Coastal Road masusubok ang Barrio San Roque

ni Green Lantern @Renda at Latigo | July 7, 2023

Kikilatisin ni Coastal Road ang tikas ni Barrio San Roque pagharap nila sa PHILRACOM Rating Based Handicapping System na ilalarga sa Metro Turf, Malvar sa Tanauan City, Batangas, ngayong araw.

Sasakyan ni jockey Jegir Paano, inaasahang dodominahin ni Barrio San Roque ang bentahan sa takilya pero hindi masisindak si Coastal Road na kilala rin na may husay sa karerahan.

Gagabayan ni jockey AM Tancioco si Coastal Road at maliban kay Barrio San Roque ang ibang kasali sa nasabing karera ay sina Heaven's Gift, Prince Arman at Gee's Song.

May distansiyang 1,200 meter race, may P15,000 added prize ang ikakalat sa unang apat na kabayong tatawid sa meta habang may karagdagang P10,000 premyo ang ibubulsa ng winning horse owner.

Komento ng mga karerista sa social media, mahirap pumili kahit lima lang silang tatakbo dahil halos lahat ay malaki ang tsansang manalo.

"Lahat malaki ang tsansang manalo kaya baka mag-tatlo pa ako sa pagpili sa tatayaan ko na winner take all, (WTA)," ani Diego Martinez, veteran karerista.

Ilalarga ng Metro Manila Turf Club Inc. ang pitong balanseng karerang ngayong araw ng Biyernes lahat ay suportado ng Philippine Racing Commission, (PHILRACOM) sa pamumuno ni chairman Reli De Leon.

Samantala, atat na rin ang mga karerista sa mga stakes races na pakakawalan ngayong buwan kabilang ang 2023 PHILRACOM 3rd Leg Triple Crown Championships na ilalarga sa nasabing lugar.

Mga Pili ni Green Lantern:

Race 1 - Coastal Road (5), Barrio San Roque (4)

Race 2 - Kummander (6), Katherine (3), Markees Angel (9)

Race 3 - Lucky Julliane (7), Step Bell (3), Rise Up (1)

Race 4 - Quid Pro quo (5), Shinshiro (6)

Race 5 - Rockaway (4), Magnolia Yana (1), Kaboom (3)

Race 6 - Queen Louise (9), Big Battle (11), Great Britain (12)

Race 7 - May Ten (14), Happy Maggie (7), Bullet (3), Chef Kat (10)

Summer Brew, sakalam sa Handicapping System

ni Green Lantern @Renda at Latigo | July 6, 2023

Sinisiw ng dehadong si Summer Brew ang mga liyamadong katunggali upang sikwatin ang panalo sa PHILRACOM Rating Based Handicapping System na nilarga sa Metro Turf, Malvar sa Tanauan City, Batangas noong Linggo ng hapon.

Umarangkada agad si Summer Brew sa unahan paglabas ng aparato at hinawakan nito ang limang kabayong agwat sa mga kalaban sa backstretch.

Nirendahan ni class A rider O'Neal Cortez, walang nakasabay sa tulin ni Summer Brew kaya umabot hanggang siyam na kabayo ang bentahe nito sa pagsapit ng far turn.

Kaya naman nagkukumahog na ang mga kalaban ni Summer Brew pagdating ng rektahan kung saan ay nanatili ang malaking agwat na bentahe.

"Walang kahirap-hirap na nanalo si Summer Brew, pagsalida na nakuha ang bandera para alam mo ng tatapusin ang karera," saad ni Jerry Crisostomo, veteran karerista.

Tinawid ni Summer Brew ang meta ng may anim na kabayong agwat sa pumangalawang si Kazachan, tersero si Dambana habang pang-apat si Flattering You.

Inirehistro ni Summer Brew ang 1:39.2 minuto sa 1,600 meter race sapat upang hamigin ang P150,000 na premyo sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Nasaksihan ni horse owner Joseph Dyhengco at DLSU Class 1970 Association Inc.ng Lipa City president Mario Mamon ang nasabing magandang karera.

Samantala, malapit na rin ikasa ang 2023 PHILRACOM 3rd Leg Triple Crown na pakakawalan sa Hulyo 16.

Oradas Gray, nagpangiti sa Turf Maiden Race

ni Green Lantern @Renda at Latigo | July 5, 2023

Pinasaya ni Oradas Gray ang mga liyamadista noong Linggo ng hapon nang manalo ito sa 2023 PHILRACOM 3-Year-Old & Above Maiden Race na nilarga sa Metro Turf, Malvar - Tanauan City, Batangas.

Nilarga sa unang race, parang sibat na lumabas ng aparato si Oradas Gray upang hawakan agad ang unahan habang kalmado ang kanyang hineteng si class A rider Kelvin Abobo sa pagdadala sa kanya.

Pagsapit ng far turn ay nasa apat na kabayo na ang lamang ni Oradas Gray sa pumapangalawang Lagertha habang tersero ang Freydis Cutie.

Minani lang ni Oradas Gray ang mga katunggali lalo na ng dumating sa rektahan dahil malayo ito sa mga humahabol sa kanya kaya magaan nitong tinawid ang meta.

Ipinasa ni Oradas Gray ang 1:26 minuto sa 1,400 meter race sapat upang hamigin ng winning horse owner na si Melaine Habla ang P20,000 added prize.

Segundong dumating si Jewel Of The Nile, tersero si Golden Jaraywa habang pang-apat si Impressive Victory sa event na suportado ng Philippine Racing Commission, (PHILRACOM) na pinamumunuan ni chairman Reli De Leon.

Hinahanda ngayon si Oradas Gray sa susunod na tatakbuhin, kapag nagpatuloy ang magandang performances ay posibleng ilaban ito sa mga stakes races.

Samantala, inaabangan ng mga karerista ang mga malalaking karera na ilalarga ngayong buwan kasama na ang 3rd Leg Triple Crown Championship at Hopeful Stakes race.