Chrome Bell at Tell Bell, sanib-puwersa

ni Green Lantern @Renda at Latigo | February 1, 2023

Magsasanib-puwersa sina Chrome Bell at Tell Bell sa magaganap na 2023 PHILRACOM "3-Year-Old Maiden Stakes Race na ilalarga sa Metro Turf, Malvar sa Tanauan City, Batangas sa Pebrero 12, 2023, (LInggo).

Makakatagisan ng bilis nina Chrome Bell at Tell Bell ang ibang nagsaad ng pagsali na sina Prime Billing, Glamour Girle, Grand Moments, Cash On Hand, Melania, Runway Ten at Song Bird.

Sasakyan ni Pabs Cabalejo si Chrome Bell habang si former Philippine Sportswriters Association, (PSA) Jockey-of-the-Year awardee Jonathan Hernandez ang sasakay kay Tell Bell sa event na nakalaan ang P1.2-M garantisadong premyo.

Sina Chrome Bell at Tell Bell ay mula sa Bell Racing Stable puntirya nila na masilo ang P720,000 premyo sa karerang suportado ng Philippine Racing Commission, (PHILRACOM) sa pamumuno ni chairman Reli De Leon.

Masusungkit ng second placer ang P240,00, iuuwi ng third ang P120,000 habang tig P60,000, P36,000 at P24,000 ang fourth, fifth at sixth ayon sa pagkakahilera.

Nakaraan ang nagwagi si Tell Bell sa trial race na pinasibat sa nasabing pista, sumegundo si Prime Billing at tersero si Glamour Girle.

Subalit ayon sa mga kareristang nakasaksi ng laban ay posibleng hindi pa itinotodo ng ibang kalahok ang kanilang lakas kaya posibleng may biglang bumulagang ibang kabayo sa aktuwal na laban.

"Hindi natin alam, na baka hindi ipinapakita noong ibang kasali 'yung tunay na takbo, kaya para sa akin ay anybody's race 'yan," saad ni Lamberto Gonzales, veteran karerista.

Red Queen, nagpahanga matikas sa Rating Based

ni Green Lantern @Renda at Latigo | January 31, 2023

Pinahanga ni Red Queen ang mga sumuporta sa kanya matapos masilayan ang tikas nito nang manalo sa PHILRACOM Rating Based Handicapping System na inilarga sa Metro Turf, Malvar sa Tanauan City, Batangas noong Linggo ng hapon.

Hinawakan ni Red Queen ang unahan subalit nilutsa siya ni Success Of Times hindi naman nagpadaig ang winning horse kaya nanalo ito ng may apat na kabayong agwat sa pumangalawang Bushido Code.

Papasok ng huling kurbada ay kumalas na sa unahan si Red Queen kaya mag-isa na lang ito sa unahan sa rektahan.

Nirendahan ni jockey Pabs Cabalejo, inirehistro ni Red Queen ang tiyempong 1:27.6 sa 1,400 meter race sapat upang hamigin ng winning horse owner na si PD Mendoza ang P10,000 added prize. Tumersero si Chocolate Thunder, pang-apat si Money For Gabriel habang pang-lima si Bocaue Rivertown sa event na suportado ng Philippine Racing Commission, (PHILRACOM) sa pamumuno ni chairman Reli De Leon.

Samantala, nagpakitang gilas din si My Dear Magnolia matapos manalo sa isa pang PHILRACOM - RBHS na pinakawalan sa pangatlong karera.

Sinakyan ni Conrad Henson, inilista ni My Dear Magnolia ang 1:30.2 minuto sa 1,400 meter race, pumangalawa si Sagitsit, tersero si Kenkenrarabell habang pumang-apat si Chesapeake Bay.

Nakatanggap din ang winning horse owner na si NM Magno ang P10,000 karagdagang premyo.

May 10 karera ang pinasibat ng Metro Manila Turf Club Inc. (MMTCI) kaya naging masaya ang mga karerista sa kanilang pananaya.

Blackburn, nanggulat sa Condition Race

ni Green Lantern @Renda at Latigo | January 30, 2023

Ginulat ni Blackburn ang mga karerista nang manalo sa Condition Race kahapon sa Metro Turf, Malvar sa Tanauan City, Batangas.

Dehadong nanalo si Blackburn kaya marami agad ang nalaglag sa 1st Pick 6 matapos silatin ang magka-kuwadra at outstanding favorite na Magtotobetsky at Robin Hood.

Lumabas na pang-anim ang Blackburn na sinakyan ni jockey Rico Suson, pinanood nito ang matulin sa arangkadahan na Asiong.

Papalapit ng huling kurbada ay umuusad paunti-unti si Blackburn sa unahan at sa may tabing balya ito dumaan.

Pagsapit ng huling 100 metro ng laban sa rektahan ay biglang umagaw ng unahan ang Blackburn at tinawid nito ang meta ng may isang kabayo ang agwat sa pumangalawang Runawayfromrosenot.

Inilista ni Blackburn ang 1:25. 2 sa 1,400 meter race sapat upang hamigin ng winning horse owner na si BC Coching ang P10,000 added prize sa event na suportado ng Philippine Racing Commission, (PHILRACOM).

Samantala, nitong nakaraan ay nasilayan ang husay ni Tell Bell sa Trial Race kaya posibleng isa siya sa babantayan ng kanyang mga katunggali sa magaganap na 2023 PHILRACOM 3-Year-Old Maiden Stakes Race na ilalarga sa nasabing karerahan sa Pebrero 12, 2023, (Linggo).

Ginabayan ni former Philippine Sportswriters Association (PSA) Jockey-of-the-Year awardee Jonathan Hernandez, inungusan ni Tell Bell sina Prime Billing at Glamour Girle na mga kasali rin sa nasabing stakes race.

Ang ibang lalahok sa nasabing malaking karera sa distansiyang 1,400 meter race ay sina Grand Moments, Cash On Hand, Chrome Bell, Melania, Runway Ten at Song Bird.

Nakalaan ang P1.2-M garantisadong premyo, hahamigin ng unang kabayong tatawid sa meta ang P720,000.