Oil spill sa Puerto Princesa

ni Mai Ancheta @News | October 2, 2023

Naagapan ng Philippine Coast Guard (PCG) ang oil spill sa pantalan sa Puerto Princesa matapos makita ang nakalutang na langis sa lugar.

Ayon sa PCG, agad silang nagsagawa ng paglilinis sa lugar at naglagay ng oil spill booms sorbent pads upang agad na mapigilan ang posibleng pagkalat nito.

Unang napansin ng mga tao sa pier ang langis kaya agad na ini-report ito sa PCG.

Nakakolekta ang mga tauhan ng PCG ng dalawang drum ng oil spill mula sa tubig sa pier.

Inaalam pa ng PCG kung ang oil spill ay nagmula sa dalawang barko na naka-angkla sa pier o kaya mula sa RoRo na umalis dalawang oras matapos matuklasan ang mga nakalutang na langis sa karagatan.

Barko, papayagan nang bumiyahe kahit may bagyo — PCG

ni Madel Moratillo @News | September 7, 2023

Papayagan nang makapaglayag ang ilang passenger at cargo vessel kahit may bagyo o signal number 1.

Ito ay matapos na amyendahan ng Philippine Coast Guard (PCG) ang polisiya sa paglalayag ng mga sasakyang pandagat. Ayon kay Capt. Jomark Angue, Deputy Chief ng Coast Guard Staff for Maritime Safety Services, dumaan ito sa masusing pag-aaral.

Kabilang umano sa kanilang ikinunsidera ay ang pang-ekonomiya lalo at apektado ang biyahe ng supply dahil kapag may signal number 1 lahat ng sasakyang pandagat, bawal bumiyahe.

Gayunman, nilinaw naman niya na ang papayagan lang ay depende sa barko.

Papayagan lang din aniya ito para sa mga dadaan sa main supply routes at short distance voyage.

Tiniyak naman ng PCG ang patuloy na pakikipag-ugnayan sa PAGASA.

PCG, dedo sa rescue operation

ni Mai Ancheta @News | September 6, 2023

Nauwi sa trahedya ang pagsaklolo ng isang miyembro ng Philippine Coast Guard (PCG) matapos tangayin ng malakas na agos ng tubig habang nasa search and rescue operation sa Sitio Daeng, Bgy. Halog East, Tubao, La Union nitong Martes.

Kinilala ang biktima na si Petty Officer Third Class Ponciano Nesperos, miyembro ng Special Operations Group-North Western Luzon.

Ayon sa PCG, nagresponde ang grupo ni Nesperos sa isang insidente ng pagkalunod dahil sa patuloy na masamang panahon.

Nawalan umano ng balanse si Nesperos habang nagkakabit ng "safety line" kaya ito nahulog sa ilog at tangayin ng malakas na agos ng tubig.

Agad na-recover ng mga kasama ang katawan ni Nesperos subalit wala itong malay kaya agad na dinala sa La Union Medical Center. Gayunman, idineklarang dead-on-arrival ang biktima.

Nagpaabot ng pakikiramay ang buong hanay ng PCG sa pamilya ni Nesperos at kinilala ang serbisyo nito na hanggang sa huling sandali ng kanyang buhay ay inialay sa pagsisilbi sa bayan.