Jewel Of The Nile nagawang manalo

ni Green Lantern @Renda at Latigo | July 29, 2023

Kalmadong lumabas ng aparato si Jewel Of The Nile para sungkitin ang panalo sa 2023 PHILRACOM 3-Year-Old & Above Maiden Race na inilarga sa Metro Turf, Malvar sa Tanauan City sa Batangas, noong Miyerkules ng gabi.

Naka-puwesto sa pang-lima si Jewel Of The Nile at hinayaang mauna lang ang ibang kabayong matutulin sa alisan.

Hawak ni A Lop Bam Boom ang unahan habang nasa segundo puwesto si Unafraid sa kalagitnaan ng karera.

Pero pagsapit ng far turn ay inagaw na ng Unafraid ang unahan sa A Lop Bam Boom.

Nasa segundo puwesto na ang Jewel Of The Nile papalapit ng home turn at sa rektahan ay umagaw ng bandera ang winning horse sa huling 100 metro ng karera.

Inungusan ng Jewel Of The Nile ang meta ng may tatlong kabayong agwat sa pumangalawang si Unafraid.

Inirehistro ni Jewel Of The Nile ang tiyempong 1:14.2 minuto sa 1,200 meter race sapat upang hamigin ng winning horse owner na si AK Castro ang P20,000 added prize.

Dumating na tersero si Silver Lining habang pumang-apat si Fantastic Silver na ginabayan nina Esmael Nahilat at John Marlon Dela Cruz ayon sa pagkakasunod.

Samantala, hinahanda si Jewel Of The Nile sa susunod nitong laban para makasungkit muli ng panalo.

Moment Of Truth sa Condition Race

ni Green Lantern @Renda at Latigo | July 27, 2023

Nakatakdang sumalang ni Moment Of Truth sa magaganap na Condition Race 19 & 20 Merged na ilalarga sa Metro Turf, Malvar, Tanauan City sa Batangas, ngayong araw.

Inaasahang mapapalaban ng todo si Moment Of Truth dahil mga tigasing kabayo din ang makakalaban nito.

Rerendahan ni jockey Conrad Henson si Moment Of Truth sa distansiyang 1,200 meter race kung saan limang mahuhusay na kabayo ang kanyang makakatapat.

Nakalaan ang P10,000 added prize para sa unang kabayong tatawid sa meta, ang ibang kalahok ay sina A.P. Factor, Golden Sunrise, Gomper Girl, Pharaoh's Fairy at Eazacky.

Komento ng mga karerista, posibleng magbigay ng magandang laban din sina Golden Sunrise at Pharaoh's Fairy na sasakyan nina Pabs Cabalejo at Oneal Cortez ayon sa pagkakasunod.

Pakakawalan ang nasabing karera sa unang race kung saan simula rin iyon ng winner take all (WTA) kaya paniguradong pag-aaralang mabuti ng mga karerista ang tatayaang kabayo upang maka-isang puntos agad.

Samantala, pitong races ang inihanda ng Metro Manila Turf Club Inc. (MMTCI) kaya inaasahan na masaya ang pangangarera ng racing aficionados.

Suportado ng Philippine Racing Commission, (PHILRACOM) ang mga pakarera ng MMTCI ngayong araw ng Biyernes.

Mga Pili ni Green Lantern:

Race 1 - Moment Of Truth (6), Gomper Girl (3)

Race2 - Amor Mi Amor (4), May Ten/Sun Dance (3/3A)

Race 3 -Jambo (1), Bordelle (5), Truthmaker (4)

Race 4 - Lucky Julliane (7), Quid Pro Quo (6), Binibini (5)

Race 5 - Paramount (7), Hashtag (6), Batas Kamao (1)

Race 6 - Walkin On Sunshine (5), Since When (8), Static (9)

Race 7 - Double Happiness (12), The Price Is Right (8), Namaskar (11), Che Che (2)

Guce, top jockey 2023 ng PHILRACOM

ni Green Lantern @Renda at Latigo | July 26, 2023

Umarangkada bilang top jockey si John Alvin Guce sa mga hineteng may pinakamaraming panalo sa karerahan mula Enero 4 hanggang Hulyo 20, 2023 ayon sa inilabas ng Philippine Racing Commission, (PHILRACOM) listahan sa programa ng karera.

Nakapagtala si class A jockey Guce ng 405 panalo, 165 second place at 55 third place para sa kabuuang 620 points habang nasa pangalawang puwesto si former Philippine Sportswriters Association, (PSA), Jockey of the Year awardee Jonathan Basco Hernandez na may 394 na panalo, 140 2nd at 31 3rd at may 563 puntos.

Isa sa mga malalaking stakes race na pinanalunan ni Guce ay ang 2023 PHILRACOM Chairman's Cup kung saan siya ang rumenda sa winning horse na Big Lagoon noong Abril.

Nasa pangatlong puwesto si Jomer Estorque na may 349, 126, 34, first, second at third ayon sa pagkakasunod para sa 509 points.

Umentra sa top 10 sina dati ring PSA-JoY awardee Patty Ramos Dilema, (4th), Conrad Henson, (5th), John Allyson Pabilic (6th), John Sajhed De Ocampo (7th), Oneal Cortez (8th), Pablito Cabalejo (9th) at Christian Advincula (10th).

Samantala, si Ruben Tupaz ang nangunguna sa trainer matapos makalikom ng 755 total points mula sa 491 first, 200 second at 66 third.

Pangalawa si Peter Aguila, pangatlo si Conrado Vicente habang pang-apat at pang-lima sina Danilo Dela Cruz at Donato Sordan. Si Tupaz ang trainer ng premyadong kabayong Big Lagoon na sumasabak sa malalaking stakes race gaya ng Presidential Gold Cup.