Kahulugan ng namamasyal sa kulungan kasama ang misis

ni Estrellia de Luna - @Panaginip gabay ng buhay | July 05, 2021

Analisahin natin ang panaginip na ipinadala ni Kevin ng Tarlac.

Dear Maestra,

Ako ay isang tricycle driver, may asawa at isang anak, at nakikitira lang kami sa lola ko. Ang pagpasada lamang ang pinagkakakitaan ko at halos hindi magkasya ang kita ko sa pang-araw-araw naming gastusin.

Sa aking pamamasada, nagulat ako nang bigla akong pinosasan ng isang pulis. Itinuro pala ko ng kasamahan kong tricycle driver na kasama niyang nagbebenta ng droga sa mga kaibigan namin. Nakakulong ako ngayon sa presinto namin, awang-awa ako sa asawa’t anak ko dahil hindi nila alam kung saan kukuha ng panggastos sa araw-araw. Napakalungkot ng asawa ko at iyak siya nag iyak.

Napanaginipan ko na rito sa bilangguan, namamasyal kami ng asawa ko. Masayang-masaya kami at sweet na sweet, magka-holding hands pa kami habang ang sikat ng araw ay napakaganda na parang nakikiisa sa aming pamamasyal. Ano ang ipinahihiwatig nito?

Naghihintay,

Kevin

Sa iyo, Kevin,

Maganda ang ipinahihiwatig ng panaginip mo. Ang ibig sabihin niyan ay mapapawalang-sala ka at makakalaya na sa bilangguan. Lalabas din ang katotohanan na wala kang sala sa kasalanang ibinibintang nila sa iyo. Isinangkot ka lamang ng kaibigan mo dahil noon pa man ay may lihim na siyang galit sa iyo. Lingid sa kaalaman mo, matagal na rin siyang naiinggit sa iyo.

Ipanatag mo ang iyong isipan. Magdasal ka nang taimtim d’yan sa bilangguan. Malapit ka nang makalaya at hindi magtatagal, lalabas ka na sa bilangguan gaya ng ipinahihiwatig ng panaginip mo.

Matapat na sumasaiyo,

Maestra Estrellia de Luna

Malinaw ang paningin kahit walang salamin, babala na mahihiwalay sa asawa

ni Estrellia de Luna - @Panaginip gabay ng buhay | July 03, 2021

Analisahin natin ang panaginip na ipinadala ni Obet ng Malolos, Bulacan.

Dear Maestra,

May asawa na ako at isang anak. Mahilig din akong magbasa ng diyaryo, ito lang ang libangan ko ngayong panahon ng pandemya.

Maraming salamat sa pag-aanalisa n’yo sa panaginip na isinangguni ko sa inyo noong nakaraang linggo. Tama ang kahulugan ng panaginip ko base sa pag-aanalisa n’yo kaya naisipan kong sumangguni muli.

Napanaginipan ko na nabasag ang salamin ko sa mata. Bigla ko itong nabitawan nang ilalagay ko na sa mga mata ko. Pero kahit wala na akong salamin na suot, parang may suot pa rin akong salamin. Kinabukasan naman, napanaginipan ko na may nahukay akong ginto sa bakuran namin. Ano ang ipinahihiwatig ng mga panaginip ko?

Naghihintay,

Obet

Sa iyo, Obet,

Ang ibig sabihin ng panaginip mo na nabasag ang salamin mo sa mata ay makararanas ka ng kabiguan sa buhay, subalit ito ay hindi naman gaanong mabigat. Malalagpasan mo ito at muli mong haharapin ang panibagong yugto ng iyong buhay.

Gayunman, ang pakiramdam mo na may suot ka pa ring salamin kahit dapat ay wala, dahil ito ay nabasag na, nagbababala ito na maaaring mauwi sa hiwalayan ang relasyon n’yong mag-asawa dahil sa hindi pagkakaunawaan.

Makabubuting huwag mong hayaang lumala ang problema n’yong mag-asawa. Pag-usapan n’yo itong mabuti bago pa lumala at mauwi sa hiwalayan. Natural sa mag-asawa ang magkaroon ng mga problema dahil bahagi na ito ng buhay ng tao. Subalit kung pag-uusapan nang mahinahon sa simula pa lang, tiyak na babalik ang dating malambing na pagtitinginan at muli n’yong daranasin ang wagas na pagmamahalan.

Sikapin mong maging tapat sa iyong asawa at huwag kang maglilihim sa kanya. Honesty is the best policy, ‘ika nga. Alalahaning ang katapatan ay magdudulot ng panghabambuhay na kaligayahan at pagkakasundo sa loob ng tahanan. Wala nang hihigit pa sa mundong ibabaw kundi ang isang pamilya ay nagkakasundo at nagmamahalan.

Iwasang magkaroon ng lamat ang pagsasamahan n’yong mag-asawa. Hanggang dito na lang. Nawa ay masiyahan kang muli sa aking pag-aanalisa sa panaginip mo.

Matapat na sumasaiyo,

Maestra Estrellia de Luna

Naging estudyante ng kaibigan kahit titser sa totoong buhay

ni Estrellia de Luna - @Panaginip gabay ng buhay | July 02, 2021

Analisahin natin ang panaginip na ipinadala ni Joel ng Laguna.

Dear Maestra,

Isa ako sa maraming tagasubaybay ng column n’yo. Hangang-hanga ako sa pag-aanalisa n’yo ng mga panaginip. Gusto ko ring magpaanalisa ng panaginip ko. Ako ay isang guro, nasa bahay lang ako ngayon mula nang magkaroon ng COVID-19 pandemic. Masaya naman ako dahil nagkaroon ako ng time na maka-bonding ang aking asawa at anak, hindi tulad noong nagtuturo pa ako na halos wala akong panahon sa kanila dahil puro eskuwelahan ang iniintindi ko. Hanggang sa bahay ay puro lesson plan ang pinagkakaabalahan ko.

Napanaginipan ko kagabi na sa halip na ako ang maging teacher ay baligtad dahil ako ang tinuturuan ng kaibigan kong teacher. Pero kinabukasan, pumunta ako sa school namin at nagturo na sa mga estudyante ko. Ano ang ibig sabihin ng panaginip ko?

Naghihintay,

Joel

Sa iyo, Joel,

Ang ibig sabihin ng panaginip mo na sa halip na ikaw ang magturo ay baligtad dahil ‘yung kaibigan mo ang naging teacher mo, ito ay nagpapahiwatig na malalagay ka sa isang sitwasyon na kakailanganin mo ang tulong o payo ng isang kaibigan. Maaaring tungkol ito sa negosyo na balak mong simulan o maaari rin namang tungkol sa pamilya mo.

Ang panaginip na pumunta ka sa school at ikaw mismo ang nagtuturo sa mga estudyante mo ay nagpapahiwatig na lalapitan ka ng matalik mong kaibigan upang isangguni sa iyo ang isang problema na matagal nang gumugulo sa kanyang isipan.

Maaaring hingan ka niya ng tulong-pinansiyal, kaya ihanda mo na ang iyong sarili. Tulungan mo siya sa abot ng iyong makakaya, maging tungkol sa pera man o iba pang bagay na ilalapit niya sa iyo. Alalahanin mo na ang taong matulungin sa kapwa ay pinagpapala at nagiging kalugod-lugod sa mga mata ng Diyos. Mapapansin mo rin na doble ang balik ng pagpapala kung bukal sa loob ang pagtulong sa kapwa at walang hinihintay na kapalit.

Matapat na sumasaiyo,

Maestra Estrellia de Luna