Mapait na ampalaya, babala ng parating na gulo

ni Estrellia de Luna - @Panaginip gabay ng buhay | August 11, 2021

Analisahin natin ang panaginip na ipinadala ni Albert ng Pampanga.

Dear Maestra,

Magandang araw sa inyo. Nawa’y ligtas kayo sa negatibong puwersa ng kalikasan na nagbabanta sa kapaligiran. Ako ay isang vendor ng kung anu-ano na puwede kong itinda sa sidewalk. Sa ngayon ay walang kita dahil sa banta ng COVID-19. Mabuti na lamang at maykaya sa buhay ang panganay kong kapatid na siyang pansamantalang tumutulong sa amin ng pamilya ko.

Napanaginipan kong kumakain ako at kasalo ng mga kapatid ko sa dati naming bahay. Ang ulam namin ay ginisang ampalaya na may kasamang itlog, nang tikman ko ang ampalaya, sobrang pait at muntik ko nang iluwa. Nakita ng mga kapatid ko ang reaksyon ko habang kumakain, tapos kung anu-ano ang sinabi sa akin. Kung saan-saan na nauwi ang usapan hanggang lahat sila ay sinisisi ako sa isang bagay na nakaraan na pero inuungkat pa nilang muli. Ano ang kahulugan nito?

Naghihintay,

Albert

Sa iyo, Albert,

Ang ibig sabihin ng panaginip mo na napakapait ng ginisang ampalaya na inyong ulam ay babala na may parating na gulo sa buhay mo. Ilayo mo ang iyong sarili sa pakikipagtalo dahil malamang na mauwi ito sa away at hindi mo maiwasang masangkot sa gulo.

‘Yun namang sinisisi ka ng mga kapatid mo sa mga pangyayaring nakaraan na, ibig sabihin ay matatalo mo ang iyong mga kaaway. Ikaw ang magwawagi sa kanila at makikita mo ang kanilang pagbagsak sa anumang pakikipagsapalaran nila sa buhay. Panatilihin mo ang pagiging maingat at mapagmatyag sa lahat ng sandali, gayundin, huwag kang basta-basta papatol sa gulo. Umiwas ka hangga’t makakaiwas ka.

Hindi baleng masabihan kang duwag kaysa naman masangkot ka sa away na maghahatid sa iyo sa bilangguan. Ang karuwagan ay hindi kapintasan, sa halip, ito ay pag-iwas lamang sa kapahamakan na maaari mong sapitin kung masasangkot ka sa gulo.

Matapat na sumasaiyo,

Maestra Estrellia de Luna

Babala na magkakaaberya sa last minute ng kasal

ni Estrellia de Luna - @Panaginip gabay ng buhay | August 10, 2021

Analisahin natin ang panaginip na ipinadala ni Aurora ng Pangasinan.

Dear Maestra,

Malapit na akong magpakasal, kaya bawat panaginip ko ay gusto kong malaman ang kahulugan dahil baka may kaugnayan ito sa nalalapit kong pagpapakasal.

Araw-araw akong bumibili ng BULGAR, at ang una kong binabasa ay ang inyong column. Gustong-gusto kong malaman ang kahulugan ng mga panaginip na ipinaaanalisa sa inyo at napakasuwerte ko dahil karamihan sa ipina-publish ninyo ay kapareha ng panaginip ko. Akala ko ay kuntento na akong tagabasa, pero hindi pala. Kakaiba kasi ang napanaginipan ko kagabi. Nanaginip akong umaakyat ako sa mataas na bundok. Pilit kong inaakyat ang bundok kahit sumasakit na ang mga paa ko, hanggang hindi ko na nakayanan dahil sobrang sakit na ng mga binti ko at bigla akong nahulog at bumagsak sa lupa. Ano ang ipinahihiwatig nito?

Naghihintay,

Aurora

Sa iyo, Aurora,

Nagpapasalamat ako sa pagsubaybay mo sa aking kolum, huwag ka nawang magsawa sa pagbili ng BULGAR at hindi lamang panaginip ang subaybayan mo kundi ang iba pang mga balita at lathalain sa diyaryo namin.

Ang ibig sabihin ng panaginip na umaakyat ka sa bundok at gusto mong marating ang itaas, ito ay sa kabila ng subsob ka sa trabaho at halos walang pahinga, hanggang ngayon ay hindi napapansin ng boss mo iyong pagsusumikap. Hindi ka man lang ma-promote o madagdagan ang iyong sahod, pero huwag kang mag-alala dahil malapit nang mapansin ng boss mo kung gaano ka kasipag at katiyaga sa trabaho mo.

Samantala, ‘yung bigla kang nahulog, ito ay may kaugnayan sa nalalapit mong kasal. May hindi inaasahang pangyayari na magiging hadlang sa pagpapakasal mo. Ito ay mangyayari kung kailan last minute at magsusumpaan na kayo sa altar ng lalaking pakakasalan mo.

Umaasa ako at dumadalangin na huwag magkatotoo ang kahulugan ng panaginip mo. Gayunman, ipanatag mo ang iyong isipan, manalangin sa Diyos Amang makapangyarihan na nawa’y walang maging hadlang sa nalalapit mong kasal.

Matapat na sumasaiyo,

Maestra Estrellia de Luna

Paulit-ulit na namatay ang ina

ni Estrellia de Luna - @Panaginip gabay ng buhay | August 09, 2021

Analisahin natin ang panaginip na ipinadala ni Jelanie ng Saudi.

Dear Maestra,

Nawa’y nasa mabuti kayong kalagayan sa sandaling mabasa ninyo ang aking ipinadalang panaginip. Gusto kong malaman kung bakit paulit-ulit ang panaginip ko tungkol sa nanay ko na nasa Pilipinas. Siya ang nag-aalaga sa tatlo kong anak, habang nandito ako sa Saudi para magtrabaho. Palagi kasi kaming kinakapos noon at halos hindi magkasya ang budget sa pang-araw-araw naming pangangailangan kaya naisip kong magtrabaho sa abroad. Biyuda na ako at walang kaagapay sa buhay.

Paulit-ulit ang panaginip ko na namatay na ang nanay ko. Una, naaksidente siya. Pangalawa, inatake sa puso at pangatlo, bigla na lang siyang natumba at nalagutan ng hininga.

Bakit kaya ganu’n, ano ang ibig sabihin ng mga panaginip ko?

Naghihintay,

Jelanie

Sa iyo, Jelanie,

Huwag kang mabahala sa panaginip mo tungkol sa iyong ina. Ang ibig sabihin ng paulit-ulit mo siyang napapanaginipang namatay na ay pagbabago ng buhay niya tungo sa kasaganaan at magandang pamumuhay. Ang sabi mo ay nasa Saudi ka at d’yan nagtatrabaho, patunay lamang na mahahango na sa hirap ang nanay mo dahil padadalhan mo siya ng pera para sa iyong mga anak at siyempre para rin sa kanya. Dahil dito, luluwag na ang kanyang buhay, na hindi gaya noon na kapos kayo at hindi malaman kung paano pagkakasyahin ang inyong budget.

‘Yung paulit-ulit, ang ibig sabihin ay hindi lamang isang beses kang magpapadala ng pera sa nanay mo kundi paulit-ulit.

Ingatan mo ang iyong sarili at panatilihing malusog ang katawan. Huwag ka ring magtitipid, ikaw lang at walang ibang inaasahan ang mother mo na siyang nag-aalaga sa mga anak mo. Maging matatag ka at palaging tumawag sa Diyos kapag nakakaramdam ng homesick d’yan sa Saudi. Malapit mo nang marating ang tagumpay na sadyang inilaan sa iyo ng tadhana at ‘yan ang tiyak na magaganap.

Matapat na sumasaiyo,

Maestra Estrellia de Luna