Don Julio, pinaligaya ang mga karerista

ni Green Lantern @Renda at Latigo | August 01, 2023

Pinasaya ni super outstanding favorite Don Julio ang kanyang mga tagahanga matapos manalo sa PHILRACOM Rating Based Handicapping System na inilarga sa Metro Turf, Malvar - Tanauan City sa Batangas noong Linggo ng hapon.

Pag-arangkada sa aparato ay kumuha ng unahan si Don Julio at hindi na ito binitiwan upang manalo ng banderang tapos.

Hindi pinaporma ni Don Julio ang mga katunggali kaya maaga nitong nasungkit ang panalo.

Umungos si Don Julio ng dalawang kabayo sa rektahan subalit umabot pa ito hanggang walong kabayo sa pumangalawang Bravo pagtawid ng meta.

Pangatlo si Reliable Den habang pumang-apat ang Rockstar Show na ginabayan ni JL Santiago sa karerang suportado ng Philippine Racing Commission, (PHILRACOM).

Nirendahan ni jockey Rico Suson, inirehistro ng Don Julio ang impresibong tiyempo na 1:24.6 minuto sa 1,400 meter race. "Matikas at magaling na kabayo si Don Julio, puwedeng isali sa malalaking karera at malaki rin ang tsansang manalo basta maganda ang pagkakahanda sa kanya," lahad ni Dennis Beltran, veteran karerista. Kinubra ng winning horse owner na si FR Sevilla Jr. ang P10,000 added prize sa event na pinakawalan sa unang karera.

Samantala, walong races ang pinakawalan ng Metro Manila Turf Club Inc. (MMTCI) kaya naging masaya ang pananaya ng mga karerista.

Sartorial Elegance nanlampaso sa Turf

ni Green Lantern @Renda at Latigo | July 31, 2023

Inilampaso ni top favorite Sartorial Elegance ang mga katunggali matapos ang walang kahirap-hirap na pagtawid sa meta nang manalo ito sa 3-Year-Old & Above Maiden Race na inilarga sa Metro Turf, Malvar - Tanauan City, Batangas noong Sabado ng hapon.

Relax na ginabayan ng hineteng si John Allyson Pabilic si Sartorial Elegance, maganda ang naging salida sa aparato kaya naipuwesto niya ito sa pang-apat para panoorin ang nagbabakbakan sa unahan na si Lagertha at Mount Piapayungan.

Pagsapit ng far turn ay lumalapit kina Lagertha at Mount Piapayungan si Sampaloc's Pride habang nagsisimula na rin uminit si Sartorial Elegance.

Pagdating ng home turn ay nagkapanabayan na sa unahan sina Mount Piapayungan at Sartorial Elegance at sa rektahan ay umungos na ang winning horse.

Nakalamang si Sartorial Elegance ng apat na kabayo sa pumangalawang si Mount Piapayungan, tersero si Sampaloc's Pride at pang-apat si Lagertha.

Ipinasang tiyempo ni Sartorial Elegance ang 0.59.6 segundo sa 1,000 meter race sapat upang hamigin ang P20,000 added prize sa event na suportado ng Philippine Racing Commission, (PHILRACOM).

Nagpakitang gilas din si Munich sa PHILRACOM Rating Based Handicapping System na pinakawalan sa pangalawang karera.

Nagtala ng tiyempong isang minuto sa 1,000 meter race si Munich para hamigin ang karagdagang P10,000 premyo

Samantala, walong races ang pinakawalan ng Metro Manila Turf Club Inc. (MMTCI) noong Sabado kaya medyo mahaba-haba ang paglilibang ng mga karerista.

Reliable Den sasalang sa Handicap System

ni Green Lantern @Renda at Latigo | July 30, 2023

Kikilatisin ng mga dehadistang karerista ang husay ni Reliable Den pagsalang nito sa PHILRACOM Rating Based Handicapping System na ilalarga sa Metro Turf, Malvar - Tanauan City sa Batangas ngayong araw.

Gagabayan ni jockey John Paul Guce, makakalaban ni Reliable Den ang anim na tigasing kalahok sa distansiyang 1,400 meter race. May nakalaan na P25,000 karagdagang premyo na ikakalat sa unang apat na kabayong tatawid sa meta, ang ibang kalahok ay sina Rockstar Show, Don Julio, Bravo, Lava Walker, Don Lucas at Sari Baby.

Inaasahang magbibigay ng laban kay Reliable Den ay sina Don Julio at Don Lucas sa event na hahamigin ng mananalong kabayo ang added prize na P10,000 premyo.

"Magagaling ang mga kasaling kabayo lalo na sina Don Julio at Don Lucas kaya posibleng isa sa kanila ang makasilat," saad ni Carlito Mendoza, veteran karerista.

Samantala, walong races ang pakakawalan ng Metro Manila Turf Club Inc. (MMTCI) ngayong araw ng Linggo kaya mahaba-haba ang paglilibang ng mga karerista.

Tiyak na aabangan din ng mga karerista ang bakbakan ng anim na tigasing kabayo sa isa pang PHILRACOM Rating Based Handicapping System na pakakawalan sa pangalawang karera.

Maglalaban sa distansiyang 1,600 meter race sina American Dream, Marilag, Agidaw, Kercharmer, My Jopay at Cat Bell.

Ayon sa ibang mga karerista posibleng magdomina sa takilya ang kabayong Kercharmer na gagabayan ni Rico Suson.

Race 1 - Reliable Den (1), Don Julio (3), Don Lucas (6)

Race 2 - Kercharmer (4), Cat Bell (6)

Race 3 - My Dad Bogart (5), Kaboom (8), Great Connection (1)

Race 4 - Smart Bell (4), Chef Cat (5), Spoiled Brat (7)

Race 5 - Sonic Clay (7), Bocaue Rivertown (3), My Boy Lollipop (4)

Race 6 - Gold N Silver (4), Antonio Delamugis (6), Dollarama (7)

Race 7 - Grand Monarch (7), Winter On Fire (8), Electrify (1)

Race 8 - Central Bank (8), Battle Scar (5), Sky Lover (1), Piece Of Cake (7)