Naipit sa gitgitan, sumigaw at umiyak… NETIZENS SA MGA ANAK NI SEN. JINGGOY: KAMI NGA, ARAW-ARAW NAIIPIT SA TRAFFIC, NALULUNOD SA KONTING BAHA

ni Reggee Bonoan @Sheet Matters | May 31, 2026

Photo: Jinggoy Estrada / FB

Napasigaw at umiyak ang mga anak ni Sen. Jinggoy Estrada na sina dating San Juan City Vice-Mayor Janella Marie Ejercito at bunsong si Julienne ‘Jill’ Ejercito dahil nagitgit sila ng media na gustong makapanayam ang kanilang ama nu’ng Biyernes nang hapon.

Nagpunta sa Sandiganbayan Second Division Clerk of Court si Sen. Jinggoy para mag-post ng bail na aabot sa P90 thousand para sa kasong plunder at graft kasama ang asawang si Gng. Precy Vitug-Ejercito at dalawang anak.

Base sa video na inilabas ni Joseph Morong ng GMA News sa kanyang Facebook (FB), inaabangan ng media ang senador palabas ng elevator at nang lumabas ay naggitgitan na. 

Pinatatabi naman sila ng security ng gusali para bigyang-daan ang mag-anak, pero dahil sadyang masikip ang daan at napakaraming TV reporters at media, hindi maiwasang magkaroon ng tulakan at gitgitan.

Nakarinig kami ng malakas na sigaw na, “Ano ba!” at pasimpleng kinunan si Janella na siya pala ang nanigaw sa mga tao.

Kaagad namang pinatabi ng security ang mga nag-uunahang kunan ng larawan si Sen. Jinggoy at inalalayan naman sila habang papasok sa kuwarto.

Biglang nakarinig ng malakas na sigaw at iyak na nagmula naman sa bunsong anak na si Jill dahil naipit daw siya, kaya niyakap siya kaagad ng inang si Precy habang papasok sa nasabing kuwarto.

Ang caption ng video ni Joseph Morong ng GMA News ay naipit daw ang bunsong anak ni Sen. Jinggoy at nasaktan dahil sa gitgitang naganap sa Sandiganbayan.

At pagpasok sa isang kuwarto ay makikitang nakaupo na ang senador habang naghihintay at nakatayo naman ang anak na si Janella.

Binasa namin ang lahat ng komento sa post ng GMA News reporter na pawang negatibo ang reaksiyon sa pag-iyak ng anak ng senador.

Sey ng mga netizens:

“Hahahaha! Para ‘yan lang? Araw-araw naming kinakaharap ‘yan sa biyahe. Pwe!”

“Nakakaawa, ‘di ba? Samantalang ang mga Pilipino, araw-araw naiipit sa traffic. Marami na ring nalunod sa baha kahit kaunting ulan lang. Samantalang SILA, ilang dekadang nagpasarap sa pera ng mga naiipit sa traffic at nalunod o nalulunod sa baha!”

“Naks! Parang sila pa inaapi ngayon.”

“OA. Kung kami ngang mananakay ng jeep, nagkakaipitan at halos magkapalitan pa ng mukha, okay lang. Masaya lang na may balyahan nga.”

“Try mo mag-MRT (Metro Rail Transit) o LRT (Light Rail Transit). Arte pa. Hahaha!”

“Grabe, OA. Hahaha! ‘Pag nahahagip ng camera, may paiyak at sigaw agad.”

Hindi na namin isinulat ang iba pang komento dahil personal na, pero may ilan kaming nabasa na sana ay hindi na lang sumama ang mga bata dahil alam naman nila ang magiging senaryo.

Sa ganang amin, siyempre ay gustong suportahan ng mga anak ang tatay nila.

Anyway, may hiling daw si Sen. Jinggoy Estrada, ayon kay DILG Secretary Jonvic Remulla.

“Ang concern n’ya ay ‘yung tuhod n’ya na kailangan ng knee replacement surgery. Sabi ko, it’s beyond our jurisdiction. Sa Sandiganbayan na lang s’ya magpapaliwanag,” sabi nito sa mga reporters.

---

MAS umiigting ang aksiyon at tensiyon sa Blood vs. Duty (BVD) habang unti-unting nabubunyag nina Richard Gutierrez at Gerald Anderson ang katotohanan sa likod ng pagpapakalat ng ilegal na armas sa bansa.

Tuluyan nang natuklasan ni Marcus (Richard) ang sabwatan ng ilang awtoridad at kriminal na grupo sa operasyon ng smuggling sa kanyang pag-iimbestiga sa Isla Damai.

Samantala, ipinagpapatuloy naman ni Jalil (Gerald) ang kanyang pagpapanggap bilang pulis upang mas mapalalim ang imbestigasyon matapos niyang mapagtagumpayang iligtas ang kanyang adoptive father na si Datu Rahman (Jaime Fabregas).

Dala ng matinding galit at hangaring makamit ang hustisya para sa pagkamatay ng kanyang mga magulang, nakipagtulungan si Lara (Bela Padilla) kay Felix (Baron Geisler) upang mabawi si Datu Rahman mula kay Jalil.

Sa gitna ng lumalalang panganib, patuloy kayang paghihiwalayin ng tadhana sina Marcus at Jalil dahil sa kanilang tungkulin at magkaibang paniniwala, o matutuklasan kaya nila na pareho ang kalabang kinakaharap nila kaugnay ng planong destabilisasyon laban sa gobyerno?

Huwag palampasin ang BVD mula Lunes hanggang Biyernes, 8 PM sa ABS-CBN sa ALLTV2, A2Z, Kapamilya Channel, iWant, at Kapamilya Online Live (KOL) sa YouTube (YT) at Facebook (FB).

Sa mga nang-bully sa kanilang pamilya… ROB SY: NAWA’Y MAPATAWAD KAYO NI LORD

ni Reggee Bonoan @Sheet Matters | May 29, 2026

Photo: Rob Sy

Naglabas ng official statement ang aktor na si Rob Sy sa kanyang Facebook (FB) account na dismissed ang inihaing Child Abuse complaint sa Manila City Prosecutor’s Office ng aktor-pulitiko na si Alfred Vargas at ng kanyang asawang si Yasmine Vargas.

Matatandaang inakusahan nina Alfred at Yasmine sina Rob at partner nito ng diumano’y pagsasawalang-bahala sa kanilang reklamo na binu-bully ng anak ng huli ang kanilang 8-year-old na anak. 

Narito ang nilalaman ng statement ni Rob Sy:

“OFFICIAL STATEMENT — (On the Dismissal of the Child Abuse Complaint filed before the Manila City Prosecutor’s Office)

“Malugod po naming tinatanggap ang May 12, 2026 Resolution na inilabas ng Office of the City Prosecutor of Manila na nagbasura sa criminal complaint for alleged child abuse under R.A. 7610 na isinampa laban sa amin.

“Sa sampung (10) pahinang resolusyon, nakita ng Manila City Prosecutor's Office na walang sapat na ebidensya o prima facie case para kami ay makasuhan ng criminal, lalo na para magpakita ng anumang reasonable certainty of conviction sa korte. ‘Di po bully ang aming anak at sinisiguro po namin na s’ya ay aming pinapalaki nang maayos, at kung nagkakamali ay aming itinatama at dinidisiplina. Gaya ng maayos na pagpapalaki sa amin ng aming mga magulang, hangad din namin na mapalaki nang tama ang aming anak.

“Consistent po rito, tahasan ding sinabi sa Resolution na ang mga alegasyon ay ‘merely based on speculation,’ at muling pinagtibay ang isang pangunahing prinsipyo sa batas na ‘ang alegasyon ay ‘di ebidensya.’

“Mula pa lamang sa simula, nanindigan kami na ang reklamong ito ay isang kalkuladong ‘narrative reversal’ at isang pagtatangkang baliktarin ang tunay na pangkalahatang kuwento gamit ang media portrayals at emotional theatrics imbes na objective facts at totoong ebidensya.

“Sa kabila ng online hostility, cyberbullying, at maagang paghusga ng ilan na aming tiniis sa buong ordeal na ito, pinili naming ‘wag sumabay sa pampublikong drama.

“Sa halip, umasa kami sa tahimik ngunit matibay na bigat ng objective truth, verified clinical psychological evaluations, at institutional validation mula sa mga tamang awtoridad.

“Lubos ang aming pasasalamat sa Office of the City Prosecutor ng Maynila para sa patas, masusi, at objective nilang pag-evaluate sa mga ebidensya.

“Nagpapasalamat din kami sa aming mga pamilya, mga co-parents, at sa mga nagtestigo na lakas-loob na humarap nang kusang-loob sa Manila Prosecutor's Office para tahasang isalaysay at ipaliwanag ang kanilang mga nasaksihan. Malaking pasasalamat din sa aming mga swimming teams, mga nagmamahal na kaibigan, at lalo na sa aming abogado na si Atty. DJ Jimenez (The Pinoy Street Lawyer Official), na matatag na tumayo sa tabi ng aming pamilya lalo na sa anak namin. Salamat din sa mga grupo at indibiduwal na kahit ‘di namin personal na mga kakilala ay nagpaabot ng kanilang suporta at ‘di nagpadala sa anumang one-sided public narratives.

“Bagama’t nauunawaan namin sa paliwanag ng aming abogado na maaari pa itong iapela o humaba pa sa legal na proseso, ang dismissal o pagbabasura na ito ay isang mahalaga at kinakailangang vindication para sa aming pamilya, lalo na sa aming anak.

“Moving forward, ang ultimate goal namin ay tuluyang ma-‘fireproof’ ang aming anak mula sa epekto ng masakit na kabanatang ito. Ang absolute priority namin ay protektahan ang kanyang kapayapaan, emotional security, at overall well-being, at siguraduhing lalaki s’yang ligtas, matatag, at protektado ng katotohanan. Sa ibang mga menor-de-edad na nadamay, hangad namin na kayo ay maprotektahan at malagpasan ninyo ang anumang epekto ng mga pangyayaring ito na ‘di lamang na-confine sa loob ng City Prosecutor’s Office kundi lumabas at naging laman din ng pampublikong diskurso.

“Sa lahat ng ating nasa gobyerno na lehitimong nagsusulong ng anti-bullying, ‘di lamang dapat ito pang-pulitika kundi kailangang isabuhay. Public office is a public trust at ang pambu-bully sa mga bata, matanda, babae, lalaki, LGBTQ, may kakayahan man sa buhay o wala, pulitiko man o hindi ay hindi kailanman nagiging tama at maaaring mapatawan ng kaukulang parusa.

“Apela rin po at panalangin sa mga naunang nanghusga sa amin, na marahil nadala lang sa maling naratibo, nawa’y magsilbing aral sa inyo na ang bugso ng damdamin ay walang naidudulot na mabuti lalo na sa mga bata at menor-de-edad. Imbes na kampanya laban sa pambu-bully sa anumang paraan, tila kayo na ang naging bully sa inyong iresponsableng mga pahayag at mga direktang pananakot sa amin.

“Nawa’y mapatawad kayo ng nasa Itaas at gaya ng lagi naming sinasabi mula pa noong simula, ang Panginoong Diyos ang aming ultimate protector.

“God bless us all po. Madamo gid nga salamat! (Maraming salamat) #PraiseBeToGod #TheTruthPrevailed #ROBSY.”

Bukas ang BULGAR sa panig ni Konsehal Alfred Vargas.

---

BLIND ITEM:

AWARE kaya ang baguhang singer na ginagaya ang boses nina Maki, Cup of Joe (COJ) at iba pang paus-pausan na sintunado siya?

Nagtataka lang kami kung bakit panay ang post ng baguhang singer sa social media ng mga performances niya gayung sintunado naman at hindi ba siya sinabihan ng mga ka-banda niya pagkatapos ng production number nila?

Baka naman nagpapapansin ang baguhang singer sa Viva Records, Star Music, UMG o Tarsier at ang bagong CAT records?

Anyway, siguro ay need pang magpraktis ng baguhang singer para hindi siya mapulaan ng mga makakapanood ng video niya.

May hitsura kahit paano ang baguhang singer at kapag sumikat ang kanta niya, posibleng pagkaguluhan din siya ng mga fans.

Sa kasalukuyan ay walang regular gig ang baguhang singer. Parang isinasama-sama lang siya ng mga kaibigan niya sa industriya para masanay at mapansin siya, at napansin naman namin, sintunado nga lang.

Binati nu'ng b-day, dedma… KIM, IBINUKING NA NAGPA-FREEZE NG EGGS, NA-BAD TRIP DAW KAY BELA

ni Reggee Bonoan @Sheet Matters | May 28, 2026

Photo: IG _chinitaprincess

Follow-up ito sa nasulat namin dito sa BULGAR noong Mayo 24, Linggo, na mahirap katrabaho at sakit ng ulo umano ng production ng Blood vs. Duty (BVD) si Bela Padilla.

Si Ogie Diaz ang unang nagbalita tungkol sa aktres sa Showbiz Update (SU) vlog nila ni Mama Loi kasama sina Ate Mrena at Tamerlane Mopia. Nagsimula ito sa post ng aktres sa kanyang Instagram (IG) Stories tungkol sa eksenang ginalingan niya ang pag-arte pero hindi siya ang day ender.

Aniya, “When you give it your all pero ‘di man lang pala s’ya day ender.”

Nag-react si Ogie sa naturang post at sinabing walang karapatan si Bela na kuwestiyunin ang desisyon ng production o editor kung alin ang magiging day-ender na eksena.

Bukod dito, hindi rin umano gusto ni Bela ang co-star niyang si Baron Geisler dahil nagkaroon daw sila ng hindi pagkakaunawaan. 

Ayon sa sources ni Ogie, namutawi raw sa bibig ng aktres ang salitang ‘retarded’ laban sa aktor.

“Alam mo, nabalitaan ko, hinahabaan ni Baron ang pisi n’ya kay Bela. Sabi kasi ni Baron, ‘Nagbago na kasi ako. Isang pagkakamali ko lang, silat (masisira) na naman ako,’” kuwento ni Ogie.

Nabanggit din na dahil nakilala noon si Baron na mainitin ang ulo, konting pagkakamali lamang ay agad siyang napagbibintangan ng mga netizens. Kaya umiiwas na raw siya sa gulo dahil kahit hindi naman niya kasalanan ay siya pa rin ang naituturo.

At heto, may follow-up pa si Ogie tungkol kay Bela dahil marami pa palang nangyayari sa set na sa pakiwari namin ay sadyang ibinahagi para makarating sa aktres.

Sey niya, “Nanganak ang isyu. ‘Ay, naku, kung alam mo lang, Ogie, maldita talaga ang babaeng ‘yan!’ Uy, ayoko namang husgahan si Bela. Ito ‘yung mga nakakarating sa amin. 

“S’yempre, open naman ang Ogie Diaz Showbiz Update sa panig ni Bela, o kaya kung gusto n’yang mag-post sa sarili niya, mag-post siya.”

Binasa rin ni Ogie ang mensahe ng isang source:

“Nagpa-interview dati si Bela kay Karen Davila at 99% daw ay ‘di s’ya agree kay Robin Padilla pero iginagalang naman n’ya. Mahilig daw si Bela sa validation mula sa ibang tao. Clout chaser ‘yan. Okay lang naman na ‘di s’ya agree kay Robin, pero ano ‘yung 99% of the time na ‘di s’ya agree?”

Dagdag pa ni Ogie, “‘Di natin ini-invalidate ang feelings ni Bela. May issue ba si Bela kay Robin? ‘Di ba naging mabuting tao si Robin kay Bela? Tanong ‘yan ng aking source.”

Say naman ni Mama Loi, “Eh, ‘di ba si Kylie Padilla, sinasabi rin n’ya openly na hindi s’ya sang-ayon sa lahat ng pinaniniwalaan ng papa n’ya?”

Pagpapatuloy ni Ogie, “Kahit naman ako, magkaiba kami ng kulay ni Robin. ‘Di rin ako agree sa ilang paniniwala n’ya. Pero kasi, magkamag-anak sila. Sabi ng source ko, parang ‘di naman daw kamag-anak si Bela ng mga Padilla. Buti pa raw si Daniel Padilla, wala kang maririnig kahit magkaiba ang kulay nila.”

“‘Di kaya, Tito Ogie, parang pinapaingay lang ‘yung teleserye nilang Blood vs. Duty?” opinyon naman ni Dyosa Pockoh.

“Ang dinig ko nga, medyo ‘di kasundo ni Bela ang ilang staff. ‘Di naman lahat, pero may mga staff na ‘di n’ya kasundo.

“Alam mo, ‘yan ang itinuturo ko sa workshop sa mga baguhan. Kailangan sa unang tuntong n’yo pa lang sa teleserye ay magaan na ang dating n’yo sa staff. Dapat mabait kayo sa kanila. Kasi ang mga PA (personal assistant) na ‘yan, lalaki ‘yan balang araw. Magiging EP (executive producer), supervising producer, production manager. ‘Pag namarkahan kayo dahil maldita kayo, kahit sa pitching, wala, butata kayo,” esplika ni Ogie.

Sang-ayon kami sa sinabi ng talent manager at content creator dahil marami kaming kilalang dating nasa mababang puwesto sa production na tumaas ang ranggo. 

Perfect example si Cory Vidanes na nagsimulang production assistant hanggang maging Chief Operating Officer (COO) ng ABS-CBN. Kaya mahal siya ng production people dahil mahusay siyang makisama.

Going back to Robin, sinabi ni Ogie, “Again, ‘di natin ini-invalidate ang narrative ni Bela dahil opinyon n’ya ‘yun tungkol sa Tito Robin n’ya.”

Hirit naman ni Mama Loi, “Saka we can always agree to disagree. Pero gaya nga ng sinabi mo, ano bang mas matimbang, blood o duty? Ay, may branding! Hahaha! JRB!” sabay bati sa business unit head. 

Aniya pa, “Nag-guest tayo r’yan. Napanood n’yo na po ba?”

Samantala, hindi na rin umano okay ang pagkakaibigan nina Kim Chiu at Angelica Panganiban kay Bela sa grupong tinawag na AngBeKi dahil hindi na raw nila ito pinapansin.

Kuwento ni Ogie, “‘Di na sila napagkikitang madalas na tatlo. Ang nakikita na lang ay sina Kim at Angelica.”

Nag-ugat umano ang hindi pagpapansinan nang mag-guest si Bela sa Fast Talk with Boy Abunda (FTWBA) at mabanggit niya na nagpa-freeze ng mga egg cells si Kim.

Binasa ni Ogie ang komento ng isang netizen sa showbiz website:

“‘Di yata napapansin ni Ogie na ever since naikuwento ni Bela kay Boy Abunda na nagpa-freeze ng eggs si Kim ay nawalan na sila ng interactions kay Bela.

“Nag-post s’ya ng birthday greetings kay Kim pero hindi ni-like ni Kim. ‘Di rin nag-post ng birthday greetings si Kim noong birthday naman ni Bela. Madalas mag-usap sa social media sina Kim at Angelica at nagpadala pa ng flowers si Angelica sa birthday ni Kim.”

Sa opinyon ng netizen, baka na-out of context ang ginawa ni Bela kaya posibleng nagalit si Kim dahil bakit kinailangan pang siya ang unang magkuwento tungkol sa pagpapa-freeze ng egg cells ng kaibigan niya.

“Napangunahan!” parehong sabi nina Mama Loi at Ogie.

“So, adelantada (nangunang magsalita) si Bela?” diin ni Dyosa Pockoh.

“So, ano ‘to? May gap ba sina Bela at Kim? At may gap din ba sina Bela at Angelica? Sina Kim at Angelica ba ang magkakampi ngayon against Bela?” tanong ni Ogie.

Ayon pa kay Ogie Diaz, dapat na masagot ni Bela Padilla ang mga komento at isyung lumalabas ngayon sa social media.

Bukas ang BULGAR sa panig ng aktres.