Nakahanap ng minahan ng diamond

ni Estrellia de Luna - @Panaginip gabay ng buhay | June 22, 2021

Analisahin natin ang panaginip na ipinadala ni Ben ng Meycauayan, Bulacan.

Dear Maestra,

Napakaganda ng inyong column. Isa ako sa mga tagasubaybay n’yo.

Buy and sell ng mga alahas ang pinagkakakitaan ko at madalas akong managinip ng diamond. Napanaginipan ko na nakatagpo ako ng minahan ng diamond. Tuwang-tuwa ako at nasabi ko sa sarili ko na “Mayaman na ako,” paulit-ulit ko itong ibinubulong sa sarili ko. Noong isang gabi naman, napanaginipan ko na may nagbigay sa akin ng diamond. Ano ang ibig ipahiwatig ng panaginip ko?

Naghihintay,

Ben

Sa iyo, Ben,

Maraming salamat sa pagsubaybay mo sa column ko. Sana ay hindi ka magsawang basahin ito at nawa’y makatulong ang pag-aanalisa ko ng mga panaginip sa pang-araw-araw mong pamumuhay.

Ang ibig sabihin ng nakatagpo ka ng mina ng diamond ay dapat kang mag-ingat sa mga taong nakapaligid sa iyo. Nagbababala ito na may parating na gulo sa buhay mo o warning of troubles. Kaya ngayon pa lang, ibayong pag-iingat ang dapat mong gawin. Maging kalmado at mahinahon ka lang upang hindi mapasubo sa nagbabantang gulo sa buhay mo. Halos ganundin ang kahulugan ng may nagbigay sa iyo ng diamond. May isa kang kaibigan na akala mo ay mabait, pero may binabalak palang masama sa iyo. Huwag kang masyadong magtiwala sa mga kaibigan at talasan mo ang iyong pakiramdam. Muli, ibayong pag-iingat ang dapat mong gawin.

Mabuti na ang nag-iingat hangga’t maaga kaysa mapahamak ka nang walang kalaban-laban.

Matapat na sumasaiyo,

Maestra Estrella de Luna

Nahulog sa kanal, babala na mawawalan ng ari-arian

ni Estrellia de Luna - @Panaginip gabay ng buhay | June 19, 2021

Analisahin natin ang panaginip na ipinadala ni Edward ng Batanes,

Dear Maestra,

Mayroon kaming sakahan. Ipinauubaya namin ang pagtatanim ng palay sa aming kasama at tagabantay sa bukid. Namamasukan kasi ako sa kumpanyang malapit dito sa lugar

namin. May tanim kaming palay, pero dahil madalas bumagyo, nasisira ang aming pananim at halos wala na kaming anihin. Dahil dito, ipinagbili na namin ang aming bukid.

Madalas kong mapanaginipan na ako mismo ang nagsasaka sa bukid namin, gayung ito ay ipinagbili na namin. Minsan ay binisita ko ang tanim na palay. Sa paglalakad ko sa pilapil, nadulas ako at nahulog sa kanal malapit sa sinasaka kong bukid. Mabuti at mababaw lang ang kanal kaya hindi ako gaanong nasaktan. Ano ang ibig sabihin nito?

Naghihintay,

Edward

Sa iyo, Edward,

Ang ibig sabihin ng panaginip mo na ikaw mismo ang nagsasaka sa bukid n’yo kahit ito ay ipinagbili n’yo na ay may kaugnayan sa iyong kalusugan. May malusog kang pangangatawan, subalit sa hindi inaasahang pangyayari, bigla kang dadapuan ng karamdaman. Gayunman, huwag kang mag-alala dahil hindi naman magiging malubha ang sakit mo. Gagaling ka at muling sisigla ang iyong katawan.

‘Yun namang nahulog ka sa kanal, nagbababala ito na mawawalan ka ng ari-arian. Kung ikaw ay namamasukan, nagpapahiwatig ito na hindi mo makakamit ang promotion na inaasam-asam mo. Sa halip, tatanggalin ka pa sa trabaho dahil sa pagkalugi ng kumpanyang pinaglilingkuran mo. Maging matatag ka at huwag agad susuko sa darating na mga problema. Ang buhay ay sadyang ganyan, minsan nasa ibabaw, minsan ay nasa ilalim naman.

Panalangin ang solusyon. Tumawag ka palagi sa Diyos at huwag makakalimot magdasal. Sa ganyang paraan, lahat ng pagsubok sa iyong buhay ay tiyak na iyong malalagpasan.

Matapat na sumasaiyo,

Maestra Estrellia de Luna

Sign na susuwertehin sa negosyo o trabaho

ni Estrellia de Luna - @Panaginip gabay ng buhay | June 17, 2021

Analisahin natin ang panaginip na ipinadala ni Baby ng Makati.

Dear Maestra,

Binabati ko kayong lahat d’yan ng isang mapagpala at mapayapang araw. Nawa ay ligtas kayong lahat at nasa mabuting kalagayan.

Gusto kong isangguni ang panaginip ng dalawa kong pamangkin na nasa America. Nababahala kasi sila at hindi makatulog dahil napanaginipan nila ang anak ko na nandito sa Pilipinas. Masama ang paniginip nila tungkol sa aking anak. ‘Yung isa kong pamangkin, napanaginipan niya na ikot nang ikot sa kusina ng luma naming bahay. Nang bumaba siya sa hagdan, nakita niya na nasa kabaong ang anak ko.

‘Yung isa ko pang pamangkin, napanaginipan niya ang anak ko na nasa kuwarto niya, hirap na hirap siyang huminga at namumula ang mga mata. Nakaalalay ako at biglang dumating ‘yung anak kong nurse na may dalang oxygen. Nang mabigyan siya ng oxygen, biglang lumiwanag. Ano ang ibig sabihin ng panaginip na ito ng mga pamangkin ko?

Naghihintay,

Baby

Sa iyo, Baby,

Ang ibig sabihin ng panaginip ng pamangkin mo ay profitable return on investment o salary increase. Susuwertehin sa negosyo ang anak mo at kung siya naman ay nagtatrabaho sa kasalukuyan, madadagdagan ang kanyang suweldo. Ito rin ay nagpapahiwatig na hahaba pa ang buhay niya at hindi pa siya kukunin ni Lord. May gagampanan pa siya sa mundo.

Ang isa mo pang pamangkin na nanaginip tungkol din sa anak mo na hirap na hirap huminga, subalit naginhawaan nang dumating ang oxygen, ito ay nagpapahiwatig na huwag siyang masyadong isubsob sa trabaho.

Ito rin ay nangangahulugan ng hindi inaasahang grasya at pagpapala sa darating na mga araw. Magtatagumpay siya sa bagong negosyo na pinaplano niyang buksan dahil kikita ito ng malaki. ‘Yun nga lang, dapat alagaan ang kanyang kalusugan upang hindi siya magkasakit. May asawa na ba ang anak mo? Happy marriage and several gifted children din kasi ang ipinahihiwatig ng panaginip ng dalawa mong pamangkin tungkol sa iyong anak. Kaya sabihin mo sa mga kamag-anak mo sa abroad na huwag silang mag-alala. Sa halip, matuwa sila dahil kabaligtaran ng iniisip nila ang panaginip ng dalawa mong pamangkin. Bihira lamang sa panaginip ang nagkakatotoo. Karamihan ay kabaligtaran ang ibig sabihin. Nawa’y nasiyahan ka sa aking kasagutan. Hanggang dito na lang, pagpalain kayong lahat ng Diyos Amang Kataas-taasan.

Matapat na sumasaiyo,

Maestra Estrellia de Luna