La Trouppei, pakabog sa Triple Crown Series

ni Green Lantern @Renda at Latigo | May 31, 2023

Nasa kukote ng connections ni La Trouppei ang sweep kaya naman nagsaad sila ng pagsali sa 2023 PHILRACOM 2nd Leg Triple Crown Stakes race.

Nagwagi si La Trouppei sa first leg nakaraan at puntirya nitong sikwatin ang pangalawang panalo upang mamuro sa asam na sweep sa event na may tatlong legs na nilalarga.

Sa Metro Turf, Malvar sa Tanauan City, Batangas pa rin ang lugar ng karera at muling makakaharap ni La Trouppei ang mahigpit nitong katunggali na sina Jaguar at Istulen Ola.

May distansiyang 1,800 meter race, ang ibang naghayag ng paglahok ay ang Earli Boating, Easy Way, Going East, Save My Savings at Secretary sa karerang nakalaan ang P3M guaranteed prize.

Kukubrahin ng mananalong kabayo ang P2.1M sa event na suportado ng Philippine Racing Commission, (PHILRACOM) sa pamumuno ni chairman Reli De Leon, ikakalat ito sa unang anim na kabayong tatawid sa meta.

Hahamigin ng second placer ang P700,000, mapupunta ang P350,000 sa pangatlong puwesto.

Mag-uuwi ng tig-P175,000, P105,000 at P70,000 ang fourth hanggang sixth ayon sa pagkakasunod.

Gagabayan ulit ni star Jockey Jeffril Tagulao Zarate si Jaguar habang si class A rider John Alvin Guce ang gagabay kay Istulen Ola. Sumegundo sa nakaraang laban ang Jaguar habang terserong tumawid ng meta ang Istulen Ola.

1-2 Finish sa Handicap kina Robin Hood at Magtotobetsky

ni Green Lantern @Renda at Latigo | May 30, 2023

Sinilo ng magkakamping Robin Hood at Magtotobetsky ang 1, 2 finish sa katatapos na PHILRACOM Rating Based Handicapping System na inilarga sa Metro Turf, Malvar sa Tanauan City, Batangas noong Linggo ng hapon.

Ginabayan ni jockey Jomer Estorque, ipinuwesto nito sa pangalawa sa largahan si Robin Hood habang nasa unahan ang matulin sa arangkadahan na si The Accountant.

Abante ng kalahating kabayo si The Accountant kay Robin Hood sa unang kurbada, nasa tersero naman si Charm Campaign at pang-apat si Runawayfromrosenot.

Umungos hanggang tatlong kabayo si The Accountant pero pagsapit ng far turn at naagaw na ni Robin Hood ang unahan at maging si Runawayfromrosenot ay rumeremate na rin.

Pagdating ng rektahan kung saan ay nangunguna si Robin Hood ng dalawang kabayo ay sumasagitsit naman ang kakampi nitong si Magtotobetsky.

Nagwagi si Robin Hood ng may limang kabayong agwat sa pumangalawang si Magtotobetsky.

Inirehistro ni Robin Hood ang 1:38.6 minuto sa 1,600 meter race sapat upang hamigin ng winning horse owner na si Leonardo Javier Jr. ang P10,000 added prize.

Segundo ang kakampi ng Robin Hood na Magtotobetsky, tersero ang Bombay Nights habang pumang-apat ang Charm Campaign sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Samantala, nagpakitang gilas din si Saoirse na PHILRACOM rating Based Handicapping System na pinakawalan sa pangatlong karera.

Dahil sa panalo, back-to-back si jockey Estorque, siya rin ang sumakay sa nanalong si Saoirse.

La Liga, nagpabilib sa Condition Race

ni Green Lantern @Renda at Latigo | May 29, 2023

Bumilib ang mga karerista sa ipinakitang tulin sa largahan ni La Liga Filipina kaya naman nasikwat nito ang panalo sa Condition Race na inilarga noong Sabado ng hapon sa Metro Turf, Malvar - Tanauan City sa Batangas.

Nakipaglutsahan muna si La Liga Filipina kay Biglang Buhos hanggang kalagitnaan ng karera at nang magbadyang kumalas ay si Top Czar naman ang nakatagisan ng bilis ng winning horse.

Subalit sa rektahan ay nakitaan ng tikas ang liyamadong si La Liga Filipina at nagwagi ito ng may tatlong kabayo ang agwat sa pumangalawang Top Czar.

Nirendahan ni jockey Andreu Villegas, inirehistro ni La Liga Filipina ang tiyempong 1:25.2 minuto sa 1,400 meter race sapat upang hamigin ng winning horse owner na si Benjamin Abalos Sr. ang P10,000 added prize.

Tumersero si Biglang Buhos habang pumang-apat si Rockstar Show sa event na inisponsoran ng Philippine Racing Commission, (PHILRACOM) sa pamumuno ni chairman Reli de Leon.

Nagpakitang-gilas din si Valued Friendship sa naganap na 3-Year-Old & Above Maiden Race na pinakawalan sa pangatlong karera.

Ginabayan ni Jomer Estorque, inilista ni Valued Friendship ang tiyempong 1:27. 8 minuto sa 1,400 meter race, nagwagi ito na isang dehado, pumangalawa si The Alpha male habang tersero si Jewel Of The Nile.

Samantala, pitong karera ang pinakawalan ng Metro Manila Turf Club Inc. (MMTCI) noong Sabado kaya naging masaya ang pangangarera ng mga karerista at kahapon ay umabot sa siyam ang nilarga.