Hirit ng PAO at OSG sa SC.. Pagbasura sa kaso vs. 2 dentista na tumanggi sa HIV patient, repasuhin

ni Madel Moratillo | April 27, 2023

Hiniling ng Public Attorney’s Office at Office of the Solicitor General sa Korte Suprema na repasuhin ang pagkakabasura sa kasong kriminal laban sa 2 dentista na tumangging bigyan ng serbisyo ang isang HIV patient.

Una rito, pinagtibay ng Court of Appeals ang desisyon ng Taguig City regional trial court na nag-grant sa petition for demurrer to evidence na inihain nina Dr. Sarah Jane Mugar at Dr. Mylene Igrubay.

Ito ay kaugnay ng reklamong isinampa ni Henry Se dahil sa paglabag sa Republic Act 8504 o ang Acquired Immune Deficiency Syndrome (AIDS) Prevention and Control Act of 1998 laban sa dalawa.

Nakasaad sa petisyon na bumisita umano si Se sa Enhanced Dental Clinic sa Taguig City noong Pebrero 16, 2017 para magpakonsulta dahil sa masakit na ngipin.

Pero matapos niyang sabihin na sumasailalim siya sa medical treatment para sa HIV, pinayuhan umano siya ni Mugar na kumuha muna ng clearance mula sa kanyang doktor.

Matapos makakuha ng clearance ay nagpapa-schedule na sana umano siya para sa pagpapabunot ng ngipin subalit na-reject umano siya sa kadahilanang wala umanong UV type desterilization equipment ang nasabing clinic.

Ang sabi sa kanya, batay na rin umano ito sa instruction ng may-ari na si Igrubay.

Sa petisyon, sinabi ng OSG na ang provision and standard pagdating sa oral health care services ng mga pasyente ay dapat na patas anuman ang kondisyon nito.

Sa kanilang panig, iginiit naman ng PAO na dapat igiit dito ang RA 8504.

Giit ng PAO, kahit may batas sa anti-discrimination sa bansa, malibang kilalanin at ipatupad ito ng estado ay hindi matitigil ang diskriminasyon.

Ayon sa OSG, nagkaroon ng grave abuse of discretion ang CA nang sabihin nitong bigo ang prosekusyon na mapatunayang guilty beyond reasonable doubt ang dalawa.

Ayon kasi sa CA, ang pagtanggi ng EDC ay dahil sa kawalan ng kinakailangang desterilization equipment pero ayon sa OSG na-establish naman na ang nasabing klinika ay may first class materials, sterilized dental instruments, at disposable dental supplies'.

Ayon pa sa PAO, dapat ay ini-refer umano ang pasyente sa ibang klinika kung wala sila ng nasabing equipment.

Sa loob ng isang taon.. 850,753 kaso hinawakan ng PAO

ni Madel Moratillo | February 24, 2023

Sa loob lamang ng isang taon o nitong 2022 lamang, aabot sa 850,753 kaso sa buong bansa ang hinawakan ng Public Attorney's Office (PAO).

Batay sa datos, katumbas ito ng 11,729,353 na kliyenteng napagsilbihan. Sa 850,753 kasong hinawakan ng PAO, 86.23% ang nakakuha sila ng paborableng disposition rate sa criminal cases habang sa civil cases naman ay mayroon silang 69.76% favorable dispositions.

Kabilang sa mga kontrobersyal na kasong hawak ngayon ng PAO ay may kaugnayan sa Dengvaxia. Sa tulong ng PAO, naharang din ang implementasyon ng guidelines ng Department of Health na kung hindi payagan ng magulang ay puwedeng ang estado ang magbigay ng consent para bakunahan kontra COVID-19 ang isang batang nasa edad 5 hanggang 11.

Sa tulong din ng PAO, may 87,577 persons deprived of liberty ang nakalaya. Ngayon, ang PAO ay kinatuwang na ng Department of Justice sa pagsisiyasat ng mga PDL na puwede pang mapalaya, bilang bahagi ng jail decongestion program ng pamahalaan.

Dahil naman sa kanyang natatanging serbisyo-publiko, nitong 2022 lang ay tumanggap si PAO Chief Persida Rueda Acosta ng 22 award o pagkilala kasama ang pagiging Hero of the Year.

Tinanggalan ng budget para sa 2021… Ilegal 'yan! hina-harass n'yo kami! — PAO

ni Thea Janica Teh | November 28, 2020

Ilegal, malupit, kakatwa, mapaghiganti at labag sa konstitusyon.

Ganito inilarawan ng Public Attorney’s Office (PAO) ang pagsisingit nina Senator Franklin Drilon at Senator Sonny Angara sa GAA (General Appropriations Act) Bill for 2021 na tanggalan ng budget ang PAO para sa plantilya o suweldo ng kanilang mga forensic doctors.

Aniya, "Forensic Laboratory Division: Nothing in the appropriation provided in this act shall be used for the salaries or compensation of personnel, travel allowance, meetings and maintenance and other operating expenses of the PAO Forensic Laboratory Division."

Ayon sa PAO, ito umano ay pangha-harass sa mga doktor at personnel ng kanilang forensic lab na tumutulong upang makamtan ang hustisya ng mga nabiktima ng dengvaxia at iba pang kaso na hawak ng mga ito. Ito umano ay malinaw ding pagte-terminate sa kanilang mga kawani.

Dagdag pa ng PAO, dahil ito umano ay ilegal at hindi ayon sa law of insertion mula sa opposition senator, hindi ito dapat tanggapin ni Pangulong Rodrigo Duterte upang mapanatili ang batas, human rights at hustisya para sa mga mahihirap.

Samantala, itinaas nina Senator Drilon, Angara at Lacson sa P320 milyon ang budget para sa Commission on Human Rights (CHR) forensics and medico-legal service para sa GAA 2020.