Inaabangan na si Boss Emong sa Pista

ni Green Lantern @Renda at Latigo | June 21, 2023

Hindi na mahintay ng mga karerista ang muling pagtakbo ni Boss Emong sa pista.

Sari-saring komento ang mga tagahanga ni Boss emong sa social media.

Nakatakdang makipagharurutan si reigning Philippine Sportswriters Association, (PSA - Horse of the Year awardee Boss Emong sa magaganap na 2023 PHILRACOM Gran Copa De Manila Cup na pakakawalan sa Metro Turf, Malvar sa Tanauan City, Batangas sa darating na Sabado.

Nananalo sa mga malalaking stakes races, makakatagisan ng bilis ni Boss Emong ang anim na tigasing kabayo na nagsaad ng pagsali sa distansiyang 1,600 meter race.

May nakalaan na P1-M guaranteed prize na ikakalat sa unang apat na kabayong tatawid sa meta, ang ibang naghayag ng paglahok ay sina Don Julio, Gomezian, Jungkook, Life Gets Better, Robin Hood at Magtotobetsky.

Sasakyan ni star jockey Jeffril Tagulao Zarate ang Boss Emong, target nilang masilo ang premyong P600,000 habang mapupunta sa second placer ang P225,000.

Susungkitin naman ng third ang P125,000 habang P50,000 ang i-uuwi ng pang-apat na kabayong tatawid sa finish line.

Makatatanggap din ang breeder ng winning horse ng P50,000, habang P30,000 sa second at P20,000 sa third sa karerang suportado ng Philippine Racing Commission, (PHILRACOM) sa pamumuno ni chairman Reli De Leon.

Paniguradong pinag-aaralan na rin ng mga karerista ang mga tatayaang kabayo lalo na ang mga dehadistang napipili ng kabayong kalaban ng Boss Emong.

Samantala, maliban sa nabanggit na stakes race, maglalarga rin ang Metro Manila Turf Club Inc. (MMTCI) ng ilang regular races para mapasaya ang mga karerista sa kanilang paglilibang.

Matikas si Angry Maxinne sa 3-YO Turf Maiden Race

ni Green Lantern @Renda at Latigo | June 20, 2023

Sinikwat ni Angry Maxinne ang panalo sa 3-Year-Old & Above Maiden race noong Linggo sa Metro Turf, Malvar sa Tanauan City, Batangas.

Hindi nag-apura sa paglabas ng aparato si Angry Maxinne, pumuwesto sa tersero upang panoorin ang naglulutsahan sa unahan na Keep The Jade at Little Annie.

Nanatili sa puwesto si Angry Maxinne hanggang sa pagsapit ng home stretch subalit sa rektahan ay nasilayan ng mga karerista ang tikas ng winning horse sa rematehan.

Nakuha ni Angry Maxinne ang unahan sa huling 150 metro ng karera, tinawid nito ang meta ng may dalawang kabayo ang agwat sa pumangalawang si Sky Lover.

Nirendahan ni star jockey Jeffril Tagulao Zarate, inilista ng Angry Maxinne ang tiyempong 1:10. 6 sa 1,000 meter race sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

"Maganda ang diskarte sa pagkakadala ni Zarate kay Angry Maxinne, timing ang paremate niya," saad ni Bernard Pablo, veteran karerista.

Nasilo ng winning horse owner na si Ng Cruz ang P20,000 added prize sa pagkakapanalo ng anak nina Telesto at Sweet Bourbon na Angry Maxinne.

Terserong tumawid ng meta ang Little Annie habang pumang-apat ang Instant Message.

Samantala, pitong karera ang pinakawalan ng Metro Manila Turf Club Inc. (MMTCI) kaya naman nasiyahan ang mga karerista sa kanilang pananaya.

Treasure Hunting panalo sa Turf Race

ni Green Lantern @Renda at Latigo | June 19, 2023

Patuloy ang pamamayagpag ni Treasure Hunting matapos nitong manalo noong Sabado ng hapon sa naganap na Condition Race (4) na nilarga sa Metro Turf, Malvar sa Tanauan City, Batangas.

Nirendahan ni class A rider John Alvin Guce, nirehistro ng Treasure Hunting ang impresibong tiyempong 1:39.60 sa 1,600 meter race sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Dahil sa panalo ng anak nina Into Mischief at Spanish Gold na si Treasure Hunting, naibulsa ng winning horse owner na si Dennis Tan ang P10,000 added prize.

Segundong dumating si Kercharmer habang tumersero si Runawayfromrosenot na sinakyan ni jockey JL Santiago. Naitala ni Treasure Hunting ang pangalawang sunod na panalo ngayong buwan ng Hunyo.

Ipinakita ng Treasure Hunting ang husay nito sa largahan matapos nitong humarurot paglabas ng aparato.

Umabante si Treasure Hunting sa unang 100 meter ng laban pero dinikitan agad ito ni Charm Campaign sa backstretch. Hindi naman binitawan ni Treasure Hunting ang unahan, nanatili itong hawak ang bandera hanggang sa rektahan.

Tinawid ng Treasure Hunting ang meta ng may apat na kabayong agwat sa pumangalawang Kercharmer.