Sumabog ang bulkang Mayon, senyales na mauudlot ang plano sa pamilya

ni Estrellia de Luna - @Panaginip gabay ng buhay | July 21, 2021

Analisahin natin ang panaginip na ipinadala ni Lourdes ng Bicol.

Dear Maestra,

Nasisiyahan akong basahin ang column ninyo tungkol sa panaginip. Tunay ngang makabuluhan ang inyong pag-aanalisa at nagiging gabay na rin ng mga sumasangguni sa inyo. Dahil d’yan, naisipan kong magpaanalisa rin sa inyo ng mga panaginip ko. Nakatira ako malapit sa Mayon Volcano rito sa Bicol, may alaga kaming baka at kalabaw na siyang nakakatulong sa aming kabuhayan.

Napanaginipan ko last Sunday na sumabog ang Mayon Volcano at dahil malapit kami sa bulkan, agad kaming lumikas dala-dala ang alaga naming baka at kalabaw. Kagabi naman, napanaginipan kong nagda-drive ako ng wagon na maraming lamang kalakal. Pag-aari ng kaibigan ko ang wagon na minamaneho ko. Ano ang ibig sabihin ng mga panaginip ko?

Naghihintay,

Lourdes

Sa iyo, Lourdes,

Maraming salamat sa pagsubaybay mo sa column ko. Natutuwa ako dahil nasisiyahan ka sa pag-aanalisang ginagawa ko sa mga panaginip na isinasangguni sa akin.

Ang ibig sabihin ng panaginip mo na pumutok ang Bulkang Mayon kung saan malapit doon ang tinitirhan mo, ito ay nagpapahiwatig na may mangyayari sa buhay mo na ikalulungkot mo nang husto. Kung may pinaplano ka para sa kabutihan ng inyong pamilya, hindi magiging maganda ang resulta nito dahil mabibigo ka sa kalalabasan ng iyong mga balak. Mapupurnada ito dahil sa pagtataksil ng isang kaibigang pinagkakatiwalaan mo.

‘Yun namang nagmamaneho ka ng wagon na punumpuno ng mga kalakal ay nagpapahiwatig na may mawawalang kaibigan. Lalayuan ka ng isang kaibigan mo na matagal din naman ang naging pagsasama ninyo noon. Sa hindi malamang dahilan, hindi ka na niya ituturing na kaibigan. Kung nagkataong ang wagon ay sa iyo at ito ay hindi pag-aari ng kaibigan mo, maganda ang kahulugan nito. Aangat ang buhay mo at magtatagumpay ka sa lahat ng hangarin mo sa buhay. Pero ang sabi mo na sa kaibigan mo ang wagon at hindi sa iyo, ihanda mo ang iyong sarili sa gustong ipahiwatig ng panaginip mo. Hindi man naging maganda ang kahulugan nito, isipin mo na ang buhay ng tao ay paikot-ikot lang. Kung may lungkot, may ligaya. Kung may hirap, may ginhawa.

Matapat na sumasaiyo,

Maestra Estrellia de Luna

Pahiwatig na mahaba ang buhay ng erpat at may parating na mga biyaya

ni Estrellia de Luna - @Panaginip gabay ng buhay | July 20, 2021

Dear Maestra,

Magandang araw sa inyo at sa mga mahal ninyo sa buhay, gayundin sa mga kasamahan ninyo sa BULGAR. Sumangguni ako sa inyo dahil labis akong nag-aalala at nalulungkot tungkol sa panaginip ko. Hindi ako mapalagay dahil napanaginipan ko ang papa ko na nalunod. Namasyal kami sa dagat para sumagap ng sariwang hangin at upang maligo na rin. Nagsuot ng goggles ang papa ko at nagbaon ng oxygen dahil gusto niyang sumisid sa dagat upang mag-enjoy sa ganda ng tanawin doon na talaga namang makapigil-hininga at tanging sa ilalim lang ng dagat makikita.

Hindi gumana ang dala niyang oxygen noong nasa ilalim na siya, na siyang naging sanhi ng kanyang pagkamatay. Iyak ako nang iyak, tapos tumulong ang coast guard na iahon ang bangkay ni papa at ako naman ay tinulungan ding makaahon dahil sumama ang pakiramdam ko habang nagsu-swimming. Ano ang ibig sabihin ng panaginip ko?

Naghihintay,

Remedios

Sa iyo, Remedios,

Huwag kang malungkot at iwasan mo ang labis na pag-aalala tungkol sa panaginip mo. Ang ibig sabihin ng nakita mong namatay ang papa mo dahil sa pagkalunod ay hahaba pa ang buhay niya. Hindi pa siya mamamatay gaya ng nakita mo sa iyong panaginip. ‘Yun nga lang, dapat siyang mag-ingat dahil may parating na gulo sa buhay niya kung saan madadamay pati kayong pamilya niya.

May mga kaibigan din siya na naghahangad pabagsakin siya. May lihim siyang kaaway na akala niya ay matalik niyang kaibigan, pero sinisiraan pala siya ‘pag nakatalikod. ‘Yun namang iyak ka nang iyak, ang ibig sabihin niyan ay may kaligayahang naghihintay sa iyo sa darating na mga araw, gayundin, may malaking biyaya kang matatanggap. Ang mga paghihirap at pagtitiis mo noong nakaraang araw ay matatapos na. Matutuwa ang mga kaibigan mo, kaya magce-celebrate kayo at magkakaroon ng munting salo-salo.

Matapat na sumasaiyo,

Maestra Estrellia de Luna

Kahulugan ng nakauwi agad ang mister na OFW at nakapatay ng ahas

ni Estrellia de Luna - @Panaginip gabay ng buhay | July 19, 2021

Analisahin natin ang panaginip na ipinadala ni Laura ng Bacolod.

Dear Maestra,

Seaman ang asawa ko at kakaalis lang niya last month. Sumakay na ulit siya sa barko matapos ma-lockdown dito dahil sa COVID-19 pandemic. Sa awa ng Diyos, tapos na ang lockdown sa lugar namin at pinayagan nang makaalis ‘yung magtatrabaho sa abroad.

Naiwan kami ng lima kong anak sa piling ng aking ina. Napanaginipan ko na bigla siyang umuwi rito sa Pilipinas at nagulat ako dahil kaaalis lang niya.

Napanaginipan ko rin noong isang gabi na may nakapasok na ahas sa pintuan namin. Itinaboy ko ‘yung ahas pero ayaw umalis, tapos pinalo ko nang pinalo hanggang sa mapatay ko. Ano ang ibig sabihin ng panaginip ko?

Naghihintay,

Laura

Sa iyo, Laura,

Ang ibig sabihin ng panaginip mo ay matatagalan pa sa abroad ang asawa mo. Hindi siya uuwi hangga’t hindi kayo nabibigyan ng maginhawang pamumuhay ng mga anak mo.

Ang ahas na nakapasok sa pintuan ninyo ay nagpapahiwatig na may mga lihim kang kaaway na labis ang pagkainggit sa iyo at hindi siya titigil na pabagsakin ka sa kasalukuyan mong kalagayan. Ito rin ay nagbababala na may karibal ka sa pagtingin ng asawa mo.

Gayunman, ang sabi mo ay napatay mo ang ahas. Ibig sabihin niyan ay matatalo mo ang mga kaaway mo. Iminumungkahi ko na ibayong pag-iingat ang dapat mong gawin. Makiramdam kang mabuti sa kapaligiran upang matukoy mo ang lihim na kaaway na sisira sa buhay mo o karibal sa pagmamahalan ninyong mag-asawa na hahadlang sa kapayapaan at katahimikan ng pagsasama ninyo. Sa ganitong paraan, makagagawa ka agad ng nararapat na hakbang bago mahuli ang lahat. Huwag kang masyadong malungkot dahil malinaw na ipinahihiwatig ng panaginip mo na ikaw ang magwawagi laban sa iyong mga kaaway at karibal.

Matapat na sumasaiyo,

Maestra Estrellia de Luna