Lemon Bell, panalo sa Philracom Turf

ni Green Lantern @Renda at Latigo | July 22, 2023

Nagsaya ang mga dehadista matapos sikwatin ni Lemon Bell ang panalo sa PHILRACOM Rating Based Handicapping System na nilarga sa Metro Turf, Malvar sa Tanauan City, Batangas noong Miyerkules ng gabi.

Sumalida ng maganda si Lemon Bell, walang naging aberya sa unang lundag kaya magaan na nakapuwesto sa segundo para sundan ang nasa unahan at matulin sa largahan na si Top Of The Mark.

Kumuha ng unahan si Lemon Bell bandang far turn at saka tumuloy na sa finish line ng may limang kabayo ang agwat sa pumangalawang National Treasure.

Ginabayan ni jockey Jerico Serrano ang Lemon Bell na nagtala ng tiyempong 1:13.6 minuto sa 1,200 meter race sapat upang hamigin ang P10,000 added prize.

Tumersero ang Top Of The Mark habang pumang-apat ang Indelible Quaker sa event na suportado ng Philippine Racing Commission, (PHILRACOM).

Nagbigay ng dibidendong P179.50 para sa kombinasyon sa forecast na Lemon Bell at National Treasure (2/5).

Nagwagi naman si Great Britain sa isa pang PRBHS na pinakawalan sa unang karera.

Sinakyan ni jockey JF Paronginog, inilista ni Great Britain ang 1:22.2 sa 1,200 meter race, segundo si Winged Heart habang tersero si Lucky Lea.

Samantala, apat na bagong apprentice jockeys na sina John Marlon C. Dela Cruz, Reynel M. Delos Santos, Ber-Jomel B. Galleta at Charles JohnZen A. Reyes ang masisilayan na sa pista sa mga susunod na racing days.

Bearer, susubukan ang tikas sa Turf

ni Green Lantern @Renda at Latigo | July 20, 2023

Masusubukan ang galing ni Bearer laban sa limang matutulin na kabayo sa paglarga ng 2023 PHILRACOM 3-Year-old Sprint Race na pakakawalan sa Metro Turf, Malvar sa Tanauan City, Batangas sa Agosto 6 (Linggo) sa susunod na buwan.

Sasakyan ni jockey Isaac Ace Aguila ang matikas na si Light Bearer para harapin ang mga kalahok na sina Badboy MJ, Boat Buying, Borrowed Heaven, Sandigan at Deus Ex Machina.

Nakalaan sa nasabing event ang P1.5M guaranteed prize na ipamumudmod sa unang apat na kabayong tatawid sa meta sa distansiyang 1,000 meter race.

Kukubrahin ng mananalong kabayo ang P900,000, mapupunta ang P337,500 sa second placer habang tig- P187,500 at P75,000 ang third at fourth ayon sa pagkakasunod.

Ayon sa komento ng mga karerista sa facebook page ng karera, posibleng magbigay ng magandang laban sina Boat Buying at Sandigan dahil kilala rin sila na mabibilis sa arangkadahan.

"Kung sino ang maganda ang salida yun ang malaki ang tsansang manalo kasi lahat ng mga 'yan mahuhusay kaya kapag magaan na nakuha ang unahan malamang mananalo," saad ni Francisco Buenavista, veteran karerista na taga- Tayuman.

Hahamigin naman ng breeder ng winning horse ang P75,000 habang tig-P45,000 at P30,000 ang second at third.

Samantala, inihahanda at ine-ensayo na ng mga trainer at hinete ang pambato nilang kabayo para masilo ang inaasam na premyo.

Sina Kelvin Abobo at star jockey Jeffril Tagulao Zarate ang rerenda sa Boat Buying at Sandigan ayon sa pagkakahilera.

Maliban sa nabanggit na karera, inaasahang may mga stakes races pa ang ilalarga sa Agosto.

Prime Billing, nanlampaso sa Hopeful Stakes Race

ni Green Lantern @Renda at Latigo | July 19, 2023

Inilampaso ni Prime Billing ang mga nakatunggali kaya naman madali nitong sinungkit ang panalo sa 2023 PHILRACOM Hopeful Stakes Race na inilarga sa Metro Turf, Malvar sa Tanauan City, Batangas noong Sabado ng hapon.

Maganda ang naging lundag ni Prime Billing, maayos ang salida kaya naman nakakapit agad ito sa matulin sa largahan na si Cluster.

Pagsapit ng backstretch ay inagaw na ni Prime Billing ang unahan kay Cluster.

Pagkakuha ng unahan ay hindi na pinalapit ni Prime Billing ang mga kalaban at kampante na rin si former Philippine Sportswriters Association (PSA) Jockey-of-the-Year awardee Patricio Ramos Dilema sa pagdadala.

Inilista ni Prime Billing ang tiyempong 2:06.8 minuto sa 2,000 meter race sapat upang hamigin ang P900,000 premyo ng winning horse owner na si Benjamin Abalos Jr.

Tinawid ni Prime Billing ang finish line ng may apat na kabayong bentahe sa pumangalawang si Chrome Bell na sinakyan ng dati ring PSA-JoY awardee na si Jonathan Basco Hernandez.

Nasikwat ni Chrome Bell ang P300,000 habang tig- P150,000 at P75,000 ang third at fourth placers na sina Winner Parade at Glamour Girle ayon sa pagkakasunod.

Kinubra naman ng breeder ng winning horse na si Mariano Tirona ang P75,000 habang tig-P45,000 at P30,000 ang second at third.

Samantala, nag-aabang na naman ang mga karerista sa mga stakes races na ilalarga ng Metro Manila Turf Club Inc. (MMTCI).