Flamenco Dust, sinilo ang panalo sa 3-YO Race

ni Green Lantern @Renda at Latigo | June 27, 2023

Kumaripas sa rektahan si Flamenco Dust upang masilo ang panalo sa 2023 PHILRACOM "3-Year-Old & Above Maiden Race" na nilarga sa Metro Turf, Malvar sa Tanauan City, Batangas noong Linggo ng hapon.

Nirendahan ni jockey Claro S. Pare, inilista ni Flamenco Dust ang impresibong tiyempong 1:27.2 minuto sa 1,400 meter race sapat upang hamigin ang P20,000 added prize ng winning horse owner na si AV Tan.

Nasaksihan ng mga karerista ang husay ni Flamenco Dust sa rematehan matapos itong lumabas ng may kalayuan sa mga kabayong nasa unahan na sina Lagertha at Freydis Cutie.

Hawak ni Lagertha ang bandera pero nakakapit ng todo si Freydis Cutie habang pinapanood sila ng nasa malayong likuran na Flamenco Dust.

Papalapit ng home stretch ay nagpapakitang-gilas na si Flamenco Dust at sa huling isang daang metro ng karera ay lumampas na ang winning horse.

Tinawid ng Flamenco Dust ang meta ng may dalawang kabayo ang agwat sa pumangalawang si Danueis Son, tersero ang Freydis Cutie habang pumang-apat ang Lagertha sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Boss Emong at Don Julio, nagpalamon ng alikabok

ni Green Lantern @Renda at Latigo | June 26, 2023

Napanood ng mataas na pinuno ng Maynila ang husay ni Boss Emong nang sikwatin nito ang korona sa 2023 Araw ng Maynila "Gran Copa De Manila" na inilarga noong Sabado ng hapon sa Metro Turf, Malvar - Tanauan City, Batangas.

Nasa mismong karerahan siya kaya nasaksihan nito ng live ang nasabing stakes race at pagdomina ni Boss Emong sa simula pa ng karera kung saan ay hinarurot agad ng winning horse ang unahan.

"This was a collaborative effort between the city government of Manila and the PHILRACOM to make this event a very successful one. Nandito din po yung ating mga city government officials, mga department heads, mga barangay officials who came here all the way from Manila just to support the culminating event in celebration of our city's day," saad ni Mayor Honey Lacuna-Pangan.

Napahirapan ng bahagya si Boss Emong ang paghawak ng bandera dahil kinapitan siya ng Life Gets Better at binuliglig ito hanggang sa huling 800 metro ng karera.

Pero hindi natinag sa unahan ang winning horse at umungos ito ng bahagya sa far turn.

Umabot sa dalawang kabayo ang lamang ng Boss Emong sa mga kalaban nito sa homestretch kaya naman kahit malakas ang dating ng Don Julio sa rektahan ay nauna pa rin siyang tumawid sa meta.

Ginabayan ni star jockey Jeffril Tagulao Zarate ang Boss Emong, inirehistro nito ang tiyempong 1:39 minuto sa 1,600 meter race sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Kinubra ng winning horse owner na si Kennedy Morales ang P600,000 premyo sa pagkakapanalo ni Boss Emong habang P225,000 ang hinamig ng second placer na si Don Julio.

Pangatlong dumating sa finish line si Jungkook at nabingwit nito ang P125,000 na consolation.

Trainer at Hinete Pokus sa ensayo

ni Green Lantern @Renda at Latigo | June 25, 2023

Nakapokus sa ensayo ang mga trainer at hinete para ihanda ang kanilang pambatong kabayo na isasabak sa 2023 PHILRACOM 3rd Leg Triple Crown Stakes Race na ilalarga sa Metro Turf, Malvar sa Tanauan City sa Batangas sa Hulyo 16.

Wala pang mga nagsaad ng paglahok dahil hindi pa naglalabas ng opisyal na line up subalit paniguradong masisilayan muli sa pista ang mahigpit na magkaribal na sina La Trouppei at Jaguar sa event na mas pinahaba ang distansya sa 2,000 meter race.

Nagwagi sa first leg si La Trouppei habang si Jaguar ang sumikwat ng korona sa second leg kaya walang makakawalis ng Triple Crown series ngayong taon.

May nakalaan na P3.5M guaranteed prize na ikakalat sa unang anim na kabayong tatawid sa meta pero kung hindi aabot ng pitong kabayo ang sasali ay hanggang 4th place lamang hahatiin ang premyo.

Magbubulsa rin ng premyo ang breeder ng winning horse sa event na suportado ng Philippine Racing Commission, (PHILRACOM) na pinamumunuan ni chairman Reli De Leon.

Dahil sa laki ng premyo ay inaasahang puspusan ang pag-ensayo ng mga sasali upang masilo ang inaasam na panalo at mahalagang nakataya.

Samantala, pakakawalan din sa susunod na buwan ang 3-Year-Old Locally Bred Stakes Race at Hopeful Stakes Race na pareho rin ng distansya sa Triple Crown.

Kaya inaasahan din na magsasaya ng todo ang mga karerista sa araw mismo ng karera dahil sa mga stakes races na ilalarga ng Metro Manila Turf Club Inc. (MMTCI).