Aktor, nakipagmiting sa GMA execs, 'di siya isinama… WILLIE, MASAMA ANG LOOB KAY JOHN LLOYD, OUT NA

SA SITCOM NILA?

ni Reggee Bonoan - @Sheet Matters | June 23, 2021

Marami ang nagulat sa kumalat na balitang masama ang loob ni Willie Revillame kay John Lloyd Cruz dahil kamakailan lang ay magkasama sila ng Wowowin host sa shoot sa Palawan para sa TVC ng isang online shopping.

Si Willie rin ang tumayong manager ni Lloydie para makapag-guest sa big event ng online shopping na ginanap sa Smart Araneta Coliseum at ipinalabas sa GMA 7.

Pero bago pa lumabas sa GMA si John Lloyd ay nakaisip na sina Willie at Direk Bobot Mortiz na gumawa sila ng sitcom at ang TV host ang producer.

Sumakto naman dahil positibo ang feedback sa muling paglabas ng aktor sa telebisyon para sa online shopping.

Hanggang sa marami na ang kumausap kay Lloydie tulad ng mga GMA executives na sina Joey Abacan at Ms. Annette Gozon-Valdes na kahit wala pang binanggit kung ano ang pinagmitingan ay siniguradong may project ang aktor sa nasabing network.

At dito na pumutok ang tsikang nagtampo si Willie dahil nakipag-meeting si JLC sa mga GMA executives nang hindi siya kasama.

Base rin sa tsikahan nina Ogie Diaz at Mama Loi sa bagong vlog ng una na Ogie Diaz Showbiz Update nitong Martes (Hunyo 22) ay tinanong ng huli ang talent manager kung ano ang komento niya sa tampo ni Willie kay John Lloyd.

Walang isinagot ang kaibigan ni Lloydie dahil hindi pa niya alam ang isyu at mas mabuting hayaan daw ang aktor na magsalita tungkol dito.

Samantala, tinanong namin ang taong malapit kay Willie tungkol dito at inamin niyang hindi na nga siya ang producer o isa sa mga producers ng sitcom ni Lloydie.

Ayon kay Willie, “Hindi totoo (nagtampo ako). Sobrang busy ko lang kaya hindi ko na kaya.”

Hayan, maliwanag, walang tampo o galit si Willie kay John Lloyd Cruz.

Masyonda na raw, ayaw nang dagdagan…JOEY, 16 ANG ANAK SA IBA'T IBANG NANAY, SAMA-SAMA SA ISANG BAHAY

ni Reggee Bonoan - @Sheet Matters | June 22, 2021

“'Wag kayong makikipagkumpitensiya sa mga anak ko, matatalo kayo,” ito ang laging sinasabi ni Joey "Tsong" Marquez sa mga nakakarelasyon niya na dahilan kung bakit siya nakikipaghiwalay.

Si Joey ang latest guest ng talent manager at vlogger na si Ogie Diaz sa kanyang YouTube channel.

Sa kasalukuyan ay 16 ang anak ni Tsong Joey. Tanong ni Ogie, posible pa ba itong madagdagan?

“Medyo unfair na sa bata kasi magte-10 years old, otsenta na ako, hindi ko na kaya,” diretsong sagot ng komedyante.

Dagdag pa nito, “Desisyon ko na (itigil na) kasi masyado na akong may-edad para magkaanak pa. Baka hindi ko na abutin ang pagka-binata o pagka-dalaga niya. Gusto kong maabutan pa ‘yung mga apo ko, eh.”

At lahat ng 16 na anak ni Joey ay nasa poder niya, nasa iisang bahay sila.

“Siyempre!” mabilis na sagot ni Tsong.

“Siguro, alam ng mga nanay nila na maalaga ako talaga sa bata at parati ko kasing sinasabi nu’ng karelasyon ko sila na, ''Wag kayong makikipagkumpitensiya sa mga anak ko, matatalo kayo. Mali man o tama ang mga anak ko, mga anak ko ang pipiliin ko,'” paliwanag ni Joey.

Bakit 'yun ang rason niya?

“Kasi mga anak ko, dugo ko ‘yan at kailangan nila ako. Hindi sila mabubuhay kung kahit paano, wala sa kalinga ko. Hindi ko sila puwedeng ipagpalit kahit kanino.”

Wala naman daw kumontra sa sinabing ito ni Joey at kung mayroon man ay hindi sila nagtagal.

Sa tanong ni Ogie kung may selosan sa mga anak niya, “Wala naman. Saka sa mga anak ko, there’s no such thing as half-brother, half-sister. It’s either brother or sister lang. Ang kagandahan, very protective sila sa isa’t isa. At kapag magkakasama kami, parang lahat sila, iisa lang ang pinanggalingan ng dugo, sa akin lang talaga lahat.

“So, walang discrimination na 'Sa iba kang anak,' walang ganu’n. Saka close silang lahat at nagko-communicate sila, iyon ang maganda,” pahayag ni Tsong.

Hindi ba siya nalilito sa pangalan ng mga anak niya?

“Hindi naman. Minsan, kapag nagmamadali ako, natawag ko na lahat ng pangalan, saka pa lang tama sa dulo."

Isa pang rebelasyon ni Joey na kahit hiwalay na siya sa mga nanay ng mga anak niya ay tinutulungan pa rin niya.

“Oo, kasi kailangan, masaya ang mga anak ko. Mga anak ko ang napasaya ko (hindi ang ina nila),” kuwento ni Joey, at maraming beses na raw nangyari ito.

Dagdag pa, “Sasabihin ng anak ko, ‘May problema si Mommy, eh.’ Alam ko na (sabay bunot ng pera). Hindi man makatulong nang sapat, gusto ko kasi, ayaw kong magdamdam ‘yung anak ko at mamroblema siya sa magulang nila at kasama na rin dito ‘yung paggalang ko sa mga nanay na hindi porke't hiwalay na kayo at hindi na kayo magkasama, hindi ka na dapat nag-iisip para sa kanila.”

At 'pag nabura na raw sa mundo si Joey ay nai-prepare na niya ang kung anumang para sa mga anak niya.

“Oo, kasi ako ‘yung taong hindi maluho. Hindi ako mahilig maglalabas, hindi ako mahilig bumili ng kung anu-ano. Hangga’t maaari kasi, ipon lang ako nang ipon. Hindi para sa akin kundi kahit paano, may maiwan ako para sa mga anak ko. Kasi alam ko, magiging magulang sila at ayaw kong mamroblema pa sila para sa mga anak nila,” pagtatapat ni Joey.

Inamin din niyang mayroon na siyang Last Will and Testament.

“Oo, nandoon lahat ang pangalan nila at ang nakakaalam nu'n, ate (Via) ko. Kasi siya ‘yung nagsabi na ‘Joey, mga anak mo, pantay-pantay, ha? Walang peybo-favorite diyan.’"

'Yun naman pala!

Kung ang aktres, game na game pa… BF NI AIKO, TANGGAP KAHIT 'DI NA SILA MAGKAANAK

ni Reggee Bonoan - @Sheet Matters | June 19, 2021

Wala sa hitsura ni Aiko Melendez ang edad 45 nang i-post niya sa kanyang Facebook page ang larawang nakasuot siya ng blue shirt, denim shorts na hanggang beywang ang taas at sneaker na naka-hair clip pa.

Kaagad nag-trending ang post na ito ng aktres at sinabing mukha siyang high school student na inakala namin ay si Marthena Jickain ang nasa litrato, ang dalagitang anak ni Aiko.

Natuwa nang husto si Aiko at kaagad naman niyang pinasalamatan ang mga pumuri sa kanya.

“Hi, Guys, thank you for making me trend yesterday and for the wonderful comments.

“But I'd like to make a correction for those online food delivery claiming about my weight loss. My food is being delivered by Ketovegetarianph. Let’s give the credit to them.

“And also doing regular exercises at home. Thanks I’m happy to inspire a lot of people who almost gave up on their weight loss journey. It is never too late.

“I’m also taking cacao drink to keep me healthy and younger looking. So sa lahat ng nag-message sa akin, salamat! Mahirap pero kung gugustuhin, kakayanin natin 'yan.

“Good luck on your weight loss journey! And yes, wala po akong makeup! My hair extensions added sa bata-bataan na hitsura.”

Sadyang nagpapaka-healthy na ang aktres dahil mahirap magkasakit. Oo naman, kahit pa sabihing marami kang pera ay hindi lahat ay gumagaling. Sabi nga, "health is wealth."

At siyempre, gusto rin kasing makasama ni Aiko nang matagal ang mga anak niya lalo na kapag nagkatuluyan sila ng boyfriend niyang si Zambales Vice-Gov. Jay Khonghun at mabiyayaan siya ng mga anak.

Sabi nga niya, “Bata pa ako, Ate Regs, nagkakaroon pa ako.”

Pero siyempre, kahit bata pa, may mga iba rin na hindi agad nagbubuntis kaya tinanong namin sa ginanap na virtual mediacon ni Aiko kasama si VG Jay kung may plano silang mag-in vitro fertilization.

“Actually, inaalam ko ang proseso at may artista akong tinanungan tungkol diyan, baka I might have considered it,” sambit ng aktres.

Sundot naman ni VG Jay, “Siyempre, baby is always a blessing, kung ibibigay ni God ‘yan, siyempre, masaya. Na kay God kung ibe-bless niya kami. We will be so happy and complete. Pero kung (wala), our family naman is full of love, hindi rin naman magiging problema kung meron.”

Samantala, paakyat ng Baguio ngayong Linggo (Hunyo 20) si Aiko para sa locked-in shooting niya ng pelikulang Huwag Kang Lalabas mula sa direksiyon ni Adolf Alix, Jr. na magsisimula ang first shooting day sa Lunes, Hunyo 21.

Walang ibinigay na detalye sa amin ang aktres nang tanungin namin kung sino ang mga kasama at leading man niya na bawal pa sigurong i-reveal.

Anyway, sanay na si Aiko sa mahahabang locked-in taping o shoot dahil dalawang beses na niya itong nagawa sa teleseryeng Primadonnas sa GMA-7 noong nakaraang taon, kaya hindi na bago kung muli siyang mawawalay nang matagal sa pamilya niya.

Bukod dito ay kumpleto na niya ang COVID-19 vaccine kaya more or less ay safe na siya, pero susunod pa rin siya sa health protocols na ipinatutupad ng IATF at ng buong production.

Tinanong nga namin kung wala siyang mental health issues kapag nasa locked-in shoot siya na hindi niya nakikita ang mga anak at si VG Jay dahil may mga kakilala kami na talagang may kinakausap na psychiatrist to keep them stable.

“Wala pa namang side effects sa akin. Wala pa naman kasi idinadaan ko talaga sa Face Time. I communicate with them as much as I can para just to keep me sane,” pahayag ng aktres.

Binanggit din ni Aiko na babalikan niya ang pagsisilbi sa bayan at sana, palaring manalo sa 2022 bilang representante ng District 5 at ang boyfriend niyang si VG Jay ang kanyang adviser at campaign manager ngayon at siya rin ang kinakausap kung anong partido ang sasamahan ng aktres.

Siyam na taong nagserbisyo si Aiko bilang konsehala ng District 2 noon na hinati na, kaya may District 5. Serbisyo-publiko ang main goal nito sa mga constituents niya.

“At marami rin naman akong mga nagawang maganda sa distrito ko. Kaya malakas din naman ang loob ko na bumalik din sa naiwanan ko, dahil wala akong naiwan na hindi maganda,” say ni Aiko.