P3.48 trilyon, bunga ng mga trip ko — Marcos

ni Mylene Alfonso | February 18, 2023

Bumubuo ng P3.48 trilyon na pamumuhunan ang mga foreign trips ng kasalukuyang administrasyon.

Ayon kay Pangulong Ferdinand Marcos, Jr. ang memoranda of understanding (MOUs) na nilagdaan sa mga biyahe sa ibang bansa ay natupad habang inilalagay ng administrasyong Marcos ang mga detalye ng mga paglalakbay sa ibang bansa na naglalayon na makaakit ng mas maraming mamumuhunan.

“So, we’re starting to go into the details of all of those MOUs and LOIs that people have seen us witnessing, mga pirma-pirma and exchanges sa different countries, (the signing of agreements and exchanges),” pahayag ni Pangulong Marcos kasunod ng pulong sa mga opisyal ng Department of Trade and Industry (DTI) at Office of the Presidential Assistant on Investment and Economic Affairs (OPAIEA), na layuning pagsama-samahin at sundin ang iba’t ibang pangako sa pamumuhunan.

“I can already report that some of the MOUs that we signed in Indonesia and in Singapore, mayroon ng resulta. And in fact, I think in the next couple of weeks, we will be starting to inaugurate some of these projects already,” sabi ng Pangulo.

Nabatid na ang OPAIEA na pinamumunuan ni Frederick Go ay nagsisilbing presidential delivery unit, na nagtataguyod ng priority investment at economic agenda ng Presidente, na tinitiyak ang napapanahong paghahatid ng mga proyekto sa pamumuhunan, mga kasunduan sa kalakalan, at mga pangako, bukod sa iba pa.

Sinabi ni DTI Secretary Alfredo Pascual sa Pangulo sa pagpupulong na may kabuuang 116 na proyekto na nagkakahalaga ng US$62.926 bilyon o P3.48 trilyon ang nabuo mula sa kanyang mga paglalakbay sa ibang bansa.

Ang kabuuang mga dayuhang pamumuhunan na ginawa sa mga opisyal na paglalakbay ng Pangulo ay kasama sa Indonesia, US$8.48 bilyon; Singapore, US$6.54 bilyon; Estados Unidos, US$3.847 bilyon; Thailand, US$4.62 bilyon; Belgium, US$2.20 bilyon; China, US$24.239 bilyon; at Japan, US$13 bilyon. Sa mga pangako, US$4.349 bilyon o P239 bilyon ang natupad sa mga kumpanya sa iba’t ibang yugto ng pagpapatupad ng kanilang mga proyekto sa bansa.

Ang mga proyektong nagkakahalaga ng US$29.712B o P1.7 trilyon ay mayroong umiiral na Memorandum of Understanding o Letters of Intent habang ang mga kumpirmadong proyekto na nagkakahalaga ng US$28.863 o P1.5T ay nasa yugto ng pagpaplano.

P-BBM, nasa Japan na

ni Lolet Abania | Pebrero 8, 2023

Sinimulan na ni Pangulong Ferdinand Marcos Jr. ang kanyang 5-day official visit sa Japan ngayong Miyerkules, ang unang biyahe nito sa East Asian country simula ng maupo sa puwesto noong Hunyo 2022.

Dumating si P-BBM at kanyang delegasyon sa Japan ng alas-5:35 ng hapon local time, sakay ng flight PR 001.

Nakaiskedyul na makipagkita si Marcos kay Japanese Prime Minister Fumio Kishida at makaharap si Emperor Naruhito. Nasa tinatayang pitong key agreements ang inaasahang malalagdaan sa kanyang pagbisita sa naturang bansa.

Nakapaloob sa mga kasunduan ang tungkol sa humanitarian assistance at disaster relief, infrastructure, agriculture, at digital cooperation. Magkakaroon din ang Pangulo ng mga meetings sa mga Japanese business leaders upang i-promote ang mga trade at investment opportunities sa Pilipinas.

“This administration is keen on working closely with Japan to forge stability and dynamism in our bilateral relations,” ani Marcos sa kanyang pre-departure speech.

Samantala, sa bisperas ng pagbisita ni P-BBM sa naturang bansa, ang Maynila ay nagpa-deport ng dalawa sa apat na Japanese nationals na sina Toshiya Fujita at Kiyoto Imamura, na nai-report na sangkot sa organized robberies sa buong Japan.

Habang ang dalawang iba pa, ang mastermind umano na si Yuki Watanabe at si Kojima Tomonobu, ay nakatakdang pabalikin sa gabi ng Miyerkules.

Pinuri naman ng Japanese Embassy in Manila ang gobyerno ng Pilipinas dahil sa tinatawag na “constructive” response at kooperasyon nito kaugnay sa deportation ng kanilang mga mamamayan.

Ayon naman sa Department of Foreign Affairs (DFA), “The “Luffy” controversy would not affect the President’s trip to Japan, which will conclude on February 12.”

Japan trip ni Marcos, kasado na.. Sangkaterba uli ang kasama

ni Mylene Alfonso | February 2, 2023

Inanunsyo kahapon ng Department of Foreign Affairs (DFA) na pitong key bilateral agreements ang inaasahang malalagdaan sa official working visit ni Pangulong Bongbong Marcos sa Tokyo, Japan sa darating na Pebrero 8 hanggang 12.

Sa pre-departure briefing sa Malacañang, sinabi ni DFA Assistant Secretary for Asian and Pacific Affairs Neal Imperial na kabilang sa pitong kasunduan ay may kinalaman sa infrastructure development, defense, agriculture, at information and communications technology na pasok sa priority agenda ni Marcos.

Ayon kay Imperial, inaasahan din ang paglagda ng “umbrella terms of reference” kaugnay sa humanitarian assistance at disaster relief cooperation sa panahon ng working visit kung saan lalagdaan ito ng Department of National Defense (DND) at ng Ministry of Defense ng Japan.

Gayundin, kasama sa pagbisita ang pagpapalitan ng mga notes sa mga loan agreements hinggil sa mga infrastructure projects.

Nabatid na dahil sa imbitasyon ni Japanese Prime Minister Kishida Fumio ang pagbisita ni Marcos kung saan ito ang kauna-unahang pagbisita ng Pangulo sa Japan mula nang maluklok sa puwesto at ikatlo naman na kanyang biyahe sa labas ng bansa ngayong taon.

Magsisimula ang official activities ng Pangulo sa Pebrero 9 sa pamamagitan ng ilang pulong kabilang ang bilateral meeting ni Marcos kay Kishida na una nang nagkausap sa United Nations General Assembly (UNGA) sa New York noong nakaraang Setyembre.

Ang bilateral meeting ay susundan ng isang working dinner na pangangasiwaan ng Japanese Prime Minister. Nakatakda ring magkaroon ng courtesy call ang First Couple kina Emperor Naruhito at Empress Masako.

Makikipagpulong din ang Pangulo sa mga chief executive officers ng Japanese shipping companies at association upang maisulong ang global competitiveness ng mga Filipino seafarers maging ang maritime education at welfare programs.

Nabatid na mahalaga ang pagbisita ng Pangulo sa Japan dahil ito ang ikalawang pinakamalaking trading partner ng Pilipinas at ikatlong pinakamalaking export market at ikalawang top source ng imports.

Nabatid na isa ang Japan sa dalawang strategic partner ng Pilipinas kung saan isa rito ay ang Vietnam. Bago tumulak pabalik ng Maynila, makikipagkita si Marcos sa mahigit 1,000 miyembro ng Filipino community sa Tokyo.

Kabilang sa delegasyon ng Punong Ehekutibo sina First Lady Liza AranetaMarcos, dating Pangulong Gloria Macapagal-Arroyo, Foreign Affairs Secretary Enrique Manalo, Finance Sec. Benjamin Diokno, Trade Sec. Alfredo Pascual, Energy Sec. Raphael Lotilla, Tourism Sec. Christina Frasco, Special Assistant to the President Anton Lagdameo at Communications Sec. Cheloy Garafil.

Idinagdag ni Imperial na malaking business delegation din ang inaasahan na makakasama sa delegasyon ni Marcos.

Aalis sa Maynila ang Pangulo sa hapon ng Pebrero 8 at darating sa Tokyong gabi sa kaparehong araw.