Palpak sa mga operasyon.. Lahat ng pulis, balik-training

ni Mai Ancheta @News | August 15, 2023

Dapat isailalim sa retraining ang buong puwersa ng Philippine National Police (PNP).

Ito ang iginiit ng Commission on Human Rights (CHR) matapos ang palpak na operasyon ng Navotas City Police na nagresulta sa pagkamatay ng 17-anyos na si Jemboy Baltazar dahil sa mistaken identity.

Ayon kay CHR Chairperson Richard Palpal-latoc, hindi sapat na isailalim lamang sa refresher course ang buong puwersa ng Navotas Police kundi dapat buong puwersa ng PNP upang hindi na maulit ang ganitong kapalpakan na ang nabibiktima ay mga inosenteng mamamayan.

Mayroon aniyang ibinibigay na training sa PNP patungkol sa human rights at kung susundin ito nang tama ay maiiwasan ang mga ganitong pangyayari.

Matatandaang binaril at napatay ang biktimang si Baltazar matapos mapagkamalan umanong suspek sa target na operasyon ng Navotas Police.

Iginiit din ni Palpal-latoc ang paggamit ng body camera ng mga pulis upang madokumento ang kanilang mga ginagawa sa operasyon na hindi ginawa umano ng Navotas Police sa naganap na insidente.

Mga pulis, sangkot sa patayan, droga, etc. — VACC.. Kamay na bakal sa PNP

ni Mai Ancheta @News | August 13, 2023

Dapat ipatupad ni Pangulong Ferdinand Marcos, Jr. ang kamay na bakal sa Philippine National Police (PNP) upang matakot ang mga bulok na miyembro ng alagad ng batas.

Ito ang iginiit ng Volunteers Against Crime and Corruption (VACC) sa harap ng mga insidente ng pagpatay, pagkakasangkot ng ilan sa illegal drug trade at pagiging brutal umano ng ilang miyembro ng PNP.

Ayon kay VACC President Arsenio 'Boy' Evangelista, bumalik na naman ang krimen at may mga pulis na nasasangkot sa ilegal na droga at iba pang krimen matapos ang termino ni dating Pangulong Rodrigo Duterte.

Takot aniya ang mga pulis noon sa dating Presidente kaya dapat ganito rin ang gawin ng kasalukuyang administrasyon.

Panahon na ani Evangelista na maging hands-on si Pangulong Marcos at iparating ang matinding mensahe laban sa mga pasaway at mga bulok na pulis.

"Siguro it's about time that P-BBM should be hands-on from time to time or most of the time. He should be on national TV, kamay na bakal, matinding mensahe tungkol sa kapulisan," ani Evangelista.

Hindi rin pinaligtas ng VACC President ang pagkondena sa pagkamatay ng 17-anyos na binatilyo sa kamay ng anim na pulis sa Navotas na napagkamalang suspek kaya binaril ito.

Sinabi ni Evangelista na hindi rin katanggap-tanggap ang pahayag ng pulisya na isolated case ang nangyari dahil malaking insulto aniya ito sa pamilya ng biktima.

Dapat umanong sumailalim sa regular at quarterly na moral evaluation at anger management training ang mga pulis upang mabawasan ang mga ganitong klase ng insidente.

Sangkot sa P6.7B shabu.. 50 pulis, tinuluyan sa Ombudsman

ni Mai Ancheta | June 14, 2023

Kinasuhan sa Office of the Ombudsman ang 50 personnel ng Philippine National Police (PNP) kabilang na ang dalawang heneral at isang colonel na isinangkot sa 990 kilo ng shabu na nagkakahalaga ng P6.7 bilyon noong October 2022.

Sa press briefing ni Department of Interior and Local Government (DILG) Secretary Benhur Abalos, sinabi nitong ang National Police Commission (Napolcom) at PNP ang nagsampa ng kaso laban sa 50 police personnel.

Ayon kay Abalos, 48 mula sa 50 kinasuhan ay nakita sa CCTV video habang ang dalawang opisyal ay sinampahan din ng kaso dahil umano sa pakikipagsabwatan o conspiracy.

Kabilang sa mga kasong isinampa laban sa 50 PNP personnel ay paglabag sa Republic Act No. 3091o Anti-Graft and Corrupt Practices Act; falsification of documents; false testimony; malversation of private property; at obstruction of justice.

Pinangalanan ni Napolcom Vice Chairperson Alberto Bernardo ang ilan sa mga kinasuhan na sina PLt. Gen. Benjamin Santos, Jr., PBGen. Narciso Domingo at PCol. Julian Olonan.

Bukod sa kasong kriminal, nahaharap din ang 50 PNP personnel sa kasong administratibo at nakumpleto na ang pre-charge investigation laban sa mga ito.

Inaasahang ilalabas ng Napolcom ang kanilang resolusyon sa loob ng 15 araw.

Kabilang sa kasong administratibo na kinakaharap ng 50 police personnel ay grave misconduct, gross neglect of duty, serious irregularity in the performance of duty at dishonesty.

Sinabi ng Napolcom na kapag napatunayang guilty ang mga ito, masisibak sila sa serbisyo at walang makukuhang benepisyo ang mga ito at hindi na maaaring makapagtrabaho sa alinmang tanggapan ng gobyerno