Mga babala ng unggoy at beans

ni Estrellia de Luna @Panaginip gabay ng buhay | October 06, 2023

Analisahin natin ang panaginip na ipinadala ni Lauro ng Pasig City.

Dear Maestra,

Napanaginipan ko na may alaga akong unggoy, tinali ko ito sa puno ng mangga.

Tuwing umaga lagi siyang nakaupo rito habang inaabangan ang pagkaing ibibigay ko sa kanya, naisipan kong bigyan siya ng beans dahil bago itong ani.

Ano ang ibig sabihin ng panaginip ko?

Naghihintay,

Lauro

Sa iyo, Lauro,

Ang ibig sabihin ng panaginip mo na may alaga kang unggoy, ay makakaranas ka ng kabiguan sa susunod na mga araw. Mabibigo ka sa binabalak mong gawin.

Ang palagi siyang nakaupo sa puno tuwing umaga habang inaabangan ang pagkaing ibibigay mo, ay nangangahulugang masasangkot ka sa gulo. Isipin mong mabuti ang mga nagawa mong pagkakamali upang maituwid mo ito. Sa ganyang paraan, makakaiwas ka sa gulo na darating sa buhay mo.

Samantala, ang naisipan mo siyang bigyan ng beans, ay halos pareho rin ang kahulugan.

Gulo ang ipinahihiwatig nito. Talasan mo ang iyong pakiramdam, at lumayo ka sa mga taong alam mong hindi karapat-dapat pagkatiwalaan.

Matapat na sumasaiyo,

Maestra Estrellia de Luna

Kahulugan ng airplane at may nakitang anghel

ni Estrellia de Luna @Panaginip gabay ng buhay | October 04, 2023

Analisahin natin ang panaginip na ipinadala ni Joann ng Cavite.

Dear Maestra,

Napanaginipan ko na ang daming airplane, nakasakay umano ako, at ang taas na ng narating namin na halos nasa 7th heaven na, nang may makita akong mga anghel, at kinausap ako nu’ng isa.

Ano ang ibig sabihin ng panaginip ko?

Naghihintay,

Joann

Sa iyo, Joann,

Ang ibig sabihin ng panaginip mo na ang daming airplane sa paligid mo ay pagbabago ng iyong tahanan at kapaligiran. Lilipat ka na ng lugar na iyong tinitirahan.

Ang nakasakay ka sa airplane, at halos marating mo na ang 7th heaven, ay nagpapahiwatig na dapat maging maingat ka sa mga pinaplano mong gawin. Huwag kang sugod nang sugod, at mag-isip ka muna bago ka magpasya.

Samantala, ang may nakita kang mga anghel sa langit ay nangangahulugang maliligtas ka sa anumang panganib at kapahamakan. Hindi ka rin makakaranas ng kaguluhan sa iyong buhay.

Magiging masaya at panatag ka sa piling ng iyong mga mahal sa buhay.

Ang kinausap ka ng isa sa mga anghel, ay tanda na dapat mong sundin ang sinabi niya sa iyo, dahil may posibilidad na magkatotoo ito.

Matapat na sumasaiyo,

Maestra Estrellia de Luna

Iba’t ibang kahulugan ng beads at basket

ni Estrellia de Luna @Panaginip gabay ng buhay | October 03, 2023

Analisahin natin ang panaginip na ipinadala ni Jenny ng Masbate.

Dear Maestra,

Nawa’y palagi kayong nasa mabuting kalagayan. Isa ako sa tagasubaybay ng column n’yo.

Palagi kong napapanaginipan ang tungkol sa beads, at madalas ay basket. Ano ang ibig sabihin ng mga panaginip ko?

Naghihintay,

Jenny

Sa iyo, Jenny,

Ang ibig sabihin ng palagi kang nananaginip ng beads ay depende sa sitwasyon. Kung sa panaginip mo ay pinagdudugtung-dugtong mo ‘yung beads para makabuo ka nang bagay na gusto mo, ito ay tanda na ‘di magiging madali ang mga gawain mo sa susunod na mga araw. Makakaranas ka muna ng hirap bago mo makamit ang iyong minimithi.

Kung sa panaginip mo, isinuot mo ‘yung beads na ginawa mo, ngunit naputol, ito ay sign na magkakahiwalay kayo ng karelasyon mo. Posibleng mag-away kayo at tuluyan nang maghiwalay.

Samantala, kung ikaw naman ay nagrorosaryo gamit ang rosary beads, maganda ang ipinahihiwatig nito, magiging payapa at panatag ang buhay mo. Matatapos na ang mga problema mo.

Ang basket naman ay depende ang kahulugan kung may laman ito o wala. Kung marami itong laman, nagpapahiwatig ito na malalagpasan mo ang mga pagsubok sa buhay.

Ngunit, kung ito ay walang laman, ito ay babala ng kabiguan sa buhay, mabibigo ka sa iyong mga pinapangarap.

Matapat na sumasaiyo,

Maestra Estrellia de Luna