Beermen siniguro na ang pagpasok sa finals, Gins binigo

ni Anthony E. Servinio @Sports | January 16, 2026

Photo: Hindi nagpasindak si Ginebra San Miguel point guard Rj Abarrientos bagkus harapan nitong tumirada ng pag basket sa harap ng depensa ni June Mar Fajardo ng San Miguel Beermen para semifinals game 6 best of seven series ng PBA Philippine Cup semifinals sa Araneta Coliseum. (REYMUNDO NILLAMA)

Laro ngayong Miyerkules - Ynares Antipolo

7:30 PM SMB vs. TNT

Nanigurado na ang defending champion San Miguel Beermen at dinurog ang Barangay Ginebra, 101-88, sa Araneta Coliseum kagabi upang makapasok sa 2025-26 PBA Philippine Cup Finals. Tinapos ng SMB ang semifinals seryeng best-of-seven, 4-2, at haharapin na ang TNT Tropang 5G simula Miyerkules sa Ynares Center Antipolo.

Unang quarter pa lang ay bumuhos ng 30 puntos si CJay Perez sa likod ng walang mintis sa kanyang 12 tira kasama ang tatlong tres at isang four-points. Mas marami ito sa buong Ginebra at nagsara ang quarter sa 39-25.

Lalong lumaki ang agwat sa pangalawang quarter, 59-41. Pinilit pa rin humugot mula sa diwa ng "Never Say Die" ang Gin Kings subalit masyadong malaki ang napuhunan ng SMB.

Bumagal ang puntos ni Best Player Perez subalit umakyat siya sa 41 sa 27 minuto lang sa sahig. Sumuporta si Don Trollano na may 23.

Nanguna sa Ginebra si Scottie Thompson na may 24, 12 sa unang quarter. Sumunod sina Norbert Torres na may 13, RJ Abarrientos na may 12 at Japeth Aguilar na may 10.

Samantala, tatanggapin simula ngayong taon ang Ramon Fernandez Trophy ng lahat na mapipiling PBA Finals MVP. Sa kanyang karera mula pagtatag ng liga noong 1975 hanggang 1994, naging bahagi si Fernandez ng hindi pa napapantayan na 19 kampeonato para sa Toyota, Tanduay at San Miguel.

Agad siyang nagbigay ng kanyang pasasalamat at basbas na gamitin ang kanyang pangalan. Walang Finals MVP si Fernandez dahil noong 1996 All-Filipino Conference lang unang iginawad ito kay Jojo Lastimosa ng Alaska.

Kinumpleto na ng Bolts ang semifinals, ready na vs. Tropang 5G

ni Anthony E. Servinio @Sports | December 29, 2025

Photo: Matinding pag-swak sa basket ang ginawa ni Rain or Shine Jhonard Clarito habang todo sa depensa si Cliff Hodge ng Meralco Bolts sa mainit na laro sa PBA 50th season Philippine Cup quarterfinals do or die match kagabi sa Araneta Coliseum. (Reymundo Nillama)

Laro ngayong Enero 4 - Araneta

5:15 PM Meralco vs. TNT

7:30 PM SMB vs. Ginebra

Binuo ng Meralco Bolts ang apat na magtatagisan sa semifinals ng 2025-26 PBA Philippine Cup matapos talunin muli ang paboritong Rain Or Shine Elasto Painters, 98-89, kagabi sa Araneta Coliseum.

Nag-aabang sa Bolts ang maagang nakapasok na TNT Tropang 5G sa seryeng best-of-seven ngayong Enero 4, 2026. Malaking tulong sa Bolts ang pangalawang quarter kung saan linimitahan nila ang ROS sa 11 puntos lang.

Dahil dito, nabura ang 26-20 bentahe ng E-Painters at lumamang ang Bolts sa halftime, 42-37, at matalinong inalagaan ito. Hinatid ni Chris Newsome ang pandiin na shoot, 90-82, papasok sa huling minuto. Humabolng tres si Adrian Nocum, 85-90, subalit iyan na kanilang huling hirit at kalmadong nagpasok ng mga free throw si Newsome upang mapreserba ang tagumpay.

Bumida si Newsome na may 31 puntos. Sumuporta si Chris Banchero na may 21 at CJ Cansino na may 14. Tinambakan ng Bolts ang E-Painters noong Sabado, 96-79, para ipilit ang knockout game. Tinalo ng TNT ang Meralco, 100-98, sa elimination round noong Oktubre 29.

Nabalutan ng emosyon ang laro at pormal na nag-retiro ang beteranong si Gabe Norwood. Nagsilbi ng 18 taon si Norwood sa ROS at Gilas Pilipinas. Nanguna sa ROS sina Nocum na may 29 at Gian Mamuyac na may 20. Nagtala si Norwood ng tatlo sa kanyang pagpapaalam.

Gumana ang Never Say Die spirit ng Gins, swak sa semifinals

ni Anthony E. Servinio @Sports | December 28, 2025

Photo: Pinagtulungan sa mahigpit na depensa nila Jeremiah Gray at Japeth Aguilar kapwa ng Ginebra San Miguel ang ginawang pag basket ni Alec Stockton ng Converge FiberXers habang nasa kasagsagan ng kanilang tagpo sa PBA 50th Season Philippine Cup Quarterfinals do or die match sa Araneta Coliseum. REYMUNDO NILLAMA

Nagbunga muli ang "Never Say Die" ng Barangay Ginebra at umulit sa Converge FiberXers sa overtime, 99-98, sa 2025-26 PBA Philippine Cup quarterfinals kagabi sa Araneta Coliseum. Bumira ng three-points si Stephen Holt kasabay ng huling busina para sa tiket sa semifinals. Kahit siyam na puntos lang, napiling Best Player si Holt.

Nanguna sa opensa sina RJ Abarrientos na may 20 at tig-13 sina Scottie Thompson at Jayson David. Pinilit ng Ginebra ang dagdag na limang minuto nang ipasok ni Jeremiah Gray ang tatlong free throw, 86-86, buhat sa foul ni Alec Stockton na may tatlong segundo sa pang-apat na quarter.

Sa overtime, humabol ang Gin Kings mula sa 93-97 butas simula sa malayong tres ni Troy Rosario na may 20 segundo sa orasan. Winalis ng Gin Kings ang dalawang laro para burahin ang twice-to-beat bentahe ng FiberXers.

Susunod sa semifinals para sa Ginebra ang naghihintay na defending champion San Miguel Beermen na pinauwi agad ang NLEX Road Warriors, 101-94, noong Araw ng Pasko. Kinalimutan ng Ginebra ang malambot na pagtatapos ng pangalawang quarter kung saan sinayang nila ang 37-29 lamang at inagaw ng Converge ang bentahe, 40-39.

Bumawi ang Gin Kings at bumalik sa 68-60 ang agwat sa mga shoot nina Abarrientos, David at Ralph Cu. Nagtala ng 25 para sa FiberXers si Juan Gomez de Liano. Sumunod si reserba Archie Concepcion na may 18 at Justin Arana na may 15 at 13 rebound.

Sa Enero 4 magsisimula ang hiwalay na seryeng best-of-seven semifinals. Ang kabilang serye ay sa pagitan ng TNT Tropang 5G at ang mananaig sa Rain Or Shine Elasto Painters at Meralco Bolts.