Retirement age ng pulis, itataas sa 60

ni Mervin Reyes @News | August 29, 2026

Photo: PNP / File

Pag-aralan ng Mababang Kapulungan ng Kongreso ang panukalang itaas mula 56 hanggang 60 ang mandatory retirement age ng mga miyembro ng Philippine National Police (PNP).

Ito ay matapos ipahayag ni Department of the Interior and Local Government (DILG) Secretary Jonvic Remulla ang kanyang suporta sa panukalang baguhin ang kasalukuyang retirement age ng mga pulis.

Binigyang-diin ni Remulla na umabot na sa mahigit 70 taon ang life expectancy o inaasahang haba ng buhay ng mga Pilipino. Dahil dito, aniya, maaari pa ring maging competitive at produktibo ang mga pulis na umaabot sa kasalukuyang mandatory retirement age na 56.

Samantala, sinabi ni Manila Rep. Rolando Valeriano na kasabay ng posibleng pagtataas ng retirement age ay kailangang magpatupad ang DILG at PNP ng mahigpit at taunang health evaluations na naaayon sa edad at kakayahan ng mga opisyal.

Layunin nito na matiyak na ang mga pulis na mananatili sa serbisyo hanggang 60-anyos ay nananatiling pisikal at mental na may kakayahang gampanan ang kanilang mga tungkulin.

128 bagong pulis, inabuso, buking sa video... 70 pulis, sibak sa hazing

by Mai Ancheta @News | February 10, 2026

Photo: PNP - PRO-BAR

Tinatayang 70 pulis na miyembro ng Regional Mobile Force Battalion-14B sa Lamitan City, Basilan ang sinibak sa puwesto dahil sa umano'y pagmamaltrato sa mga kapwa bagong na-assign na pulis.

Sa press conference nitong Lunes, sinabi ni Philippine National Police Public Information Office Chief Brigadier General Randolf Tuaño na sa nabanggit na bilang, 12 police-non commissioned officers ang natukoy na may direktang partisipasyon sa umano'y hazing sa mahigit 120 bagong naitalagang police personnel.

Ang natitirang 58 ani Tuaño ay sumasailalim sa imbestigasyon dahil sa kanilang posibleng nalalaman sa pang-aabuso, na umano'y nangyari noong February 6, 2026.

Ang mga biktima aniya ay katatapos lamang sumailalim sa basic internal security operations training at agad pinag-report sa Lamitan City Police Office kung saan nangyari ang umano'y hazing bilang pag-welcome umano sa mga ito.

Tatlumpu sa mga complainants ay sumailalim na sa medical check-up at nakitaan ng hematoma, pananakit, suntok sa mukha at sa iba bang bahagi ng katawan.

Aabot na sa 18 ang complainant sa nangyaring pagmamaltrato at inaasahang madaragdagan pa ito ng 110 iba pa.

Nag-viral na rin sa social media ang mga larawan at video ng insidente.

Binigyang-diin ni Tuaño na hindi kinukunsinti ng PNP ang anumang uri ng pang-aabuso at lahat ng pulis na mapatutunayang nagkasala sa hazing ay mahaharap sa kasong kriminal at administratibo.

34K pulis, ide-deploy sa Holy Week

ni Eli San Miguel - Trainee @News | March 17, 2024

Magde-deploy ang Philippine National Police (PNP) ng 34,000 na police officers sa mga mataong lugar para tiyakin ang seguridad ng publiko sa pagdaraos ng Holy Week.

Sinabi ni PNP spokesperson Police Colonel Jean Fajardo na pananatilihin ng pulisya ang kanilang presensya sa mga simbahan, mga tourist spots, at mga pangunahing kalsada, kabilang ang mga terminal ng bus, paliparan, at pantalan. Maglalagay din ng mga help desks ng pulisya sa mga lugar na ito.

Magsisimula ang Holy Week o Semana Santa ngayong taon sa susunod na linggo, Marso 24, sa Palm Sunday. Magtatagal ito hanggang Marso 30, Black Saturday, at susundan ng Easter Sunday, kung kailan ipinagdiriwang ng mga Katolikong mananampalataya ang muling pagkabuhay ni Hesus.