Easy Does It wagi sa Hopeful Race

ni Green Lantern @Renda at Latigo | June 14, 2023

Nagpakitang-gilas noong Sabado ng hapon si Easy Does It na nanalo sa 2023 PHILRACOM Hopeful Stakes Race na inilarga sa Metro Turf, Malvar sa Tanauan City, Batangas.

Sinakyan ni jockey Jomer Estorque, inirehistro ni Easy Does It ang tiyempong 1:54 minuto sa 1,800 meter race sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Sinungkit ng winning horse owner ang P900,000 sa pagkakapanalo ni Easy Does It, habang napunta ang P300,000 sa pumangalawang si Glamour Girle.

Dumating na tersero si Winner Parade na humamig ng P150,000 habang sinikwat ni fourth placer BadBoy MJ ang P75,000 premyo.

Hindi rin umuwing luhaan ang fifth placer na si Chrome Bell dahil nagbulsa ito ng P45,000.

Pang-anim na lumabas sa largahan si Easy Does It at nanatili sa puwesto hanggang kalagitnaan ng karera pero sa far turn ay kumuha ito ng unahan at hindi na ito binitiwan hanggang sa meta.

Ayon sa komento ng mga karerista, maganda ang pagkakadala ni star jockey Jeffril Tagulao Zarate kay Easy Does It. "Kalmado lang si Jeff (Zarate) nag-abang lang tapos ng makakita ng pagkakataon ay saka umatake," saad ni Ben Gomez, veteran karerista.

Samantala, hinahanda si Easy Does it sa mas malaking karera para sa susunod niyang takbo kaya tiyak na inaabangan ito ng kanyang mga tagahanga.

Jaguar nanalo sa 2nd Leg Triple Crown

ni Green Lantern @Renda at Latigo | June 13, 2023

Hinangaan ng mga karerista si Jaguar matapos nitong manalo sa 2023 PHILRACOM "2nd Leg Triple Crown Stakes race na nilarga sa Metro Turf, Malvar sa Tanauan City, Batangas noong Linggo ng hapon.

Binigo ni Jaguar ang asam na sweep ng 1st leg winner La Trouppei.

Ginabayan ni star jockey jeffril Tagulao Zarate, ipinuwesto nito si Jaguar sa tersero upang panoorin ang naglulutsahan sa unahan na sina Easy Way at Going East habang kulelat si La Trouppei.

Nagbabakbakan sa unahan sina Easy Way at Going East subalit nadikitan sila ni Jaguar para agawin ang bandera sa far turn.

Papalapit ng home stretch ay apat na kabayo ang lamang ng Jaguar sa humabol na La Trouppei kaya naman sa rektahan ay nagsisigawan na ang mga nakataya sa winning horse.

Tinawid ng anak nina Dance City at Delta Gold na si Jaguar ang meta ng may tatlong kabayo ang agwat sa pumangalawang si La Trouppei, tersero si Secretary habang pumang-apat si Earli Boating.

Nasilo ng winning horse owner na si JM Arroyo ang P2.1M sa pagkakapanalo ni Jaguar sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Inirehistro ni Jaguar ang 1:51.8 minuto sa 1,800 meter race.

Nakopo ni La Trouppei ang P700,000 habang tig- P350,000 at P175,000 sina Secretary at Earli Boating ayon sa pagkakasunod.

Hinamig naman ng breeder ng nanalong kabayo na si Joseph Dyhengco ang P175,000 habang may sinikwat na P105,000 at P70,000 ang second at third.

Samantala, tiyak na naghahanda na ang ibang kabayo para sa 3rd Leg ng triple crown series.

Prime Billing, bumida sa 3-YO Local Bred Race

ni Green Lantern @Renda at Latigo | June 12, 2023

Mainit na bakbakan ang nasilayan ng mga karerista nang magwagi si Prime Billing sa 2023 PHILRACOM 3-Year-Old Locally Bred Stakes Race na nilarga sa Metro Turf, Malvar - Tanauan City, Batangas noong Sabado ng hapon.

Hinangaan ng mga karerista ang magandang diskarte ni former Philippine Sportswriters Association, (PSA) - Jockey of the Year awardee Patricio Ramos Dilema, hindi nito inapura sa alisan si Prime Billing, ipinuwesto nito sa segunda upang sundan ang humaharurot na si Sky Story.

Lamang si Sky Story ng isa't kalahating kabayo sa back stretch pero nadikitan siya ni Prime Billing pagsapit ng far turn. Nanatili sa unahan si Sky Story hanggang sa pagpasok ng huling kurbada ay hawak pa rin nito ang bandera.

Nagtagisan ng bilis sina Prime Billing at Sky Story sa rektahan at nakihalo pa ang kalahok na si Keep Da Trick pero sa huling 20 metro ng laban ay kumuha na ng unahan ang winning horse.

Tinawid ng Prime Billing ang finish line ng may isang kabayo ang agwat sa pumangalawang si Sky Story, tersero si Keep Da Trick.

Inirehistro ni Prime Billing ang tiyempong 1:54.8 minuto sa 1,800 meter race sapat upang hamigin ng winning horse owner na si Benjamin Abalos Jr. ang P600,000 premyo sa event na supportado ng Philippine Racing Commission, (PHILRACOM) sa pamumuno ni chairman Reli De Leon.

Hinamig naman ng second placer na si Sky Story ang P200,000, habang tig-P100,000 at P50,000 ang nai-uwi ng third at fourth na sina Keep Da Trick at I Under Oath ayon sa pagkakasunod.

Tinanggap naman ng winning breeder na si Mariano Tirona ang P50,000 premyo habang tig-P30,000 at P20,000 ang second at third.