeyNote Speaker na nguso lang ang pagitan.

Inihahanda ngayon si KeyNote Speaker sa susunod nitong sasalihan at posibleng sa isang stakes race ito isasabak.

Samantala, paniguradong masaya ang mga karerista sa lineup ng kabayong tatakbo ngayong araw ng Sabado at bukas.

Landslide sumikwat ng panalo sa Rating Based

ni Green Lantern @Renda at Latigo | May 19, 2023

Nagpasikat si Landslide noong Linggo matapos sikwatin ang panalo sa PHILRACOM Rating Based Handicapping System na inilarga sa Metro Turf, Malvar sa Tanauan City sa Batangas.

Umarangkada sa largahan si Ambisioso pero hindi siya pinalayo ni Landslide, tinutukan lang nito hanggang far turn bago nagtangkang kumapit para agawin ang unahan.

Pagdating ng huling kurbada ay nagkapanabayan na sina Ambisioso na nasa gitna, Tugatog na dumaan sa tabing balya at Landslide na nasa bandang labas.

Mainit na bakbakan ang nasilayan ng mga karerista sa rektahan dahil nagwagi si Landslide na leeg lang ang pagitan sa pumangalawang si Ambisioso.

"Ang galing talaga ni Landslide, matapang sa laban maalagaan lang ng maganda mag-uumento pa ang kanyang husay," saad ni Carlito Vasquez, veteran karerista.

Nirendahan ni Jomer Estorque, inirehistro ni landslide ang tiyempong 1:24.6 minuto sa 1,400 meter race sapat upang hamigin ng winning horse owner na si Leonardo Lavier Jr. ang P10,000 added prize.

Tersero si Euroclydon habang pumang-apat si Electrify sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Samantala, may walong karera ang ilalarga ng Metro Manila Turf Club Inc. (MMTCI) ngayong araw ng Biyernes kaya masaya na naman ang mga karerista sa kanilang pananaya.

Tiyak na maganda rin ang lineup ng mga kabayo bukas (Sabado) at sa Linggo na ikak

asa rin sa parehong lugar.

Mga Pili ni Green Lantern:

Race 1 - Nevada Scout (8), Red Hawk (3), Headstrong (2)

Race 2 - Rockaway (12), My Dad Bogart (1), Basket Of Gold (9)

Race 3 - May Ten/Arrogante (7/7A), Early Bird (5), Raxa Bago (6)

Race 4 - Since When (8), Spoiled Brat (9), Jawo (14)

Race 5 - Mano Po/Full Control (3/3A), Jean Genie (4)

Race 6 - Air Class (5), Chef Cat (7), Speak Easy (9)

Race 7 - Wild Act (5), Easy Landing (8), Amelia (2)

Race 8 - Love Radio (13), Space Jam (14),Lucky Noh Noh (1)

Triple Crown Race kay La Trouppei ang korona

ni Green Lantern @Renda at Latigo | May 16, 2023

Nasaksihan ng mga karerista ang tikas ni La Trouppei matapos nitong siluhin ang korona sa 2023 PHILRACOM "1st Leg Triple Crown Stakes Race na inilarga sa Metro Turf, Malvar sa Tanauan City, Batangas noong Linggo ng hapon.

Dahil sa tulin sa arangkadahan nina Istulen Ola at Jaguar ay pumuwesto si La Trouppei sa pang-lima upang panoorin ang bakbakan ng dalawang kabayo sa unahan.

Pagdating sa kalagitnaan ng karera ay kalmado pa rin sa pagdala ni class A rider Kelvin Abobo kay La Trouppei, nanatili sa kanilang puwesto habang apat na kabayo na ang nagbabanatan sa unahan na kinabibilangan nina Istulen Ola, Jaguar, Going East at Gintong Hari.

Pero biglang lumayo sa unahan si Istulen Ola at Jaguar pagsapit ng far turn at nasa pangatlong puwesto na rin si La Trouppei.

Kaya sa huling kurbada ay nagkapanabayan na sa unahan sina Istulen Ola, Jaguar at La Trouppei.

Sa rektahan nasilayan ng mga karerista ang husay ni La Trouppei nang ungusan nito sina Jaguar at Istulen Ola sa meta kung saan ay halos nguso lang ang agwat.

Inilista ni La Trouppei ang tiyempong 1:38.8 minuto sa 1,600 meter race sapat upang hamigin ang P2.1-M premyo sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Nakopo ni Jaguar ang second place prize na P787,500 habang ang si tumerserong Istulen Ola ay nag uwi ng P437,500. Hinamig ng winning breeder na si Melaine Habla ang P175,000 habang napunta sa second at third placers ang tig-P105,000 at 70,000 ayon sa pagkakasunod.