Gilas 'di pinaporma ng Tall Blacks sa FIBA q'fiers

ni Anthony E. Servinio @Sports | February 27, 2026

Photo: Si Dwight Ramos sa maaksiyong laban ng Gilas kontra Tall Blacks sa Fiba qualifiers sa MOA arena Huwebes ng gabi. (Reymundo Nillama)

Laro ngayong Linggo - MOA

4:00 PM Chinese-Taipei vs. Tsina

7:30 PM Pilipinas vs. Australia

Yumuko ang magiting na Gilas Pilipinas sa bisitang Aotearoa New Zealand, 66-69, sa FIBA World Cup Qatar 2027 Asian Qualifiers Huwebes ng gabi sa siksikang MOA Arena. Ito ang unang talo ng mga Pinoy at unang panalo ng Tall Blacks sa kompetisyon.

Uminit si Dwight Ramos sa huling minuto at gumawa ng limang puntos upang makalapit ang Gilas, 66-68, at walong segundo sa orasan. Nagbukas ang pinto nang magmintis ng kanyang pangalawang free throw si Reuben Te Rangi at ibinato ni Ramos ang bola ngunit tumalbog ito sa ring sabay ng huling busina.

Dala ng mga sigaw ng mga kababayan, mag-isang gumawa ng lahat ng puntos si CJay Perez para itulak ang mga Pinoy, 10-5. Biglang natawagan ng pangalawang foul si Perez at napilitang umupo na may limang minuto pa at ginamit ng Tall Blacks ang pagkakataon para kunin ang quarter, 25-21.

Nagbanta ang mga bisita na lumayo, 37-27. Sa pangunguna ni Ramos at rumatrat ng 10 sa loob ng tatlong minuto upang pumantay pagsapit ng halftime, 37-37.

Nagtapos si Ramos na may 16. Nag-ambag ng 15 si Perez habang 10 kay Juan Gomez de Liano.

Balanse ang opensa ng Tall Blacks at namuno si Max Darling na may 11. Tig-10 sina Alex McNaught at Sam Mennenga na humakot din ng 14 rebound.

Sa isa pang laro sa Grupo A, naitala ng bisitang Australia ang pangatlong sunod na panalo laban sa Guam, 93-80. Bumira ng walong three-points si Tanner Krebs patungong 28 habang lima ang tres ni Elijah Pepper para magtapos na may 23.

12th title sinungkit ng SMB; Fernandez trophy finals, MVP kay Fajardo

ni Anthony E. Servinio @Sports | February 1, 2026

Photo: Pormal na Ipinagkaloob ni El Presidente Ramon Fernandez ang Final MVP ng PBA Philippine cup conference para kay San Miguel Beermen center June Mar Fajardo. (Reymundo Nillama)

Walang duda sa determinasyon ng defending champion San Miguel Beermen at matagumpay na nanatili ang korona sa Game Six ng 2025-26 PBA Philippine Cup Finals sa 92-77 panalo sa TNT Tropang 5G Linggo ng gabi sa punong MOA Arena. Nagwakas ang seryeng best-of-seven, 4-2, para sa ika-12 titulo ng Beermen sa itinuturing na pinakamatimbang sa tatlong tropeo ng liga.

Napiling pinakaunang tumanggap ng Ramon Fernandez Finals MVP si June Mar Fajardo. Ito ang kanyang ika-limang Finals MVP at ang tropeo ay iginawad ni Fernandez mismo.

Sinimento ni JMF ang kanyang karapatan sa karangalan sa 29 puntos at 23 rebound. Double-double din siya sa lahat ng laro sa serye kahit hindi siya napiling Best Player sa unang tatlong panalo ng SMB.

Dala pa rin ang positibong enerhiya mula sa 96-82 tagumpay sa Game Five, ipinasok ng SMB ang unang 12 puntos at inabot ng anim na minuto bago naka-shoot ang Tropa. Lumaki ito sa 26-5 subalit hindi basta sumuko ang TNT.

Photo: Sinikap na makapag basket ni San Miguel Beermen center June Mar Fajardo sa kabila ng mahigpit na depensa ni Brondon Ganuelas-Rosser ng Talk N Text Tropang 5G sa ilang bahagi ng aksyon sa PBA 50th Season Philippine Cup game 6 finals best of seven series sa Mall of Asia Arena, Pasay City. (Reymundo Nillama)

Mag-isang itinala ni Calvin Oftana ang unang 13 ng pangalawang quarter para lumapit, 23-26. Nagising ang SMB hanggang bumanat ng four-points si CJay Perez at ibalik sa 43-33 ang bentahe.

Nagbunga na rin ang tiyaga ng Tropa at natikman ang nag-iisang bentahe, 68-66, sa walong sagot na puntos. Kinontra ito ng 12 puntos ng SMB para isara ang pangatlong quarter, 78-68.

Tuluyang gumuho ang kampanya ng Tropa. Bumira ng mga pandiin na buslo sina Marcio Lassiter, JMF at Rodney Brondial para maging 89-73 papalapit sa huling dalawang minuto.

Umani ng suporta si JMF kay CJAy Perez na may 19. Double-double din si Brondial na 15 at 13 rebound.

Nagtapos na may 28 si Oftana. Sumunod sina Jordan Heading na may 14 at Poy Erram na may 11.

Brondial best player... Cruz at Rosales bumida sa SMB para lumapit sa korona

ni Anthony E. Servinio @Sports | January 30, 2026

Photo: Hindi na umabot pa ang tangkang pag supalpal ni Henry Galinato Jr. Ng Talk N Text Tropang 5G sa matikas na lay-up basket ni Moala Tautuaa ng San Miguel Beermen sa kasagsagan ng kanilang maaksyong tagpo para sa PBA Philippine Cup finals game 5 sa Ynares Center, Antipolo City. (Reymundo Nillama)

Laro ngayong Linggo - MOA

7:30 PM SMB vs. TNT

Nabuhayan ng todo ang defending champion San Miguel Beermen sa pangatlong quarter upang masugpo ang TNT Tropang 5G, 96-82, sa napakahalagang Game Five ng 2025-26 PBA Philippine Cup Finals Biyernes ng gabi sa Ynares Center Antipolo. Balik sa SMB ang bentahe sa seryeng best-of-seven, 3-2, at maaaring mapitas ang korona ngayong Linggo sa MOA Arena.

Binuksan ng SMB ng 16-2 ang pangatlong quarter upang maagaw ang lamang at lumayo, 63-52, sa mga buslo nina June Mar Fajardo, Marcio Lassiter at Rodney Brondial. Lalong lumobo ito sa 77-59 sa likod nina Jericho Cruz at Kris Rosales at namuro na sa serye ang mga kampeon.

Tiniis ni Best Player Rodney Brondial ang mga sakit sa katawan para bumira ng 17 puntos at 15 rebounds. Sumuporta na may tig-14 sina Don Trollano at JMF na pumitas din ng 11 rebounds.

Bitbit ang positibong enerhiya mula sa 110-87 panalo sa Game Four, tumalon ang TNT sa 23-7 lamang sa unang pitong minuto. Humabol ang Beermen at naging isa na lang ang agwat, 47-48, sa mga shoot nina Lassiter, CJay Perez at JMF sa pagwakas ng pangalawang quarter.

Nagtala ng 20 si Calvin Oftana para sa TNT at sumunod sina Jordan Heading na may 13 at Henry Galinato na may 11. Hindi naglaro si Roger Pogoy na napilay noong Game Four.

Kung kailangan, ang Game Seven ay sa Pebrero 4 sa MOA pa rin. Ang mga koponan ay mga nagharap din sa huling Game Seven ng Philippine Cup Finals noong 2022 na 119-97 panalo ng SMB sa TNT sa Araneta Coliseum.