12th title sinungkit ng SMB; Fernandez trophy finals, MVP kay Fajardo

ni Anthony E. Servinio @Sports | February 1, 2026

Photo: Pormal na Ipinagkaloob ni El Presidente Ramon Fernandez ang Final MVP ng PBA Philippine cup conference para kay San Miguel Beermen center June Mar Fajardo. (Reymundo Nillama)

Walang duda sa determinasyon ng defending champion San Miguel Beermen at matagumpay na nanatili ang korona sa Game Six ng 2025-26 PBA Philippine Cup Finals sa 92-77 panalo sa TNT Tropang 5G Linggo ng gabi sa punong MOA Arena. Nagwakas ang seryeng best-of-seven, 4-2, para sa ika-12 titulo ng Beermen sa itinuturing na pinakamatimbang sa tatlong tropeo ng liga.

Napiling pinakaunang tumanggap ng Ramon Fernandez Finals MVP si June Mar Fajardo. Ito ang kanyang ika-limang Finals MVP at ang tropeo ay iginawad ni Fernandez mismo.

Sinimento ni JMF ang kanyang karapatan sa karangalan sa 29 puntos at 23 rebound. Double-double din siya sa lahat ng laro sa serye kahit hindi siya napiling Best Player sa unang tatlong panalo ng SMB.

Dala pa rin ang positibong enerhiya mula sa 96-82 tagumpay sa Game Five, ipinasok ng SMB ang unang 12 puntos at inabot ng anim na minuto bago naka-shoot ang Tropa. Lumaki ito sa 26-5 subalit hindi basta sumuko ang TNT.

Photo: Sinikap na makapag basket ni San Miguel Beermen center June Mar Fajardo sa kabila ng mahigpit na depensa ni Brondon Ganuelas-Rosser ng Talk N Text Tropang 5G sa ilang bahagi ng aksyon sa PBA 50th Season Philippine Cup game 6 finals best of seven series sa Mall of Asia Arena, Pasay City. (Reymundo Nillama)

Mag-isang itinala ni Calvin Oftana ang unang 13 ng pangalawang quarter para lumapit, 23-26. Nagising ang SMB hanggang bumanat ng four-points si CJay Perez at ibalik sa 43-33 ang bentahe.

Nagbunga na rin ang tiyaga ng Tropa at natikman ang nag-iisang bentahe, 68-66, sa walong sagot na puntos. Kinontra ito ng 12 puntos ng SMB para isara ang pangatlong quarter, 78-68.

Tuluyang gumuho ang kampanya ng Tropa. Bumira ng mga pandiin na buslo sina Marcio Lassiter, JMF at Rodney Brondial para maging 89-73 papalapit sa huling dalawang minuto.

Umani ng suporta si JMF kay CJAy Perez na may 19. Double-double din si Brondial na 15 at 13 rebound.

Nagtapos na may 28 si Oftana. Sumunod sina Jordan Heading na may 14 at Poy Erram na may 11.

Brondial best player... Cruz at Rosales bumida sa SMB para lumapit sa korona

ni Anthony E. Servinio @Sports | January 30, 2026

Photo: Hindi na umabot pa ang tangkang pag supalpal ni Henry Galinato Jr. Ng Talk N Text Tropang 5G sa matikas na lay-up basket ni Moala Tautuaa ng San Miguel Beermen sa kasagsagan ng kanilang maaksyong tagpo para sa PBA Philippine Cup finals game 5 sa Ynares Center, Antipolo City. (Reymundo Nillama)

Laro ngayong Linggo - MOA

7:30 PM SMB vs. TNT

Nabuhayan ng todo ang defending champion San Miguel Beermen sa pangatlong quarter upang masugpo ang TNT Tropang 5G, 96-82, sa napakahalagang Game Five ng 2025-26 PBA Philippine Cup Finals Biyernes ng gabi sa Ynares Center Antipolo. Balik sa SMB ang bentahe sa seryeng best-of-seven, 3-2, at maaaring mapitas ang korona ngayong Linggo sa MOA Arena.

Binuksan ng SMB ng 16-2 ang pangatlong quarter upang maagaw ang lamang at lumayo, 63-52, sa mga buslo nina June Mar Fajardo, Marcio Lassiter at Rodney Brondial. Lalong lumobo ito sa 77-59 sa likod nina Jericho Cruz at Kris Rosales at namuro na sa serye ang mga kampeon.

Tiniis ni Best Player Rodney Brondial ang mga sakit sa katawan para bumira ng 17 puntos at 15 rebounds. Sumuporta na may tig-14 sina Don Trollano at JMF na pumitas din ng 11 rebounds.

Bitbit ang positibong enerhiya mula sa 110-87 panalo sa Game Four, tumalon ang TNT sa 23-7 lamang sa unang pitong minuto. Humabol ang Beermen at naging isa na lang ang agwat, 47-48, sa mga shoot nina Lassiter, CJay Perez at JMF sa pagwakas ng pangalawang quarter.

Nagtala ng 20 si Calvin Oftana para sa TNT at sumunod sina Jordan Heading na may 13 at Henry Galinato na may 11. Hindi naglaro si Roger Pogoy na napilay noong Game Four.

Kung kailangan, ang Game Seven ay sa Pebrero 4 sa MOA pa rin. Ang mga koponan ay mga nagharap din sa huling Game Seven ng Philippine Cup Finals noong 2022 na 119-97 panalo ng SMB sa TNT sa Araneta Coliseum.

Heading at Oftana ng 5G bumagsik para sa 2-2 ng finals ng Game 4

ni Anthony E. Servinio @Sports | January 29, 2026

Photo: PBA PH Official

Laro ngayong Biyernes - Ynares Antipolo

7:30 PM TNT vs. SMB

Nagpaulan ng kakaibang talas sa shooting ang TNT Tropang 5G para ibaon ang defending champion San Miguel Beermen, 110-87, sa Game Four ng 2025-26 PBA Philippine Cup Finals Miyerkules ng gabi sa MOA Arena. Tabla na ang seryeng best-of-seven sa 2-2.

Unang quarter pa lang ay humarurot ang Tropa na tinuldukan ng milagrong napakalayong four-points ni Jordan Heading, 35-18. Minsan lang nakalamang ang Beermen, 6-4.

Napiling Best Player si Calvin Oftana na may 29 puntos buhat sa lima ng kabuuang 14 tres ng TNT. Sumunod sina Heading na may 17 at Rey Nambatac na may 13.

Umabot ng 82-47 ang agwat sa pangatlong quarter kung saan gumawa ng 12 si Oftana. Mula doon ay maingat nilang inalagaan ang bentahe at tinapos ang laban ng mga reserba.

Matapos magawaran ng kanyang ika-13 Best Player of the Conference, walang puntos ni June Mar Fajardo pero nabalik niya ang porma para sa 18 at 16 rebound. Nag-ambag ng 13 si Don Trollano at 11 kay CJay Perez.

Photo: Itinaas ni SMB center June Mar Fajardo ang plake bilang Best Player of the Conference ng PBA Philippine Cup nang igawad sa kanya nina SMB Governor Robert Non (kaliwa), Rachelle Sale, PBA Commissioner Willie Marcial at Alfrancis Chua halftime ng PBA game. (Ben Maniclang)

Ang Game Five ay sa Biyernes sa Ynares Center Antipolo. Ang Game Six at babalik sa MOA sa Linggo at kung kailangan ng Game Seven, ito ay sa Pebrero 4 sa MOA muli.

Samantala, opisyal na linagdaan ang kasunduan para idaos ang 2026 PBA All-Star sa Candon City nina Mayor Eric Singson at Commissioner Willie Marcial ngayong Marso 6 hanggang 8. Nagbunutan din at itatalaga na si Coach Leo Austria na gumabay sa North habang si Coach Chot Reyes ang hahawak sa South All-Stars.

Maliban sa North vs. South, gaganapin din ang laro ng mga Rookie at Sophomore laban sa Juniors. Mayroon din Obstacle Race, Three-Point Shootout na may four-points at Shooting Stars tampok ang mga alamat ng Ilokano Basketball.