Pang-forever na?! JAKE AT RABIYA, TANGGAP NA NG PAMILYA NG ISA’T ISA

ni Reggee Bonoan @Sheet Matters | May 21, 2026

Photo: IG _juancarloscuenca

Suportado ni Jake Cuenca ang girlfriend niyang si Rabiya Mateo sa medical school nito kaya naman bago ang pasukan sa Agosto 7 ay nagliliwaliw muna sila, at ang latest ay sa Hong Kong.

Sobrang proud si Jake sa girlfriend niya dahil itutuloy nito ang matagal nang pangarap na maging doktor tulad ng amang Indian-American na si Syed Mohammed Hashmi.

Natapos ni Rabiya ang kursong Bachelor of Science in Physical Therapy, cum laude sa Iloilo Doctors College noong 2018, at sa parehong taon ay naipasa niya ang board exam.

Gusto niyang ituloy ang medisina at sa katunayan ay siya ang nanguna sa buong bansa sa pagsusulit ng National Medical Admission Test o NMAT sa gradong 741. Naudlot lang ito dahil sumabak siya sa beauty contest at siya ang nag-represent ng Pilipinas sa 69th Miss Universe (MU) Competition na ginanap sa Florida, USA.

Going back to Jake, bago pala naging magkarelasyon ang dalawa ay plano nang ituloy ni Rabiya ang pagdodoktor at sa katunayan ay hindi na siya nag-renew ng kontrata sa GMA Network.

“Ayaw na n’yang mag-artista, hanggang hosting na lang, ayaw na n’yang mag-taping or shooting kasi nga magiging abala sa pag-aaral n’ya,” kuwento ng taong malapit sa dalaga.

Sa pagkakakilala namin kay Jake ay mukhang si Rabiya na ang gusto niyang makasama sa buhay dahil talagang suportado niya ang dalaga at willing to wait siyang makatapos ito ng pag-aaral.

Kung tama ang timeline namin ay nasambit noon ni Jake na magse-settle na siya sa edad na 30 hanggang sa naurong at naging 35, at ngayon ay magti-39 na siya sa December 30.

Ilang taon ang hihintayin ni Jake, lima o anim na taon?

“Eh, malamang nasa 43 years old na s’ya. Okey lang naman sa lalaki na ru’n pa lang s’ya magsisimula ng pamilya, at si Rabiya (29 yrs. old ngayon), nasa 35? Puwede na, financially stable naman na si Jake kaya kahit late na s’yang mag-asawa, okay lang,” kuwento naman ng kampo ng aktor.

Isa pang nalaman namin ay ipinakilala na ni Rabiya si Jake sa pamilya niya at sobrang natuwa ang aktor dahil ‘idol’ ang tawag sa kanya ng kapatid ng dalaga.

Pagdating naman sa pamilya ni Jake, tanggap din nila si Rabiya at nagkaroon na ng maayos na pag-uusap na hindi binanggit kung tungkol saan.

Ang mga katangiang nagustuhan ni Jake Cuenca kay Rabiya Mateo ay ang pagiging simpleng babae nito, hindi gumigimik o mahilig lumabas maliban kung trabaho, marunong sa bahay, at higit sa lahat ay matalino.

---

SAGOT ng ABS-CBN ang pagiging homesick ng mga Kapamilya.

Manatiling ‘together forever’ at konektado sa mga mahal sa buhay sa sabay-sabay na panonood ng minamahal na ABS-CBN shows sa Kapamilya Online Live at iWant, na nae-enjoy ang 24/7 online viewing saanman sa mundo.

Naglunsad ang ABS-CBN ng bagong nakakaantig na video tampok ang mga overseas Filipino workers at kung paano tila nagagamot ang kanilang pagiging homesick dahil nakakanood sila ng Kapamilya shows sa Kapamilya Online Live sa YouTube (YT) at sa iWant kasabay ng mga mahal nila sa buhay na nasa Pilipinas.

Ang naturang video ay parte ng ‘Together Forever’ campaign bilang pasasalamat sa walang hanggang suporta ng mga Kapamilya sa mga programa at artista ng ABS-CBN.

Napapanood ang Kapamilya Online Live sa ABS-CBN Entertainment YT, ang most-subscribed media and entertainment channel sa Southeast Asia na may 54.8 milyong subscribers. Handog nito ang mas pinasayang libreng panonood ng kasalukuyang umeereng mga programa ng ABS-CBN, pati na rin ang classic shows na maaaring i-replay.

Ilan sa mga napapanood dito ay ang Blood vs. Duty (BVD), The Alibi (TA), It’s Showtime (IS), at TV Patrol (TVP), kabilang din ang paboritong weekend game shows na Kapamilya Deal or No Deal (KDOND) kasama si Luis Manzano at Everybody, Sing! (ES) kasama si Vice Ganda.

Mapapanood din ngayong taon sa Kapamilya Online Live ang inaabangang primetime action series na Coco Martin’s Sigabo na pagbibidahan nina Coco Martin at Julia Montes.

Hindi rin mahuhuli sa chikahan sa Kapamilya Online Live dahil puwedeng makipag-usap sa iba pang Kapamilya saanman sa mundo habang sabay na nakatutok sa panonood sa pamamagitan ng live chat box.

Damang-dama rin ang aksiyon, drama, at kilig sa panonood sa iWant na may pinakamalaking koleksiyon ng Filipino feels. 

Bukod sa live programming ng ABS-CBN at full episodes ng primetime shows, available rin dito ang classic teleserye, blockbuster movies, at mga bagong iWant Original kabilang ang mga microdrama.

Mapagpipilian ang mga bagong palabas tulad ng The Secrets of Hotel 88 (TSOH88), kung saan available ang episodes pitong araw bago ipalabas sa TV, at ang microdrama na The Chambermaid’s Daughter (TCD). 

Dapat namang abangan ang iba pang Originals tulad ng Miss Behave (MS) at Nurse the Dead (NTD).

Tumutok sa Kapamilya Online Live at mag-subscribe sa ABS-CBN Entertainment YT channel. 

Away nila ni Sen. Kiko, ‘wag na raw pakialaman… SEN. ROBIN: USAPANG LALAKI SA LALAKI NA PO ‘YAN

ni Reggee Bonoan @Sheet Matters | May 20, 2026

Photo: Robin Padilla - Senate PH

Eksklusibong nakausap ni Karen Davila for TV Patrol (TVP) si Robin Padilla nu’ng Lunes nang gabi tungkol sa umano’y kasama niyang lumabas ng Senate building si Sen. Bato dela Rosa nu’ng Mayo 14.

Tanong ng kilalang broadcast journalist, “Senator, sinamahan n’yo po ba si Sen. Bato dela Rosa na umalis ng Senado kasi po inamin po sa amin ni General Mao Aplasca, Senate head security, sa TV Patrol na kayo ni Dela Rosa ay naglalakad casually at umalis kayo ng 2:30 AM?”

Malumanay na sagot ng senador, “Ako po ay humihingi ng paumanhin sa inyo na ‘di ko po ‘yan masasagot sapagkat ito po ay naging opisyal nang imbestigasyon kaya ang pinakamaganda po rito ay ako po ay makapaghayag muna kung sino po ang aatasan ng gobyerno na mag-imbestiga.”

Sundot ni Karen, “Pero, Senator, bakit ‘di n’yo po ito masagot? Itinuturing n’yo po bang pugante si Dela Rosa? Tumulong po ba kayo sa pugante?”

Natawa si Sen. Robin sa tanong ni Karen.

“Hindi po ‘yan ang posisyon ng mayorya ng Senado. Ang posisyon po namin ay ‘di po tinatanggap ang warrant of arrest galing sa ICC (International Criminal Court). Ang inaantay po namin ay ang warrant of arrest ng local court,” paliwanag nito.

Tanong ulit sa senador kung naniniwala siyang hindi pugante si Dela Rosa at bakit hindi nito masagot kung sinamahan niyang umalis ito ng Senado.

“Kumbaga, ang paniniwala n’yo ay he’s a free man, lumabas lang ng Senate. So, mali po ba ‘yun kung sinamahan ninyo s’ya, Sir?” tanong ulit ng news anchor.

“Ay, ‘di po, kailangan muna nating malaman kung ano ang...” pabitin nitong pahayag. 

“Alam n’yo po, respeto po ‘yan sa otoridad. Ayoko po na ako ay magbibigay ng hayag kaagad sa media.

“Mas maganda po pagkatapos po akong maghayag at nakuha nila ang imbestigasyon nila, handa na po akong humarap sa media. Pero hangga’t ‘di pa po ako nakakapaghayag sa kanila, mas maganda po na antayin po natin ‘yung oras na ‘yun bilang respeto po sa otoridad,” diing sabi ni Robin.

Si Sen. Robin Padilla ang chairman ng Public Information and Mass Media bukod sa chairman din ng Committee on Cultural Communities and Muslim Affairs.

Tungkol naman sa nahuli ng kamerang umaakyat si Sen. Robin sa hagdanan at nagsabi sa media ng “Umalis na kayo, delikado,” mabilis na sagot ng senador, “‘Yan, puwede po tayong magkomento d’yan kasi ‘di naman po ‘yan opisyal na imbestigasyon.

“Ang nangyari po n’yan kasi, nag-aantay po kami ng caucus sapagkat nandu’n po kami sa opisina ni SP (Senate President). Inaantay po namin ‘yung padala ng House of Representatives, ‘yung impeachment.

“Nu’ng nandu’n po kami, sinabi ng mga namumuno rito na meron na pong mga armadong tao sa paligid ng Senado. Lilinawin po natin, sa paligid ng Senado!

“Kaya ang sabi ko po, ‘Teka muna, bakit nagkaroon ng armado rito?’ Nu’ng narinig po ito ni Sen. Bato, s’ya po ang nagsabi na, ‘Baka aarestuhin ako?’ Ang sabi naman n’ya sa mga kasama naming senador, mas mainam na ru’n na lang s’ya sa opisina n’ya kasi malalagay sila sa alanganin, ‘yung ibang senador kung nandu’n s’ya.

“Kaya ‘yung nakunan po ninyo na umaakyat po kami, ‘yun po ‘yung papunta kami sa opisina niya at nu’ng nakunan naman po ako, nanggaling ako sa second floor, ‘yun po ‘yung tiningnan ko kung ano ‘yung nangyari.

“Sabi kasi, nagkaputukan kaya po ako bumaba, tiningnan ko ‘yung mga kasama naming senador kung okay sila at okay naman po at nakita naman namin, okay ang media kaya po umakyat na ako. Eh, sumusunod po ‘yung media kaya ang sabi ko sa media, ‘‘Wag na kayong sumunod at delikado at may mga tao nang nakapasok.’ ‘Yun lang po ‘yun,” balik-tanaw ng aktor-pulitiko.

Nasambit din ni Karen kay Sen. Robin na kumalat sa social media na ang mga tauhan daw nito ay may mga dalang armas.

Tumawa nang husto si Robin. 

Aniya, “Unang-una, alam po lahat ng tao rito sa Senado na wala po akong bodyguard. ‘Di po ako nagba-bodyguard kahit sino po ang tanungin n’yo rito.

“Ako po ay dumarating dito sa Senado, isang kotse at isang aide. Kailanman ay ‘di po ako nagkaroon ng bodyguard dito, tanungin n’yo. Puwede naman kayong magtanong dito.”

Samantala, nabanggit ng NBI na person of interest si Robin kaya ano ang reaksiyon niya rito?

“‘Yun po ang dahilan,” saad nito kung bakit hindi nito sinasagot ang mga tanong ni Karen.

Tinanong din ni Karen kung makiki-cooperate siya sa imbestigasyon ng NBI.

“Opo, batas po ‘yan ng Pilipinas. Ako po ay handang sumailalim sa kanilang imbestigasyon at kahit pumunta sila rito sa Senado, ako’y handang magbigay ng aking statement sa kanila. Basta opisyal at batas po ng Pilipinas,” sagot kaagad ng senador.

Samantala, natanong din ni Karen kung bati na sina Sen. Robin at Kiko Pangilinan.

Nagkaroon ng hindi pagkakaunawaan ang dalawang senador nang sitahin ni Sen. Kiko si Sen. Robin dahil habang nagsasalita ang una tungkol sa ICC warrant of arrest ni Sen. Bato dela Rosa ay panay ang interrupt ng huli.

Medyo tumaas ang boses ni Kiko, bagay na pinalagan ni Robin kaya nagde-demand siya ng public apology at hiling din ng huli na tanggalin ito sa record ng Senado.

May kumalat ding video na lumapit si Sen. Pangilinan kay Sen. Padilla para makipagkamay, tanda na nakikipag-ayos na.

“Alam n’yo po, usapang lalaki sa lalaki na po ‘yan. Siguro po, amin na lang po ‘yan. Sa gulo ng Pilipinas, hindi na po kami makikisali pa ni Sen. Kiko Pangilinan dahil puwede naman itong ma-solve ng mga lalaki,” nakangiting sagot ng senador.

Sabi pa ni Karen, bakit nanghihingi ng apology si Padilla kay Pangilinan sa plenaryo?

“Dalawa po ang hinihingi natin. Una, tanggalin po sa record ng Senado ‘yung pagsigaw n’ya.

‘Yun po ay on record kasi, ‘di po maganda sa mga darating na henerasyon na makita ‘yan ng mga Muslim na ang isang Muslim senator ay sinisigaw-sigawan dito sa Senado.

“Pangalawa po ay du’n din po sa plenaryo na makahingi ng paumanhin. ‘Yun lang naman po ‘yun, saka tapos na po ‘yan. ‘Wag na po tayong makigulo pa,” paliwanag ni Sen. Robin Padilla.

Nag-solo na ng bahay… ANDREA, HINAYAAN NA NG MADIR SA PAG-IBIG DAHIL SAKIT SA ULO

ni Reggee Bonoan @Sheet Matters | May 19, 2026

Photo: IG @blythe

Isang buwang puro sabaw lang ang hinigop ni Andrea ‘Blythe’ Brillantes dahil sa ipinalagay niyang piercing sa dila niya para sa pelikulang ginawa na ipapalabas sa ibang bansa.

Napansin ni Karen Davila na may piercing sa dila si Andrea nang makapanayam niya ito at sinabihang empowered and liberal young woman ito. 

“Why did you do that?” tanong ni Karen.

“Actually, it was for a role. Meron po akong movie na ‘to ‘yung pinakaseryoso at pinressure ko talaga ang sarili ko na seryosohin kasi may pagka-dark (istorya) ‘yung role ko at in-isolate ko pa ‘yung sarili ko for this and everything, at kailangan, may certain look.

“Kaya sabi ko lang, para mas maging hardcore, sabi ko sa direktor, ‘Gusto mo, magpa-pierce ako? Eh, tara, gagawin ko ‘yun after ng meeting na ‘to.’ Kaya after ng pitch, nagpa-pierce agad ako at ikini-keep ko lang kasi grabe ‘yung pinagdaanan ko at sayang lang naman kasi ‘yung one month, two months na healing ko na ‘di ako nakakain, puro lang ako sabaw, so kineep ko na kasi sayang at paano kung gustuhin ko na rin?” kuwento ni Blythe.

Isa pang natanong ni Karen ay kung ano’ng nagpapayag kay Andrea na mag-pose nang sexy bilang Calendar Girl ng isang liquor brand gayung kabaligtaran ito sa naaalala sa kanya ng lahat sa seryeng Annaliza noong 2013 kung saan inosente ang role niya. 

Ano ang gusto niyang i-prove bilang aktres?

“I feel like it’s not right for people to assume na everytime a woman dresses up in a certain way o ‘pag revealing, people will always ask questions, ‘What are you trying to prove?’ I don’t think people ask the same question to men.

“‘Pag babae, ang dami nilang (netizens) sinasabi. Ako, wala po akong itina-try i-prove. ‘Di ko ginawa para basagin ‘yung image na Annaliza. I just did it because simply I can and I want to,” katwiran ni Andrea.

Naikuwento rin ng dalaga na may napanood siyang payo mula sa babaeng senior citizen na edad 60 na gawin lahat ng younger generations o early 20s na magsuot sila ng bikini at mag-pose nang mag-pose dahil ang katawan ng babae ay nagbabago kapag nabuntis, nag-menopause, atbp..

Kaya para kay Andrea, “Ipo-flaunt ko ‘to (katawan ko). I didn’t do it because of this and that. Ginawa ko kasi kaya ko and I want to. Nag-sexy calendar ako kasi sexy ako!”

Nakabukod na si Andrea sa pamilya niya pero every week naman ay nagkikita sila ng nanay niya at araw-araw na nagtatawagan para hingan niya ito ng advice lalo na kapag may mga offers sa kanya.

“Mas may freedom lang ako now at may tiwala naman si Mama at mas hinahayaan ako ni Mama sa (pag-ibig), bahala na raw ako kasi ayaw ni Mama na sumakit ang ulo n’ya. 

“Ang natutunan ko kay Mama ay alagaan ko (ang) sarili ko, importante, maayos ako lagi. Kasi sa mundo natin now, people treat you differently ‘pag iba ang ayos mo sa sarili mo,” pagbabalik-tanaw ng aktres.

Well, hindi pa rin nawawala ang mga bashers ng aktres, pero hindi niya pinapansin ang

mga ito dahil may pangarap siya at ayaw niyang magpaapekto.

“‘Di ko hahayaang sirain nila (bashers) o hindi ko makuha ‘yung mga pangarap ko dahil I make mistakes. I don’t think reason ‘yun to stop or quit. May mga gusto ako, eh. May mga kailangan akong bayaran, guys, may mga gusto akong bilhin, may mga gusto akong marating kaya gagawin ko ‘yun kahit i-bash nila ako (todo),” katwiran pa ng dalaga.

Sa kasalukuyan ay maganda ang feedback sa seryeng A Secret in Prague (ASIP) na sina Andrea Brillantes at Enrique Gil ang mga bida at napapanood ito sa TV5 at Netflix.