Relief goods nasayang, sino ang mananagot?

by Info @Editorial | September 28, 2026

Habang may mga pamilyang naghihintay ng pagkain at tulong tuwing may kalamidad, daang milyong pisong relief goods ang nauwi lamang sa pagkasira at pagkasayang. Hindi ito simpleng kapabayaan. Pera ito ng taumbayan na dapat sana'y naging pagkain at ayuda ng mga Pilipinong nangangailangan.

Walang saysay ang bodega na puno ng relief goods kung hindi naman ito naipamamahagi bago masira. Ang bawat kahon ng pagkaing itinapon ay patunay ng sistemang pumalya—sa pagbili, pag-iimbak, pagmo-monitor, o distribusyon.

Mas nakakagalit dahil sa panahon ng bagyo at sakuna, may mga pamilyang pumipila nang ilang oras para sa kakarampot na ayuda. Paano nasisira ang napakaraming relief goods habang may mga Pilipinong nangangailangan nito?

Hindi sapat ang paliwanag na “expired” o “damaged” ang mga suplay. Kailangang malaman kung sino ang nagpabaya, bakit hindi naipamahagi ang mga ito, at ano ang pananagutan ng mga responsable. 

Kapag daang milyong piso ng ayuda ang nasayang, hindi lang pagkain ang itinapon—pera at tiwala ng taumbayan ang sinira.

P113M ayuda ng DSWD, dinaga, natapon lang

ni Mervin Reyes @News | September 27, 2026

Photo: DSWD

Umabot sa  P106.93 milyong halaga ng relief goods ng Department of Social Welfare and Development (DSWD) ang hindi na napakinabangan matapos pasukin ng mga daga at iba pang peste sa mga bodega nito sa Northern Mindanao.

Ayon sa Commission on Audit (COA), nakaimbak ang mga ayuda sa mga bodega na hindi sapat ang proteksyon.

Sa Ilocos Region, P6.36 milyong halaga ng welfare goods ang itinapon dahil nasira bago maipamahagi o natagalan sa storage dahil sa mabagal na distribusyon at kakulangan sa monitoring ng shelf life.  

Ayon sa COA sa 2025 audit report nito sa Disaster Risk Reduction and Management Fund (DRRMO), nalantad ang mga ayuda sa kontaminasyon, pisikal na pagkasira at pagkabulok dahil sa mga daga at iba pang peste.

Binatikos din ng COA ang hindi maayos na pag-iimbak at kakulangan sa monitoring sa paggalaw ng mga pre-positioned goods sa DSWD field offices sa Ilocos, Calabarzon at Davao Region.

Ayon sa COA, ang kawalan ng epektibong monitoring sa mga nakaimbak na ayuda sa mga bodega ng local government units ay nagpapataas ng panganib ng pagkasira, kontaminasyon, damage, expiration, pagkawala o pag-aaksaya ng pondo ng gobyerno.

“Cash gift para sa mga lolo at lola, lalabas na sa Enero” – Revilla

by Info @Brand Zone | Nov. 6, 2024

• 

Hindi na nila kinakailangan pang umabot ng 100 taong gulang para lamang makatanggap ng cash gift galing sa ating pamahalaan.

Magandang balita para sa ating mga lolo at lola! Sa Enero, ilalabas na ang pondo para sa kanilang dagdag na benepisyo. Ayon kay Senador Ramon Bong Revilla, Jr. na pangunaging nagsulong ng Republic Act No. 11982 o “Expanding the Coverage of Centenarians Act”, libo-libong mga lolo at lola ang makikinabang oras na ilabas na ang pondo para dito.

Sakop nito ang ating mga lola at lola na may edad na 80, 85, 90 at 95 at sila ay tatanggap ng P10,000 batay sa isinulong na batas ni Revilla. Patunay ito ayon sa mambabatas na tuloy ang trabaho sa Senado at hindi siya nagbubutas ng bangko.

"Layon po ng batas na ito na mapaaga ang pagbibigay natin ng benepisyo para sa ating mga lolo at lola. Hindi na nila kinakailangan pang umabot ng 100 taong gulang para lamang makatanggap ng cash gift galing sa ating pamahalaan. 80 pa lang, bibigyan na natin sila agad. Pagdating ng 85, 90, at 95, bibigyan ulit natin sila. At kung ipagkaloob ng Panginoon na sila ay umabot ng isang daang taon, bibigyan natin sila ng mas malaking halaga bilang pagkilala sa kanilang narating,” saad ni Revilla.