Pagbitay sa kababaihan, 'di raw totoo... Trump, inakusahan ng Iran na gumagawa ng isyu

ni Jenny Rose Albason @World News | April 24, 2026

Ipinahayag ni US President Donald Trump na umano’y pumayag ang Iran na huwag ituloy ang pagbitay sa walong babaeng raliyista, matapos umano niyang makiusap at bilang pagpapakita rin umano ng respeto sa kanya bilang Pangulo ng Estados Unidos.

Ayon kay Trump, apat sa mga kababaihan ay agad na palalayain habang ang apat pa ay makukulong ng isang buwan. Tinawag niya itong “very good news” at iginiit na resulta ito ng kanyang direktang pakiusap.

Gayunman, pinasinungalingan ng mga otoridad sa Iran ang naturang pahayag. Ayon sa Iranian judiciary news agency na Mizan News Agency, walang nakatakdang pagbitay sa nasabing mga kababaihan at tinawag nilang gawa-gawa lamang umano ito ng Amerika.

Giit pa ng Iran, ginagamit lamang umano ni Trump ang isyu upang magpakitang-gilas at ilihis ang atensyon mula sa iba pang isyung pampolitika at tensyon sa rehiyon, kabilang ang usapin sa Strait of Hormuz.

Dagdag pa ng Iran, may ilang naarestong kababaihan na nakalaya na, habang ang iba ay nahaharap sa mga kasong maaaring humantong sa pagkakakulong ngunit hindi sa parusang kamatayan.

Sa ngayon, wala pang opisyal na pahayag mula sa White House at Iranian Foreign Ministry kaugnay ng magkasalungat na ulat.

‘Pag ‘di nakipagkasundo... US-Iran war, tuloy pa rin — Trump

ni Jenny Rose Albason @World News | April 22, 2026

Photo: The White House

Magpapaso na ang ceasefire sa pagitan ng Estados Unidos at Iran gabi ng Miyerkules (oras sa Washington), ayon kay US President Donald Trump.

Ayon kay Trump, malaki ang posibilidad na hindi na niya ito palawigin kung walang mabubuong kasunduan sa pagitan ng dalawang panig.

Inaasahan din niyang maaaring muling sumiklab ang labanan kung mabibigo ang ikalawang yugto ng pag-uusap na makapaghatid ng konkretong kasunduan.

Samantala, ngayong Martes ay inaasahang lilipad patungong Pakistan si US Vice President JD Vance kasama ang ilang matataas na opisyal ng Estados Unidos, bilang paghahanda sa posibleng panibagong round ng negosasyon.

Nagpahayag din si Trump ng kumpiyansa na makikibahagi ang Iran sa usapan, sa kabila ng naunang pahayag ng Tehran na hindi ito dadalo at walang nakatakdang negosasyon sa kasalukuyan.

---

Suspek, nagpakamatay

32-ANYOS, TODAS SA PAMAMARIL

NASAWI ang isang 32-anyos na babaeng Canadian at ilang iba pa ang nasugatan matapos magpaputok ng baril ang isang lalaki sa historical site sa Mexico. Matapos ang insidente, nagpakamatay ang suspek.

Nagpahayag ng pakikiisa si Claudia Sheinbaum sa mga biktima ng pamamaril sa sinaunang pyramid complex ng Teotihuacán, na isang UNESCO World Heritage Site at kilalang tourist destination.

Naganap ang insidente pitong linggo bago ang pagbubukas ng FIFA World Cup sa Mexico City.

Narekober ng pulisya ang baril, patalim, at mga bala sa lugar. Kinumpirma ni Canada's foreign minister Anita Anand na may isang Canadian na nasawi at isa pang sugatan, habang kabilang din sa mga nasugatan ang dalawang Colombian at isang Russian, ayon kay Cristóbal Castañeda Camarillo.

Hindi pa tukoy ang pagkakakilanlan at motibo ng gunman.

Sa kabila ng karahasang may kaugnayan sa drug cartel sa Mexico, bihira ang ganitong insidente na sangkot ang mga turista. Inaasahang aabot sa 5.5 milyong bisita ang darating para sa World Cup, kung saan magde-deploy ang bansa ng halos 100,000 security personnel para sa seguridad.

Kahit binatikos na… POTUS Trump, muling nag-post ng picture kasama si Hesus

ni Dominic Santos @World News | April 17, 2026

Muling nag-post ng isang Artificial Intelligence (AI) image si United States (US) President Donald Trump kasama ang imahe ni Hesus sa kabila ng mga pambabatikos na natanggap sa una nitong inilabas na makikitang nagpapagaling siya ng isang lalaki bilang si Hesus.

Ayon sa caption ni Trump, maaari umanong hindi na naman magustuhan ng umano’y “Radical Left Lunatics” ang kanyang post ngunit tingin niya umano ay ‘nice’ ang larawan kung saan ipinapakita na yakap-yakap siya ni Hesus.