Oradas Gray nagpasaya sa PHILRACOM Rating Based

ni Green Lantern @Renda at Latigo | November 4, 2023

Nasiyahan ang mga karerista sa ipinakitang husay ni Oradas Gray nang manalo ito sa PHILRACOM Rating Based Handicapping System na inilarga sa Metro Turf, Malvar - Tanauan City noong Martes ng hapon.

Kumaripas ang tatlong matutulin sa largahan at nagtagisan sila ng bilis sa unahan, ito'y sina Speed Revolution, Adavance Party at Princess Tycoon habang pinanood lang sila ni Oradas Gray na nasa pang-apat na puwesto. Mabilis naman na humabol si Cash Is King para makisali sa unahan habang kalmado lang ang hinete ni Oradas Gray na si class A rider Kelvin Abobo.

Pagdating ng far turn ay nagpagalaw na si Abobo kaya naman papalapit ng huling kurbada ay kumakapit na sa unahan si Oradas Gray.

Sabay-sabay na sa unahan sina Speed Revolution na nasa bandang balya, Oradas Gray na dumaan sa labas at Cash Is King na nasa gitna pagdating nila sa rektahan.

Mainit at makapigil-hininga ang naging bakbakan ng tatlo sa rektahan kung saan ay nanalo si Oradas Gray ng may leeg lang ang pagitan sa pumangalawang Cash Is King, tersero ang Speed Revolution.

Inirehistro ni Oradas Gray ang 1:13.6 minuto sa 1,200 meter race sapat upang hamigin ni winning horse owner, Melaine Habla ang P10,000 added prize.

Samantala, walong races ang pinakawalan ng Metro Manila Turf Club Inc. (MMTCI) noong Martes sa event na suportado ng Philippine Racing Commission, (PHILRACOM) ni Chairman Reli de Leon.

Boss Emong kampeon sa PCSO Silver Cup

ni Green Lantern @Renda at Latigo | November 1, 2023

Nasilayan ng mga karerista ang galing ni Boss Emong nang sikwatin ang korona sa PCSO "Silver Cup" na inilarga sa Metro Turf, Malvar - Tanauan City, Batangas, Linggo ng hapon.

Kumaripas sa largahan si King Tiger habang pumuwesto sa pangalawa si Boss Emong na sinakyan ni veteran jockey Dan Camanero.

Nasa anim na kabayo ang agwat ni King Tiger kay Boss Emong pero pagsapit ng far turn ay nakuha na ng winning horse ang unahan.

May Ilang metro bago dumating sa home turn ay nasa apat na kabayo na ang abante ni Boss Emong sa humahabol na si Big Lagoon at Don Julio.

Pagdating ng rektahan ay malaki na ang lamang ni Boss Emong kaya kahit malakas ang dating ni Don Julio ay hindi na ito umabot.

Inilista ni Boss Emong ang tiyempong 1:51.6 minuto sa 1,800 meter race sapat upang ibulsa ang P2.4M habang P 800,000 ang kinubra ng second placer na si Don Julio.

Terserong tumawid sa meta si Big Lagoon na nakakuha ng P400,000 habang ang pumang-apat na si Jaguar ay nag-uwi ng P200,000.

Ang pinakawalan na races ay suportado ng Philippine Racing Commission (PHILRACOM) ni Chairman Reli de Leon.

Wallop sinikwat ang panalo sa 3-YO

ni Green Lantern @Renda at Latigo | October 30, 2023

Lubos ang ngiti at saya ng mga tagahanga ni Wallop matapos nitong sikwatin ang panalo sa 3-Year-Old & Above Maiden Race na inilarga sa Metro Turf, Malvar sa Tanauan City, Batangas noong Sabado ng hapon.

Humarabas sa unahan si Word Isn't Enough habang pumuwesto sa pang-apat ang markadong si Wallop na sinakyan ni jockey Andreu Villegas. Pinabayaan ni Wallop ang kakampi niyang si Noble Touch na humabol at lumutsa sa humaharurot na si Word Isn't Enough habang nasa tersero naman si Tulong Geisdaw.

Pagsapit ng far turn at nasa pang-apat pa rin si Wallop subalit papalapit ng home turn ay nagkapanabayan sa pagkuha ng unahan ang magka-kuwadrang sina Noble Touch at winning horse.

Pagdating ng rektahan ay sina Wallop at Noble Touch na ang naglalaban sa unahan at naka-ungos ang una sa huling 15 metro ng karera at nanalo ng may dalawang kabayo ang agwat sa pumangalawang si Noble Touch.

Nasilo ng winning horse owner na si Leonardo Javier Jr. ang added prize na P20,000 sa event na suportado ng Philippine Racing Commission, (PHILRACOM) ni Chairman Reli de Leon.

Kahit dumating na pangalawa ang Noble Touch, ang Brightside pa rin ang magiging forecast sa nanalo Wallop at ang Word Isn't Enough ang titimbang na tersero para sa trifecta.

Samantala, masaya rin ang mga karerista sa walong races na pinakawalan ng Metro Manila Turf Club Inc. (MMTCI).