Domsat Seven hindi pasisindak sa PCSO 3-YO

ni Green Lantern @Renda at Latigo | September 27, 2023

Matitikas na kabayo ang mga kasali sa 2023 PHILRACOM-PCSO 3-Year-Old Locally Bred Grand derby na ilalarga sa Metro Turf, Malvar sa Tanauan City, Batangas sa Oktubre 8 pero hindi masisindak ang kalahok na si Domsat Seven.

Maging ang hineteng si former Philippine Sportswriters Association (PSA) - Jockey of the Year awardee Jonathan Basco Hernandez ay palaban at naniniwalang malaki ang tsansa ng sasakyan niyang si Domsat Seven. Inaasahang mapapalaban si Domsat Seven kina Jaguar at magkakamping Open Billing at Prime Billing sa distansiyang 1,800 meter race.

Maliban sa apat na nabanggit na kabayo, ang ibang nagsaad ng pagsali ay sina Earli Boating, Glamour Girle, Istulen Ola, Secretary, Sonic Clay, La Trouppei at Winner Parade.

Nakalaan ang tumataginting na P3-M guaranteed prize ang ikakalat sa unang anim na kabayong tatawid sa finish line, tig-P1.5M ang inisponsor ng PHILRACOM at PCSO.

Ibubulsa ng horse owner ng mananalong kabayo ang P1.8M na premyo habang hahamigin ng second placer ang P600,000, mapupunta ang P300,000 sa third habang tig-P150,000, P90,000 at P60,000 ang fourth hanggang sixth.

Komento ng mga karerista, tiyak na puspusan ang paghahanda ng mga trainer ang hinete ang nasabing karera dahil malaki ang premyo.

Sisikwatin naman ng breeder ng winning horse ang P150,000 habang tig-P90,000 at P60,000 ang second at third sa event na suportado ng Philippine Racing Commission at ng PCSO.

Matindi ang diskarte ng Cam From Behind

ni Green Lantern @Renda at Latigo | September 26, 2023

Diskarte at pasensiya ang naging susi ni class A rider Kelvin Abobo upang maipanalo si Cam From Behind sa 2023 PHILRACOM Sampaguita Stakes Race na nilarga sa Metro Turf, Malvar sa Tanauan City, Batangas noong Linggo ng hapon.

Mabilis na humarurot sa largahan sina Flattering You at La Liga Filipina kaya naiwanan nila ang mga katunggali kasama si Cam From Behind na nasa tersero puwesto.

Sa kalagitnaan ng karera patuloy ang lutsahan nina Flattering You at La Liga Filipina habang nasa malayong tersero pa rin si Cam From Behind na may agwat na mahigit 10 kabayo.

Papalapit ng far turn ay unti-unting umusad si Cam From Behind kina Flattering You at La Liga Filipina kaya naman sa rektahan ay nakakapit na ang winning horse.

Bahagyang bumuka si Cam From Behind pero lumampas pa rin ito sa huling 100 metro ng karera, tinawid nito ang meta ng may isang kabayo ang lamang sa pumangalawang si Dambana.

Inilista ni Cam From Behind ang tiyempong 2:08.2 minuto sa 2,000 meter race sapat upang hamigin ng winning horse owner ang P1.2-M premyo.

Nasikwat ni Dambana ang P450,000 habang tig-P250,000 at P100,000 ang kinubra ng third at fourth placers na sina La Liga Filipina at Enigma Uno ayon sa pagkakasunod.

Samantala, pitong karera ang pakakawalan ng Metro Manila Turf Club Inc. (MMTCI) ngayong araw ng Martes na bibitawan din sa parehong lugar, suportado ito ng Philippine Racing Commission, (PHILRACOM) ni Chairman Reli de Leon.

Isa sa aabangan ng mga karerista ang labanan ng mahuhusay na kabayo sa 3-Year-Old & Above Maiden Race.

Mga Pili ni Green Lantern:

Race 1 - Sister Moon (6), Don Pedro (1)

Race 2 - Achi Holly (5), You Never Know (7), Noon Charm (6)

Race 3 - Sky Plus (5), Empire Ruler (2)

Race 4 - Song Of Silver (3), Action Rules (6)

Race 5 - Super Hawk (6), Nards Bentetres (1)

race 6 - Keep Da Trick (7), Jewel Of The Nile/A.P. Factor (3/3A), Silab (8)

Race 7 - Thriller (2), Spoiled Brat (6), Don Damiano (3), Quid Pro Quo (1)

Ghost, nagpakitang-husay sa 2-YO Race

ni Green Lantern @Renda at Latigo | September 25, 2023

Nakita ng mga karerista ang mahusay na pagtakbo ni Ghost matapos manalo sa 2023 PHILRACOM 2-Year-Old Maiden Race na inilarga sa Metro Turf, Malvar sa Tanauan City, Batangas noong Sabado ng hapon.

Pati si class A rider John Alvin Guce ay hinangaan ng mga kareristang nakasaksi ng laban, maganda umano ang kanyang pagkakadala kay Ghost.

Humarurot sa arangkadahan sina Blame The Ghost at High Roller pero tinutukan agad sila ng liyamadong Ghost upang hindi makalayo ang mga nasa unahan.

Paparating pa lang sa far turn ay kinapitan na ni Ghost ang naglulutsahang sina High Roller at Blame The Ghost at maka-ilang hakbang ay kumuha na ng unahan ang winning horse.

Hindi na pinaporma ni Guce ang mga katunggali kaya pagsapit ng home turn ay inilayo pa nito ng todo si Ghost at umabot sa tatlong kabayo ang lamang sa mga humahabol.

Ganadong tumakbo, lalo pang umunat sa unahan si Ghost sa rektahan, nagwagi ito ng may walong kabayo ang lamang sa pumangalawang si High Roller, tersero si Malibu Princess habang pang-apat si Blame The Ghost.

Inilista ni Ghost ang impresibong tiyempong 1:12 minuto sa 1,200 meter race sapat upang hamigin ang P20,00 added prize sa event na suportado ng Philippine Racing Commission, (PHILRACOM) ni Chairman Reli de Leon.

Samantala, inihahanda na ng trainer ng Ghost ang susunod na sasalihan ng kanilang pambato, umaasa silang mas mag-uumento ang performance ng kabayo.

Walong karera ang pinakawalan ng Metro Manila Turf Club Inc. (MMTCI) kaya medyo maraming karera ang natayaan ng mga karerista.