Nakabasag ng baso at nakalimutan isuot ang salamin

ni Estrellia de Luna - @Panaginip gabay ng buhay | September 12, 2021

Analisahin natin ang panaginip na ipinadala ni Armeli ng Quezon City.

Dear Maestra,

Napanaginipan ko na nakalimutan kong isuot ang salamin ko sa mata. Pumunta ako sa kusina para uminom ng tubig, pero dahil malabo ang mga mata ko dahil hindi ko suot ang aking salamin, nabasag ko ang baso nang kunin ko ito sa lalagyan. Ano ang ipinahihiwatig ng panaginip ko?

Naghihintay,

Armeli

Sa iyo, Armeli,

Ang ibig sabihin ng nakabasag ka ng baso ay makararanas ka ng kabiguan sa iyong buhay, pero hindi naman ito mabigat at kayang-kaya mo itong lagpasan.

‘Yun namang nakalimutan mong isuot ang salamin mo sa mata, ito ay nagbababala ng paghihiwalay ninyo ng iyong minamahal sa buhay dahil sa hindi pagkakaunawaan.

Maraming salamat sa pagsangguni ng iyong panaginip. Pagpalain ka nawa ng Dakilang Lumikha.

Matapat na sumasaiyo,

Maestra Estrellia de Luna

Multo, paalala na laging bantayan ang bunsong anak

ni Estrellia de Luna - @Panaginip gabay ng buhay | September 11, 2021

Analisahin natin ang panaginip na ipinadala ni Teresa ng Romblon.

Dear Maestra,

Ako ay isang certified housewife at may dalawa na akong anak.

Nanaginip ang bunso ko na nakakita siya ng multo, natakot daw siya pero biglang may dumating na angel. Nagliwanag na parang sikat ng araw ang paligid, tapos natakot ‘yung multo at nagmamadaling lumabas sa bintana. Ano ang ibig sabihin ng panaginip ng anak kong ito?

Naghihintay,

Teresa

Sa iyo, Teresa,

Maganda ang ibig sabihin ng angel sa panaginip ng iyong anak dahil ito ay nangangahulugan na palagi siyang ligtas sa anumang panganib at kapahamakan. May guardian angel siya na nagbabantay sa kanya.

‘Yung liwanag na nakita niya na kasing liwanag ng sikat ng araw, ang ibig sabihin nito ay masasayang events o celebrations sa pamilya ninyo. Nagpapahiwatig din ito na lalo ka pang mamahalin ng asawa mo at ang mga pangarap mo para sa bunso ninyong anak ay ganap na matutupad.

Samantala, ‘yung multo na nakita niya sa panaginip ay nagpapahiwatig na kailangan ay palagi mong subaybayan ang bunso mong anak. Magkipag-bonding ka sa kanya most of the time at ipamalas kung gaano mo siya kamahal. Kung nagsalita ‘yung multo sa panaginip ng anak mo, dapat mong bigyang-atensiyon ang sinabi nito dahil may importanteng mensahe na nakapaloob dito. Kaya huwag kang mag-aksaya ng panahon, tanungin mo ang bunso mong anak kung nagsalita ba ‘yung multo at kung oo, alamin mo kung ano ang sinabi nito.

Matapat na sumasaiyo,

Maestra Estrellia de Luna

Babala na mawawalan ng kabuhayan at parating na mga pangit na karanasan

ni Estrellia de Luna - @Panaginip gabay ng buhay | September 10, 2021

Analisahin natin ang panaginip na ipinadala ni Rainier ng Quezon.

Dear Maestra,

Hangad at layunin ko na lalo pang dumami ang tagasubaybay mo at magtagumpay ka sa lahat ng mga minimithi mo sa buhay.

Napanaginipan ko na napakayaman ko na, tapos lahat ng gusto kong bilhin, kahit mahal ay kayang-kaya ko nang bilhin. Gayundin, lahat ng luho at layaw sa buhay ay na-e-enjoy ko, tapos kung saan-saan ako namamasyal at kahit sa ibang bansa ay nakakarating ako para lang mag-sight-seeing. Tapos bigla akong nagkapantal sa katawan, tinubuan ako ng tigdas. Dahil dito, agad akong bumili at uminom ng gamot para mawala ang tigdas ko at mapait ang lasa nito. Ano ang ibig sabihin ng panaginip ko?

Naghihintay,

Rainier

Sa iyo, Rainier,

Kabaligtaran ang ibig sabihin ng mayamang-mayaman ka na kung saan ang lahat ng luho at layaw sa buhay ay na-e-enjoy mo bukod pa sa nakakapag-abroad ka para lang mag-sight-seeing. Ito ay nangangahulugan ng pagkawala ng kabuhayan. Maghihirap at daranas ka ng pagkabigo sa buhay. Nagpapahiwatig din ito ng panibugho. Matinding selos ang mararamdaman mo, hindi lamang sa larangan ng pag-ibig kundi pati sa mga taong malapit sa iyo na umunlad na ang buhay habang ikaw ay napag-iiwanan sa paglago ng kabuhayan.

‘Yung nagkaroon ka ng tigdas, ito ay nagpapahiwatig na maayos naman ang iyong kalusugan sa kasalukuyan at may malakas kang pangangatawan. May nakalaan din sa iyong pag-unlad sa buhay, ngunit hindi pa ito mangyayari ngayon dahil kailangan pa ang tiyaga at sipag para ikaw ay makabangon.

Samantala, ang sabi mo ay agad-agad kang bumili ng gamot para sa tigdas at ininom ito. Kung ang gamot ay mapait gaya ng sinasaad sa panaginip mo, ito ay nangangahulugan na makararanas ka ng mga pangit at hindi kanais-nais na pangyayari sa susunod na mga araw.

Matapat na sumasaiyo,

Maestra Estrellia de Luna