Bossing pinitpit ang lata ng E-Painters

ni Anthony E. Servinio @Sports | July 12, 2026

Photo: PBA PH

Laro ngayong Linggo - Montalban

5:15 PM NLEX vs. Terrafirma

7:30 PM Titan vs. Converge

Dinurog ng Blackwater Bossing ang Rain Or Shine Elasto Painters, 131-108, sa simula ng aksyon sa Grupo B ng 2026 PBA Governors Cup sa Ynares Center Montalban. Nagbunga agad ang mga bagong pirma ng Bossing na determinadong umangat sa ilalim ng liga.

Tila nawala ang depensa at pinayagan ng ROS na bumuhos ang Blackwater ng 36 puntos sa bawat unang tatlong quarter para sa 108-81 lamang papasok sa huling 12 minuto.

Nagpakilala ng mabuti si Kentrell Barkley sa triple double na 29 puntos, 15 rebounds at 10 assist. Malaki ang suporta nina Sedrick Barefield na may 24, RJ Ilagan na may 22 at reserba Dalph Panopio na may 19.

Samantala, puntirya ng NLEX Road Warriors at Coach Jimmy Alapag na umakyat sa 2-0 laban sa Terrafirma Dyip ngayong Linggo sa parehong palaruan. 

"Malayo pa," wika ni Coach Alapag na inihambing ang laro sa unang araw ng pasok sa paaralan. Positibo ang naging epekto ng bagong coach lalo na kay Best Player Kevin Alas na nagsabog ng 19 bilang reserba habang nanguna si import DeQuan Jones na may 23 at 11 rebound.

Gin Kings kampeon sa PBA Commissioners Cup, Thompson Finals MVP

ni Anthony E. Servinio @Sports | June 17, 2026

• 

• 

L-R: Itinanghal na Finals MVP si Scottie Thompson matapos na tulungan ang koponan na iangat tungo sa korona ng PBA Commissioners Cup laban sa Tropang 5G katuwang ang determinasyon at lakas ni Justin Brownlee. (Photos by: Rey Nillama)

Kinoronahan ang Barangay Ginebra na bagong kampeon ng 2026 PBA Commissioner's Cup matapos pababain sa trono ang dating kampeon TNT Tropang 5G, 88-76, sa harap ng 25,000 sa MOA Arena Miyerkules ng gabi. 

Tinuldukan ng Gin Kings ang seryeng best-of-seven, 4-3, at laging wagi tuwing suot ang unipormeng pula.

Ibinuhos ng Ginebra ang huling 12 puntos upang maagaw ang bentahe, lumayo at isara ang pangatlong quarter, 68-63, sa likod nina Best Import Justin Brownlee at Scottie Thompson. 

Nagawang lumapit ang Tropa, 74-77, subalit pinalamig ito ng three-points ni Nard Pinto, 80-74, at tatlong minuto ang nalalabi. Lalong idiniin ng tres ni Best Player of the Conference RJ Abarrientos ang TNT pagsapit ng huling dalawang minuto, 83-76. 

Sapat na iyon at kumapit ang Barangay hanggang maubos ang oras kasabay ng mga mintis ng TNT. Nagtapos si Brownlee na may 30 puntos at 14 rebound. 

Naglatag si Thompson ng 19 puntos, 11 rebound at walong assist at siya na rin ang hinirang na Finals MVP. Nanguna sa TNT si Chris McCullough na may 28 at 22 rebound. 

Sumunod sina Jordan Heading na may 21 at Roger Pogoy na may 15. Susunod na ang Governors' Cup sa Hulyo.  Ang TNT ang defending champion.

Kings 'di dapat magkamali, 5G 'di kukurap sa do-or-die

ni Anthony E. Servinio @Sports | June 17, 2026

Photo: PBA

Laro ngayong Miyerkules - MOA

7:30 PM Ginebra vs. TNT

Walang puwang para magkamali sa Game 7 ng 2026 PBA Commissioner's Cup Finals ng defending champion TNT Tropang 5G at Barangay Ginebra. Asahang aapaw ngayong Miyerkules ang MOA Arena.

Mas malalim na tulong ang natanggap ng TNT matapos ang 98-90 panalo sa Game 6 noong Linggo sa Araneta Coliseum. Lumaki ang pag-asa na maglalaro ng kumpleto ang mga kampeon sa gitna ng marami nilang pilay.

Sa likod ng kumukulong 54 puntos at 22 rebounds ni Chris McCullough, sapat na iyon para takpan ang nawalang numero nina Calvin Oftana at Brandon Ganuelas-Rosser. Sumuporta sina Jordan Heading na may 19 at Roger Pogoy na may 13.

Ayon kay Coach Chot Reyes, doble trabaho ang kanilang PT at doktor upang maghilom agad sina Oftana (binti) at BGR (bukong-bukong) na parehong napilay sa Game 5 noong Biyernes. Magpapasya kung gagamitin ang dalawa sa oras mismo ng laro at makakabuti ang dalawang araw na pahinga.

Nasayang ang 52 ni Best Import Justin Brownlee at muntik na niyang tumbasan ang 54 sa 100-95 overtime panalo sa Game 5. Malaking suliranin na walang kakampi ang umabot ng 10 at 9 lang si Troy Rosario, 7 nito sa unang quarter.

Umabot din ng Game 7 ang huling Commissioner's Cup. Nanaig ang Tropa sa Gin Kings sa overtime, 87-83 sa Araneta Coliseum upang sundan ang panalo sa Game 6 sa parehong iskor.

Upang hindi maulit ang nakaraan, mahalaga na umangat muli ang laro nina Scottie Thompson at Best Player of the Conference RJ Abarrientos na hinanap ng Barangay sa Game 6. Pinagsamang 9 na puntos lang ang karaniwang malupit na tambalan.