Paglilinis sa mga pasaway na pulis sa lower level, start na

ni Jeff Tumbado | April 29, 2023

Mas lalo pang paiigtingin ng Philippine National Police (PNP) ang pagsugpo laban sa mga tiwaling pulis o ang tinatawag na “rogue cops”.

Ito ang inihayag ni PNP Chief General Benjamin Acorda, Jr., kung saan inatasan na ang lahat ng regional directors ang pagkasa ng operasyon sa mga pasaway na pulis na uumpisahan sa “lower level”.

Ayon kay Acorda, meron na lamang umano na kakaunting tiwaling pulis sa kanilang hanay, base ito sa kanyang karanasan bilang isang counterintelligence agent.

"I intend to conduct really kung sino po 'yung mga nasa listahan at ayaw magbagong-buhay, ay talagang ooperate-an na natin,” pahayag ni Acorda.

"That is what I'm urging. Noong mineet natin 'yung regional directors, 'yan ang hiniling ko sa kanila — that the command responsibility, sa bawat paglilinis sa bawat level, is dapat masusunod," dagdag pa ng chief PNP.

Kamakailan lamang, nanawagan mismo si Interior Secretary Benhur Abalos sa apat na police generals at mga police colonels na maghain ng kani-kanilang courtesy resignation bilang bahagi ng pagsisikap ng gobyerno na tanggalin ang ilang high ranking officers at officials na idinadawit sa kalakalan ng ilegal na droga.

Ito aniya ang tanging paraan ng Kalihim para sa bagong simula sa hanay ng PNP.

Nitong Abril 20, 2023, nakumpleto ng binubuo na five-man advisory group ang review sa mga naghain ng resignations nang nasa 953 police officers at nitong Abril 25 nang irekomenda ang further evaluation o ang karagdagang pagsusuri sa 36 high ranking police officials ng National Police Commision (Napolcom).

Nakatakdang isumite ng five-member body ng Napolcom kay Chairperson Abalos para sa pinal na review at pagkatapos ay siyang ihahain naman kay Pangulong Ferdinand Marcos, Jr. para sa kanyang pag apruba.

221 pulis, sibak sa ‘Degamo killing’

ni Jeff Tumbado | April 19, 2023

Nasa kabuuang 221 police personnel mula sa Police Regional Office 7 (PRO7) ang tinanggal sa pwesto kaugnay sa nangyaring pagpaslang kay Negros Oriental Governor Roel Degamo noong Marso 4.

Ito ang kinumpirma ni PRO7 Deputy Regional Director for Operations Police Col. Noel Flores kung saan humalili sa mga inalis ay ang mga tauhan ng Regional Mobile Force Battalion (RMFB).

“I want to inform the body that 221 personnel from Basay, Bayawan, Sta. Catalina, and Villa Hermosa have been already relieved,” pahayag ni Flores.

Ang pagsibak umano sa buong pwersa ng police personnel sa apat na bayan sa Negros Oriental ay alinsunod sa kautusan ni Interior Sec. Benhur Abalos.

Ang hakbang ng kalihim ay base naman sa mga naging testigo sa krimen na kung saan ay tinukoy ng mga ito na ilan sa mga naging spotter para sa mga salarin ay pawang mga pulis.

Karamihan sa mga itinuturong pulis ay kasalukuyan pang nasa probinsya.

Agad na ring ipinag-utos ni PNP Deputy Chief for Administration Police Lt. General Rhodel Sermonia ang mabilis na pagtukoy sa mga pulis na nagsisilbing spotter upang agad isailalim sa kostudiya at kasuhan kung mapatunayan.

Pasaway na pulis, commander damay.. One-strike policy sa PNP

ni Mylene Alfonso | March 22, 2023

Ihihirit ni Speaker Martin Romualdez na ipatupad sa buong bansa ang "one-strike policy" sa Philippine National Police (PNP) o agarang pagsibak sa puwesto ng mga ninja cops o mga pulis na sangkot sa krimen lalo na sa hulidap pati na ang kanilang commander.

Muling kakausapin ni Romuladez ang pamunuan ng PNP matapos madismaya sa pagkakasangkot umano sa hulidap ng 13 opisyal ng Criminal Investigation and Detection Group (CIDG) National Capital Region (NCR) sa nagreklamong grupo ng Filipino-Chinese businessmen kamakailan.

“Nananawagan akong paigtingin pa natin ang one-strike policy sa kapulisan at gawin ito sa buong bansa. Kung sangkot sa krimen ang isang pulis na nasa presinto, dapat sibakin din agad ang station commander nito,” dagdag pa ng lider ng Kamara.

“If you are the commander, dapat alam mo ang kilos ng mga tao at all times,” dagdag pa ni Romualdez.

Sinibak sa puwesto ni CIDG director Police Brig. Gen. Romeo Caramat Jr. ang 13 opisyal, kabilang si CIDG-NCR chief Police Col. Hansel Marantan na nagsumite na rin ng kanyang courtesy resignation alinsunod sa command responsibility.