Gold 'N Silver, mahusay sa Handicap System

ni Green Lantern @Renda at Latigo | August 21, 2023

Ipinakita ni Gold 'N Silver ang kanyang husay at walang nagawa ang kanyang mga nakatunggali kaya nasikwat nito ang panalo sa PHILRACOM Rating Based Handicapping System na inilarga sa Metro Turf, Malvar sa Tanauan City, Batangas, Sabado ng hapon.

Mabilis na umarangkada sa largahan si Gold 'N Silver at makalipas ang ilang metro ay kinuha na nito ang unahan at makalamang ng dalawang kabayong agwat sa mga nasa likurang sina Bordelle at Batas Kamao.

Pagdating ng far turn ay nakipagtagisan ng bilis si Batas Kamao kay Gold 'N Silver para magpahirapan sa unahan ang bida hanggang sa huling kurbada.

Sa rektahan ay pagalingan sa pagdadala ang mga hinete at huling 150 metro ng laban ay umungos si Gold 'N Silver para manalo ng banderang tapos.

Sinakyan ni former Philippine Sportswriters Association, (PSA) - Jockey of the Year awardee Patty Ramos Dilema ang Gold 'N Silver na tinawid ang meta ng may tatlong kabayo ang agwat sa pumangalawang Batas Kamao.

Inirehistro ng Gold 'N Silver ang tiyempong 1:00.6 minuto sa 1,000 meter race sapat upang hamigin ng winning horse owner na si JJ Lagasca ang P10,000 added prize.

"Magaling at matapang sa unahan, mainam pa ang tiyempo at dahil batang kabayo ay mas mag-uumento pa 'yan sa mga susunod na laban," saad ni Dennis Salazar, veteran karerista.

Samantala, dumating na tersero ang Apollo habang pumang-apat ang Flying Eagle na nirendahan ni Claro S. Pare sa event na suportado ng Philippine Racing Commission, (PHILRACOM) ni Chairman Reli de Leon.

Gusto Mucho at Weather Lang target ang korona

ni Green Lantern @Renda at Latigo | August 20, 2023

Magsasanib-puwersa ang magka-kuwadrang sina Gusto Mucho at Weather Lang para targetin ang korona sa 2023 PHILRACOM 4-Year-Old & Above Sprint Race na ilalarga ngayong araw sa Metro Turf, Malvar - Tanauan City, Batangas.

Gagabayan nina class A riders Kelvin Abobo at John Alvin Guce sina Weather Lang at Gusto Mucho ayon sa pagkakasunod para harapin ang ibang tigasing kalahok sa distansiyang 1,000 meter race.

May nakalaan na P1.5M guaranteed prize na ikakalat sa unang anim na kabayong tatawid sa meta, ang ibang kasali ay sina Main Event, Bravo, Agi Daw, Palauig, Attractive Force, Stardust, Ambisioso, Asiong at Life Gets Better.

Posibleng maging mahigpit na karibal nina Weather Lang at Gusto Mucho ang magkakamping sina Palauig at Attractive Force at Life Gets Better ayon sa mga karerista.

"Halos lahat puwedeng manalo kaya pagalingan na lang sa pagpili," saad ni Jessie Alvarez, veteran karerista.

Kukubrahin ng mananalong kabayo ang P900,000, mapupunta sa second placer ang P300,000 habang tig- P150,000, P75,000, P45,000 at P30,000 ang third hanggang sixth.

Magbubulsa rin ang breeder ng winning horse ng P75,000 habang tig-P45,000 at P30,000 sa event na suportado ng Philippine Racing Commission, (PHILRACOM) ni Chairman Reli de Leon.

Samantala, walong races ang pakakawalan ng Metro Manila Turf Club Inc. (MMTCI) ngayong Linggo kaya masaya na naman ang mga karerista sa kanilang paglilibang.

Mga Pili ni Green Lantern:

Race 1 - Enigma Uno (5), Cat's Whiskers (6), Superhawk (2)

Race 2 - Platinum Frolic (3), Prime Billing (6)

Race 3 - Family Affairs (4), Uncle Vhines (1), Bisyo Mag Serbisyo (2)

Race 4 - Weather Lang/Gusto Mucho (1/1A), Palauig/Attractive Force (6/6A), Bravo (4)

Race 5 - Speed Revolution (5), Sky Lover (1), Magnolia Yana/Hee Nieve Rahh (6/6A)

Race 6 - Diversity (11), Ninong (1), Big Battle (6)

Race 7 - Misha (10), Jacqueline (5), Good Reason (2)

Race 8 - Aly Yanna (13), Shinshiro (12), Silver Glow (7), Celebrity (10)

Boss Emong at Don Julio magdadaigan sa A.P. Race

ni Green Lantern @Renda at Latigo | August 19, 2023

Magpapasikatan sina Boss Emong at Don Julio pagharap nila sa 2023 PHILRACOM A.P. Reyes Memorial Race na ilalarga sa Metro Tur, Malvar - Tanauan City, Batangas sa Agosto 27, (Linggo).

Galing sa impresibong panalo sina Boss Emong at Don Julio kaya inaasahang makakapanood ng magandang laban ang mga karerista lalo na at mga tigasing kabayo din ang ibang mga naghayag ng pagsali.

Naghari si Boss Emong sa Araw ng Maynila Gran Copa De Manila habang inilampaso ni Don Julio ang mga nakatunggali sa PHILRACOM Rating Based Handicapping System race.

May distansiyang 1,800 meter race, ang ibang nagsaad ng paglahok ay sina Jungkok, Magtotobetsky, Robin Hood at Sartorial Elegance sa karerang nakalaan ang P1-M guaranteed prize na ikakalat sa unang apat na kabayong tatawid sa meta.

Ayon sa komento ng ibang karerista sa social media, posibleng magpakitang-gilas din ang magka-kuwadrang Robin Hood at Magtotobetsky para sikwatin ang P600,000 premyo. "Maganda rin ang itinakbo ni Robin Hood noong nakaraan kaya malaki ang tsansa niyang manalo," saad ni Juanito Villahermosa, veteran karerista.

Kukubrahin ng second placer ang P225,000 habang tig- P125,000 at P40,000 ang third at fourth.

Magbubulsa rin ng P50,000 ang breeder ng winning horse habang tig-P30,000 at P20,000 ang second at third.

Bukod sa nabanggit na karera, may ibang races pa ang ilalarga ng Metro Manila Turf Club Inc. (MMTCI) kaya mas magiging masaya ang mga karerista sa kanilang paglilibang.

Ang nasabing karera ay suportado ng Philippine Racing Commission, (PHILRACOM) ni Chairman Reli de Leon.