Noble Promise nanalo sa 3-YO

ni Green Lantern @Renda at Latigo | August 05, 2023

Hinangaan ng mga karerista ang ipinakitang husay ni Noble Promise sa karerahan matapos nitong manalo sa 2023 PHILRACOM 3-Year-Old & Above Maiden Race na nilarga sa Metro Turf, Malvar - Tanauan City, Batangas, noong Miyerkules ng gabi.

Ginabayan ni jockey JML Siego, nirehistro ni Noble Promise ang 1:14.6 minuto sa 1,200 meter race sapat upang hamigin ng winning horse owner na si Leonardo Javier Jr. ang P20,000 added prize.

Umarangkada sa largahan si Noble Promise para hawakan agad ang unahan habang nakasunod sa kanya si Lightning Lass.

Pagdating sa far turn ay nasa unahan at pangalawang puwesto pa rin si Noble Promise at Lightning Lass ayon sa pagkakasunod habang nasa tersero ang Regal.

Walang nakaungos sa winning horse sa unahan at pagsapit ng rektahan ay alam na ng mga karerista na mananalo si Noble Promise.

Tinawid ni Noble Promise ang finish line ng may pitong kabayong agwat sa pumangalawang si Regal.

Pangatlo sa Cat's Whiskers habang pumang-apat si Lightning Lass sa event na suportado ng Philippine Racing Commission, (PHILRACOM).

Samantala, nasiyahan ang mga karerista noong Miyerkules ng gabi dahil walong races ang pinakawalan ng Metro Manila Turf Club Inc. (MMTCI).

Bravo at Attractive sa Sprint Race Turf

ni Green Lantern @Renda at Latigo | August 03, 2023

Masisilayan ang matitikas na sina Bravo at Attractive Force sa magaganap na 4-Year-Old & Above Sprint Race na ilalarga sa Metro Turf, Malvar - Tanauan City, Batangas sa Agosto 20, (Linggo).

Tiyak na mapapahirapan sina Bravo at Attractive Force sa pinupuntirya nilang titulo dahil pang-stakes races din ang mga naghayag ng paglahok sa distansiyang 1,000 meter race.

Gagabayan ni Jonathan Flores si Bravo habang si former Philippine Sportswriters Association, (PSA) - Jockey of the Year awardee Patty Ramos Dilema ang rerenda kay Attractive Force sa karerang nakalaan ang P1.5M garantisadong premyo na ikakalat sa unang anim na kabayong tatawid sa meta.

Ang ibang makikipagtagisan ng bilis kina Bravo at Attractive Force ay sina Agi Daw, Ambisioso, Gomezian, Gusto Mucho, Life Gets Better, Main Event, Palauig, Stardust at Weather Lang.

Sisikwatin ng mananalong kabayo ang P900,000, mapupunta sa second placer ang P300,000, may P150,000 naman ang kukubrahin ng tersero habang tig- P75,000, P45,000 at P30,000 ang fourth, fifth at sixth ayon sa pagkakahilera.

Hahamigin naman ng breeder ng winning horse ang P75,000 habang tig-P45,000 at P30,000 ang second at third sa event na suportado ng Philippine Racing Commission, (PHILRACOM).

Nakaraan lamang ay nasilayan ng mga karerista si Bravo sa pista, sumegundo siya sa nanalong si Don Julio sa naganap na PHILRACOM Rating Based Handicapping System.

Ayon sa mga kareristang nakasaksi sa laban ni Bravo, maganda ang ipinakita nitong takbo kahit dumating lang itong segundo.

Hinete ni Sandigan kondisyon sa Turf

ni Green Lantern @Renda at Latigo | August 02, 2023

Nakapokus sa paghahanda ang trainer at hinete ni Sandigan para sa nalalapit na laban sa 2023 PHILRACOM "3-Year-old Sprint Race na pakakawalan sa Metro Turf, Malvar sa Tanauan City, Batangas sa darating na Linggo.

Dahil sa mahuhusay ang mga kalahok ay inaasahang daraan sa butas ng karayom si Sandigan bago masikwat ang panalo kontra limang tigasing kabayo sa distansiyang 1,000 meter race.

Rerendahan ni star jockey Jeffril Tagulao Zarate, makakatagisan ng bilis ni Sandigan sina Boat Buying, Badboy MJ, Light Bearer, Borrowed Heaven at Deus Ex Machina.

Ikakalat sa unang apat na kabayong tatawid sa meta ang nakalaan na P1.5M guaranteed prize kung saan ay suportado ito ng Philippine Racing Commission, (PHILRACOM).

Hahamigin ng mananalong kabayo ang P900,000, mapupunta ang P337,500 sa second placer habang tig- P187,500 at P75,000 ang third at fourth ayon sa pagkakasunod.

Komento ng mga karerista sa social media na posibleng magbigay ng magandang laban ang Light Bearer at Boat Buying dahil kilala rin sila na mabibilis sa arangkadahan.

Ibubulsa naman ng breeder ng winning horse ang P75,000 habang tig-P45,000 at P30,000 ang second at third.

Sina Isaac Ace Aguila at Kelvin Abobo ang sasakay sa Light Bearer at Boat Buying ayon sa pagkakahilera.

Maliban sa nabanggit na karera, inaasahang may mga stakes races pa ang ilalarga kaya tiyak na masisiyahan ang mga karerista sa kanilang paglilibang.