Mae Bell, masusubok sina Bea at Cassandra

ni Green Lantern @Renda at Latigo | October 18, 2023

Kikilatisin ni Mae Bell ang husay magka-kuwadrang Bea Bell at Cassandra Bell sa 2023 PHILRACOM 2nd Leg Juvenile Stakes Race na ilalarga sa darating na Linggo (Oct. 22) sa Metro Turf, Malvar - Tanauan City sa Batangas.

Paniguradong dehado ang kalahok na Mae Bell na rerendahan ni former Philippine Sportswriters Association, (PSA) - Jockey of the Year awardee Patricio Ramos Dilema pero ayon sa ibang mga karerista malaki ang tsansa na manalo ito sa distansiyang 1,400 meter race.

Bukod sa Bea Bell at Cassandra Bell, ang ibang makakatagisan ng bilis ni Mae Bell ay sina Amor My Love, Ghost, Heartening To See, Masunaga, Mommy's Love, Morning After at Over Azooming.

"Magagaling na kabayo ang mga kasali kaya mahirap mag- single bet diyan lalo na at mga batang kabayo," saad ni Victor Villahermosa, veteran karerista.

Nakalaan ang P1.8-M premyo na ikakalat sa unang anim na kabayong tatawid sa finish line sa event na suportado ng Philippine Racing Commission, (PHILRACOM) ni Chairman Reli de Leon.

Kukubrahin ng mananalong kabayo ang P1,080,000, mapupunta sa second placer ang P360,000, habang tig- P180,000, P90,000, P54,000 at P36,000 ang third hanggang sixth ayon sa pagkakahilera.

Mag-uuwi rin ng P90,000 ang breeder ng winning horse habang P54,000 at P36,000 ang ibubulsa ng second at third.

Samantala, maliban sa nabanggit na stakes race, may ilalargang regular races ang Metro Manila Turf Club Inc. (MMTCI), kaya asahang masisiyahan ang mga karerista sa kanilang paglilibang.

Gintong Hari sa PRHTAI, horseracing expo sa Cainta

ni Green Lantern @Renda at Latigo | October 17, 2023

Kuminang sa pista si Gintong Hari sa PRHTAI Special Race noong Linggo sa Metro Turf, Malvar - Tanauan City. Ang karera ay paggunita kay late Juan Sordan na dating presidente ng PRHTAI (1986-1988).

Pag-arangkada sa largahan ay sinundan agad ni Gintong Hari ang matulin na si Oradas Gray hanggang sa far turn. Nanatiling matatag si Gintong Hari kaya nanalo ito ng may apat na kabayong agwat sa pumangalawang si Hot Rot Hearts.

Nirendahan ni jockey Conrad Henson, inirehistro ni Gintong Hari ang tiyempong 1:26.4 minuto sa 1,400 meter race sapat upang hamigin ang P180,000 habang napunta kay Hot Rot Hearts ang 2nd place prize na P57,500.

Sinikwat ng 3rd placer na Dugong Bughaw ang P37,500, napunta ang P15,000 sa pumang-apat na si Seychelles habang P10,000 ang sinungkit ng winning trainer sa event na inisponsoran ni VB Leonardo Javier Jr. Samantala, may 13 karera ang pinakawalan ng Metro Manila Turf Club Inc. (MMTCI) noong Linggo kaya mahaba-haba ang paglilibang ng mga karerista.

Lahat ng karera na pinakawalan ay suportado ng Philippine Racing Commission, (PHILRACOM) ni Chairman Reli de Leon.

Samantala, idaraos ang pinakamalaking event para sa horse enthusiasts sa Nob. 14-16, 2023 sa Sta. Lucia Mall sa Cainta, Rizal. Ang first-ever Philippine Horseracing and Breeding Expo ay unang matagumpay na idinaos sa MJCI sa Carmona, Cavite noong Oct.

14 to 16, 2022. At ngayon ay itinatampok ng Philippine Racing Commission ang pinakabagong expo ng mga hinete, kabayo, horse trainers, horse owners, race clubs, race callers, grooms at veterinarians.

Upang higit pang mapalapit sa masa ang horse racing sa labas ng race tracks lalo na sa kabataan ay itinaguyod ito ng PHILRACOM sa layunin na ang ikalawang expo na ito ay makapagpaabot ng tulong pinansiyal sa kawanggawa at makalikha ng trabaho at maipakita na ang industriya ng horse racing ay isang family entertainment.

Bea Bell tatakbo sa PHILRACOM 2nd Leg

ni Green Lantern @Renda at Latigo | October 16, 2023

Babanat na naman sa pista si Bea Bell para tumakbo sa 2023 PHILRACOM 2nd Leg Juvenile Stakes Race na ilalarga sa darating na Linggo (Oct. 22) sa Metro Turf, Malvar - Tanauan City sa Batangas.

Bumida sa nakaraang laban si Bea Bell matapos magwagi sa 2-Year-Old Maiden Stakes Race at hinangaan siya ng mga karerista dahil sa ipinakitang performance.

Subalit tiyak na mapapalaban si Bea Bell sapagkat mas magagaling ang kanyang makakatapat sa distansiyang 1,400 meter race na nakalaan ang guaranteed prize na P1.8M.

Si Bea Bell ay pag-aari ng mag-amang sina Elmer De Leon at volleyball star player ng Choco Mucho Bea De Leon, kasama ng kanilang pambato bilang couple entry ay ang Cassandra Bell.

Masusubukan ang husay ng magkakamping Bea Bell at Cassandra Bell kontra kina Amor My Love, Ghost, Heartening To See, Mae Bell, Masunaga, Mommy's Love, Morning After at Over Azooming.

Hahamigin ng mananalong kabayo ang P1,080,000, mapupunta sa second placer ang P360,000, habang tig- P180,000, P90,000, P54,000 at P36,000 ang third hanggang sixth ayon sa pagkakahilera.

Magbubulsa rin ng P90,000 ang breeder ng winning horse habang P54,000 at P36,000 ang iuuwi ng second at third sa karera na suportado ng Philippine Racing Commission, (PHILRACOM) ni Chairman Reli de Leon.

Komento ng mga karerista, mapapalaban ng todo si Bea Bell, malalaman nila kung hanggang saan ang tikas ng batang kabayo.

Posibleng magpakitang gilas sa karera ay ang magka-kuwadrang Amor My Love at Mommy's Love, Mae Bell at Ghost.